Diwali 2024: బాణాసంచా పర్యావరణానికి నిజంగానే హానికరమా!

దీపావళి వస్తే మోత మోగిపోతుంది. బాణసంచా వెలుగులతో ఆకాశవీధి మెరిసిపోతే.. చెవులు మోతెక్కిపోతాయ్. ఇంతకీ బాణాసంచా కాల్చాలా - వద్దా?

బాణాసంచా కాల్చొద్దు పర్యావరణాన్ని రక్షించండి అంటూ పర్యావరణ వేత్తలు చెబుతున్నారు. అలా అంటే ఎలా ఏడాదికోసారి వచ్చే పండుగ సంప్రదాయాలను వద్దంటారేంటి అంటారు హిందుత్వ వాదులు

ఇంతకీ బాణాసంచా ఎందుకు కాల్చాలి? కాల్చితే ఏమవుతుంది - బాణసంచా కాల్చకపోతే ఏమవుతుంది? దీనికి క్లారిటీ ఉందండోయ్..

బాణాసంచా ఎందుకు కాల్చాలో చెప్పుకుంటే.. భారత్ వ్యవసాయ ప్రధాన దేశం. చాలా ప్రాంతాల్లో ప్రధాన ఆహారం వరి. ఈ పంట శీతాకాలంలోనే వృద్ధి చెందుతుంది. దీపావళితోనే చలికాలం మొదలవుతుంది. ఈ సమయంలో పంటను నాశనం చేసే క్రిమికీటకాలు పెరుగుతాయి. కీటకాల కారణంగా పంటదెబ్బతినకుండా గంధకం వినియోగం మంచి పరిష్కారం. దీపావళి రోజు ఊరంతా ఒకేసారి బాణసంచా వెలిగించడం వల్ల ఆ పొగకు క్రిమికీటకాలు నశిస్తాయి. బాణసంచా కాల్చడం వెనుకున్న ఆంతర్యం ఇది.

ప్రస్తుతం నగరాల్లో పొల్యూషన్ పెరిగిపోయింది. క్రాకర్స్ కాల్చడం వల్ల వాతావరణంలో వేడితో పాటూ కార్బన్ డయాక్సైడ్ సహా ఎన్నో విషవాయవులు పెరుగుతాయి. అందుకే పర్యావరణ హిత దివాలీ జరుపుకోవాలని సూచించేవారి సంఖ్య పెరుగుతోంది

బాణాసంచా వెలిగించినప్పుడు వెలువడే విషవాయవులు గాలిని మాత్రమే కాదు నీటిని కూడా కలుషితం చేస్తాయి. అదే సమయంలో పక్షులు, వన్యప్రాణులు, పెంపుడు జంతువులపైనా ప్రభావం చూపిస్తాయి. పైగా సరైన జాగ్రత్తలు తీసుకోపోవడం వల్ల ప్రమాదాల బారిన పడేవారి సంఖ్య పెరుగుతోంది.