Fatty Liver : కడుపులో ఈ 5 లక్షణాలు కనిపిస్తే జాగ్రత్త.. ఫ్యాటీ లివర్ కావొచ్చు

కొన్నిసార్లు గ్యాస్, ఉబ్బరం లేదా ఆకలి లేకపోవడం వంటివి సాధారణ సమస్యలుగా అనిపిస్తాయి. కానీ ఈ చిన్న లక్షణాలు కాలేయానికి సంబంధించిన పెద్ద సమస్యను సూచిస్తాయి. సమయానికి శ్రద్ధ తీసుకోకపోతే.. ఫ్యాటీ లివర్ సిరోసిస్ లేదా లివర్ ఫెయిల్యూర్ వరకు దారితీయవచ్చు.

కుడి వైపున పక్కటెముకల కింద తేలికపాటి నొప్పి ఉంటుంది. లేదా ఒత్తిడి, బరువుగా అనిపిస్తే తేలికగా తీసుకోకండి. కాలేయంలో కొవ్వు పెరిగేప్పుడు ఇలా జరుగుతుంది. తిన్న తర్వాత లేదా పడుకున్న తర్వాత ఈ నొప్పి పెరుగుతుంది.

బరువు తగ్గడం మంచిదే.. ఎలాంటి ప్రయత్నం చేయకుండానే మీ బరువు వేగంగా తగ్గుతుందంటే.. అది ఫ్యాటీ లివరే కావొచ్చు. ఆకలి కూడా తగ్గిపోతే ఇది ప్రమాదకరమైన సంకేతం అవుతుంది. కాలేయం పోషకాలను సరిగ్గా గ్రహించలేనప్పుడు శరీరం బలహీనపడుతుంది.

వాంతి వచ్చినట్లు అనిపించడం కూడా లివర్ సంబంధిత సమస్యలకు సంకేతం కావచ్చు. ముఖ్యంగా ఈ సమస్య కొవ్వు లేదా నూనెతో కూడిన ఆహారం తిన్న తర్వాత పెరిగితుంది. ఈ సమస్య చాలా రోజుల పాటు కొనసాగితే.. సాధారణ కడుపు నొప్పి అని నిర్లక్ష్యం చేయవద్దు.

మలం రంగు కూడా లివర్ పరిస్థితిని తెలియజేస్తుంది. ఇది పసుపు, బూడిద లేదా నల్లగా ఉంటే, బైల్ (పిత్తం) సమతుల్యత దెబ్బతిన్నదని అర్థం చేసుకోవాలి. ఇది ఫ్యాటీ లివర్కు నేరుగా సంకేతం కావచ్చు.

కడుపులో అకస్మాత్తుగా వాపు లేదా కాళ్లలో, చీలమండలలో వాపు కనిపించడం కూడా కాలేయ వ్యాధిలో భాగమే. వైద్య పరిభాషలో దీనిని అసిటిస్ (కడుపులో నీరు చేరడం), ఎడీమా అంటారు. కాలేయం రక్త ప్రవాహం, ద్రవాలను నియంత్రించలేనప్పుడు ఇది జరుగుతుంది.

జీర్ణ సమస్యలు మిమ్మల్ని చాలా కాలంగా ఇబ్బంది పెడుతుంటే.. వాటిని తేలికగా తీసుకోకండి. కాలేయం శరీరంలో చాలా ముఖ్యమైన అవయవం. ప్రారంభ సంకేతాలను గుర్తించడం ద్వారా మీరు పెద్ద వ్యాధి పెద్దగా కాకుండా బయటపడొచ్చు..