Chandrababu Assets And Cases: తెలుగుదేశం అధినేత చంద్రబాబు కుటుంబం ఆస్తి విలువ ఈ ఐదేళ్లలో దాదాపు 40శాతం పెరిగింది. ఇది కేవలం ఆయన, భార్య భువనేశ్వరి పేరిట ఉన్న ఆస్తులు మాత్రమే. గత ఎన్నికల సమయంలో 545 కోట్ల విలువైన ఆస్తులు ఉండగా...ఇప్పుడు ఆ విలువ 931 కోట్లకు పెరిగింది. అలాగే ఆయనపై ఈ ఐదేళ్లలో ఏకంగా 22 కేసులు నమోదు అయ్యాయి. గతంలో చంద్రబాబుపై కేవలం రెండే కేసులు ఉండేవి.


చంద్రబాబు నామినేషన్
తెలుగుదేశం అధినేత చంద్రబాబు తరఫున ఆయన సతీమణి భువనేశ్వరి తొలిసారి కుప్పంలో నామినేషన్ దాఖలు చేశారు. తొలుత సర్వమత ప్రార్థనలు నిర్వహించిన ఆమె...భారీ ర్యాలీగా తరలివెళ్లి చంద్రబాబు తరఫున నామపత్రాలు అందజేశారు. 2014 ఎన్నికల సమయంలో కుమారుడు లోకేశ్ నామినేషన్ దాఖలు చేయగా...గత ఎన్నికల్లో స్థానిక నేతలే ఈ కార్యక్రమం నిర్వహించారు.


ఆస్తులు
ఈ ఐదేళ్లలో చంద్రబాబు కుటుంబ ఆస్తుల విలువ భారీగా పెరిగింది. గత ఎన్నికల సమయంలో ఆయన అఫిడవిట్‌లో వెల్లడించిన వివరాల ప్రకారం ఆయన, భార్య భువనేశ్వరి ఆస్తులు 545 కోట్లు కాగా....ఇప్పుడు ఏకంగా 40శాతం పెరిగి 931 కోట్లుకు చేరుకుంది. నామినేషన్ సందర్భంగా సమర్పించిన అఫిడవిట్‌ ప్రకారం చంద్రబాబు పేరిట మొత్తం రూ.36.36 కోట్లు ఆస్తులున్నాయి. వీటిలో చరాస్తులు రూ.4.80 లక్షలు కాగా రూ. 2,22,500 విలువైన అంబాసిడర్ కారు ఉంది. చంద్రబాబు  వద్ద ఎలాంటి బంగారం లేదు. అలాగే రూ.36.31 కోట్ల విలువైన స్థిరాస్తులు ఉన్నాయి. 


చంద్రబాబు భార్య భువనేశ్వరి పేరిట ఏకంగా రూ.895 కోట్ల విలువైన ఆస్తులు ఉన్నాయి. వీటిలో హెరిటేజ్‌ ఫుడ్స్‌ లిమిటెడ్‌లోని 2.26 కోట్ల షేర్లు ఉండగా...వీటి విలువ రూ.763.93 కోట్లు. బంగారం, ఇతర ఆభరణాలు విలువ దాదాపు కోటిన్నర  ఉన్నాయి. చెన్నై, హైదరాబాద్‌లోని రూ.85.10 కోట్ల  విలువైన స్థిరాస్తులు ఉన్నాయి. మొత్తంమీద చంద్రబాబు కన్నా ఆయన భార్య భువనేశ్వరి పేరిటే ఎక్కువ ఆస్తులు ఉండటం విశేషం. హెరిటేజ్ సంస్థలో షేర్లు విలువ మినహా మిగిలిన ఆస్తులన్నీ మార్కెట్‌ విలువ ప్రకారమే లెక్కించి అఫిడవిట్‌లో పేర్కొన్నారు. భువనేశ్వరి పేరిట ఎలాంటి కారు లేకపోవడం విశేషం


అప్పులు
చంద్రబాబు కుమారుడు లోకేశ్‌తో కలిసి  బ్యాంక్‌ ఆఫ్‌ బరోడా నుంచి రూ.3.48 కోట్లు ఇంటి రుణం తీసుకున్నారు. ఇది ఒక్కటే చంద్రబాబుకు ఉన్న అప్పు. అటు భువనేశ్వరికి రూ.6.83 కోట్లు అప్పుడు ఉండగా... కుమారుడు లోకేశ్‌ నుంచే రూ.1.27 కోట్లు అప్పు తీసుకోవడం విశేషం.


కేసులు
2019కు ముందు చంద్రబాబుపై కేవలం రెండే కేసులు ఉండగా...ఈ ఐదేళ్లలో ఏకంగా 22 కేసులు వచ్చి పడ్డాయి. వాటిలో మంగళగిరిలోని సీఐడీ పోలీస్‌స్టేషన్‌లో పెట్టిన కేసులే ఏకంగా 8 ఉన్నాయి. చంద్రబాబుపై అన్నమయ్య, తూర్పుగోదావరి, ఎన్టీఆర్‌ జిల్లాల్లో రెండేసి చొప్పున, అనంతపురం, గుంటూరు, పల్నాడు, కర్నూలు, తిరుపతి, విజయనగరం, కృష్ణా, విశాఖ, నంద్యాల జిల్లాలతోపాటు మహారాష్ట్రలో ఒక్కొక్కటి చొప్పున కేసులున్నాయి. భువనేశ్వరిపై ఆదాయపన్ను శాఖ నుంచి రూ.6,04,900 డిమాండ్‌ నోటీసుపై వివాదం ఒక్కటే ఉంది..