Tesla Model Y Car : టెస్లా మోడల్ Y కారు కాస్ట్ అమెరికాలో 32 లక్షలు, ఇండియాలో 60 లక్షల పైమాటే, అక్కడ కొని ఇక్కడికి తెచ్చుకుంటే?

భారతదేశంలో టెస్లా మోడల్ Y ధర 60 లక్షల రూపాయల నుంచి ప్రారంభమై 68 లక్షల వరకు ఉంది. అదే అమెరికాలో ఈ కారు ధర 32 లక్షల రూపాయల వరకు ఉంది. దీనిని చూసి అమెరికాలో కొని దిగుమతి చేసుకుంటే బెస్ట్​ అనుకుంటున్నారా? అయితే ఇది మీరు తెలుసుకోవాల్సిందే.

ఎందుకంటే మీరు అమెరికాలో కారు కొన్నా సరే.. ఇండియాకి వచ్చిన తర్వాత దాని ధర రెట్టింపు అవుతుంది. పన్ను వ్యవస్థ, దిగుమతి సుంకాల వల్లే ఇది జరిగింది. భారతదేశంలో టెస్లా కార్లను CBU అంటే పూర్తిగా నిర్మించిన యూనిట్‌లుగా దిగుమతి చేస్తున్నారు.

దీని అర్థం ఏమిటంటే.. ఈ కార్లు పూర్తిగా విదేశాల్లోనే తయారవుతాయి. దీనిపై ప్రభుత్వం 70 శాతం నుంచి 100 శాతం వరకు దిగుమతి సుంకం విధిస్తుంది. వాస్తవానికి టెస్లా మోడల్ Y ధర 40,000 డాలర్ల కంటే ఎక్కువే. కాబట్టి 100% దిగుమతి సుంకం విధిస్తున్నారు.

టెస్లా ఇంకా లోకల్ మాన్యుఫ్యాక్చరింగ్ గురించి ఎలాంటి అధికారిక లేదా ఫార్మల్ ప్రకటన చేయలేదు. ప్రస్తుతం టెస్లా షోరూమ్ ముంబైలో ప్రారంభించారు. త్వరలో ఢిల్లీలో కూడా తెరిచేందుకు ప్రణాళికలు చేస్తున్నారు.

ఎవరైనా అమెరికా నుంచి టెస్లా Y మోడల్ కొని భారతదేశానికి తీసుకువస్తే అది చౌకగా ఉంటుందని భావిస్తే అది సరికాదు. అమెరికా నుంచి టెస్లా ఈ మోడల్​ను కొనుగోలు చేసి తీసుకురావడంపై ప్రభుత్వం అనేక రకాల పన్నులు విధిస్తుంది.

కాబట్టి భారతదేశానికి తీసుకువచ్చేసరికి ఈ కారు ఇక్కడ అమ్ముడవుతున్నంత ధరకే వస్తుంది. అమెరికాలో కొని అక్కడ నడిపేందుకు కొనుగోలు చేస్తే అది 32 లక్షలే కానీ ఇండియాకు వస్తే ధర రెట్టింపు అవుతుంది.

టెస్లా మోడల్ Y భారతదేశంలో ఓవర్-ది-ఎయిర్ సాఫ్ట్‌వేర్ అప్‌డేట్‌లు, ఎలక్ట్రిక్ అడ్జస్టబుల్ రియర్ సీట్లు, వెనుక సీటు కోసం ప్రత్యేక టచ్‌స్క్రీన్ వంటివి అందించింది.