Revanth gain an advantage with the statue of Telangana mother: తెలంగాణ తల్లి విగ్రహం డిజైన్‌ను రేవంత్ రెడ్డి మార్చారా?. కేసీఆర్ సర్కార్ ఫైనల్ చేసిన విగ్రహ రూపురేఖల్ని మార్చారా?. రేవంత్ రెడ్డి ప్రభుత్వం కొత్త విగ్రహావిష్కరణ చేస్తున్న సమయంలో ఈ ప్రశ్నలు అందరిలో వినిపిస్తున్నాయి. అయితే ఆ రెండింటికి సమాధానం లేదు అనే. ఎందుకంటే తెలంగాణ తల్లి విగ్రహం కానీ, నమూనా కానీ కేసీఆర్ ప్రభుత్వం ఖరారు చేయలేదు. రేవంత్ రెడ్డి మాత్రమే రెడీ చేయించారు.
బహుజన రూపంలో తెలంగాణ తల్లి
తెలంగాణ తల్లి రూపానికి తెలంగాణ ప్రభుత్వం అధికారికంగా ఓ రూపం ఇచ్చింది. ప్రతిమను రెడీ చేసింది. ఆవిష్కరణకు సిద్ధం చేశారు. అంతా అయిపోయిన తర్వాత రూపాన్ని ప్రభుత్వం విడుదల చేసింది. ముందుగానే చర్చ పెడితే రచ్చ అవడం తప్ప ప్రయోజనం ఉండదని రేవంత్ రెడ్డి వ్యూహాత్మకంగా ముందుగానే సిద్ధం చేయించారు. ఆ రూపంపై బీఆర్ఎస్ ఎలాగూ వ్యతిరేకత చూపిస్తుంది కానీ.. సామాన్య ప్రజలు ఏమనుకుంటున్నారన్నదే కీలకం. తెలంగాణ తల్లి విగ్రహం విషంయలో సామాన్యుల నుంచి మంచి స్పందన లభిస్తోందని కాంగ్రెస్ వర్గాలు చెబుతున్నాయి. ప్రతి తెలంగాణ గ్రామీణ మహిళ ఆ విగ్రహంలో తమను తాము చూసుకునేలా ఆ రూపం ఉందని అంటున్నారు.
కిరీటాలు, నగలు లేకుండా డిజైన్
సాధారణంగా ఇలాంటి విగ్రహాలు ప్రతిమలను కిరీటాలు, నగలతో దేవతలా చూపిస్తారు. దేవుళ్లలాగా ఉండేలా చూసుకుంటారు. కానీ ఈ సారి రేవంత్ రెడ్డి ఆలోచన మాత్రం తెలంగాణ తల్లి విగ్రహం సామాన్యంగా ఉండేలా తమ కుటుంబసభ్యురాలే తెలంగాణ తల్లి అని అనుకునేలా ఉండాలని అనుకున్నారు. అలాగే చేయించారు.ప్రభుత్వం ఏ పని చేసినా వంద శాతం ఆమోదం ఎప్పుడూ రాదు. అలాగే రేవంత్ విగ్రహాన్ని బీఆర్ఎస్ వర్గీయులు, కాంగ్రెస్ వ్యతిరేకులు చాలా స్పష్టంగా వ్యతిరేకిస్తున్నారు. బోనం లేదని.. బతుకమ్మ లేదని.. సిరిసంపదలు లేవని ఇలా రకరకాలుగా వాదిస్తున్నారు. కానీ బీఆర్ఎస్‌కు సమాధానం చెప్పుకునే పరిస్థితి లేదు. ఎందుకంటే ఇప్పటి వరకూ అధికారికంగా తెలంగాణ తల్లికి రూపం ఇవ్వలేదు.
Also Read: Telangana Talli Statue: తెలంగాణ తల్లి రూపం మార్చడంపై హైకోర్టులో పిటిషన్‌, తీర్పుపై సర్వత్రా ఉత్కంఠ!
తెలంగాణ తల్లి విగ్రహానికి పార్టీ పరంగా రూపు ఇచ్చారు. విగ్రహం తయారుచేసి బీఆర్ఎస్ పార్టీ ఆఫీసులో పెట్టుకున్నారు కానీ అధికారికంగా ఎప్పుడూ గుర్తించలేదు. గుర్తించి .. ఆ విగ్రహాన్ని సెక్రటేరియట్ నిర్మాణంతో పాటు పెట్టేసి ఉంటే ఈ రోజు రేవంత్ రెడ్డి దాన్ని మార్చేందుకు ప్రయత్నించేవారు కాకపోవచ్చు. తెలంగాణ తల్లి రూపు అధికారికంగా లేదు. అందుకే ఇక్కడ రేవంత్ మార్చలేదు. తెలంగాణ తల్లికి ఓ రూపం ఇచ్చి సగర్వంగా ప్రతిష్ఠిస్తున్నారు.కేసీఆర్ అక్కడే వ్యూహాత్మక తప్పిదం చేశారని దాన్ని రేవంత్ రాజకీయంగా అడ్వాంటేజ్ సాధించేందుకు ఉపయోగించుకున్నారని రాజకీయవర్గాలు అంచనా వేస్తున్నాయి.