Tips To Focus at Work : ఆఫీసులో పని మీద ఫోకస్ చేయలేకపోతున్నారా? ఏకాగ్రత పెంచే ఈ టిప్స్ ట్రై చేయండి
తక్కువ సమయంలో పని పూర్తి చేయాలంటే ఈ టిప్స్ ఇవే
మీరు వర్క్ ఫినిష్ చేయడానికి ఎక్కువ సమయం పడుతోందా? మొబైల్ నోటిఫికేషన్లు, ఒత్తిడి, నిద్రలేమి వంటి కారణాలు మీ ఏకాగ్రతపై ప్రభావం చూపించవచ్చు. అలాంటి సమయంలో కొన్ని చిట్కాలు ఫాలో అయితే.. పనిపై దృష్టి పెట్టే సామర్థ్యాన్ని మెరుగుపరచుకోవచ్చు.
రోజు ప్రారంభంలో చేయాల్సిన పనులను ఒక జాబితాగా రాసుకోండి. వాటిలో ముఖ్యమైన పనులకు మొదటి ప్రాధాన్యం ఇవ్వండి. ఇలా చేయడం వల్ల ఏ పని ముందుగా చేయాలో స్పష్టత వస్తుంది. ఒకేసారి అన్ని పనుల గురించి ఆలోచించే ఒత్తిడి కూడా తగ్గుతుంది.
పని చేస్తున్నప్పుడు వచ్చే మెసేజ్‌లు, సోషల్ మీడియా నోటిఫికేషన్లు ఏకాగ్రతను దెబ్బతీయవచ్చు. అవసరం లేని నోటిఫికేషన్లను ఆఫ్ చేసి, మొబైల్‌ను కొంచెం దూరంగా పెట్టండి. మెసేజ్‌లు చూసేందుకు ప్రత్యేక సమయం కేటాయిస్తే పనిపై ఎక్కువసేపు దృష్టి పెట్టగలుగుతారు.
ఒకే సమయంలో అనేక పనులు చేయడానికి ప్రయత్నిస్తే పదేపదే డైవర్ట్ అవుతారు. దీంతో పని పూర్తి చేయడానికి ఎక్కువ సమయం పట్టవచ్చు. అందుకే ఒక పనిని ఎంచుకుని దానిని పూర్తి చేసిన తర్వాత మరో పనిని ప్రారంభించండి. ముఖ్యంగా రాయడం, లెక్కలు చేయడం వంటి ఎక్కువ ఏకాగ్రత అవసరమైన పనులకు ఇది హెల్ప్ అవుతుంది.
ఎక్కువసేపు విరామం లేకుండా పనిచేస్తే అలసట పెరిగి దృష్టి తగ్గవచ్చు. అందుకే మీ పనికి అనుగుణంగా గంటకోసారి చిన్న విరామం తీసుకోండి. ఆ సమయంలో కాసేపు నడవడం, నీళ్లు తాగడం లేదా కళ్లకు విశ్రాంతి ఇవ్వడం మంచిది.
నిద్ర సరిగా లేకపోతే మరుసటి రోజు అలసట, మతిమరుపు, ఏకాగ్రత లోపం వంటి సమస్యలు ఎదురవవచ్చు. కాబట్టి రాత్రి నిద్ర కనీసం 7 నుంచి 9 గంటలు ఉండేలా చేసుకోవాలి. ప్రతిరోజూ ఒకే సమయానికి పడుకోవడం, నిద్రకు ముందు మొబైల్ వినియోగాన్ని తగ్గించడం ఉపయోగపడతాయి.
సమతుల్యమైన ఆహారం తీసుకోవడం, రోజంతా తగినంత నీరు తాగడం శరీరం, మెదడు సాధారణ పనితీరుకు అవసరం. అల్పాహారాన్ని పూర్తిగా మానేయకుండా పండ్లు, కూరగాయలు, పప్పులు, తృణధాన్యాలు వంటి పోషకాహార పదార్థాలను ఆహారంలో చేర్చుకోండి. భోజనం మానేయడం లేదా నీళ్లు తక్కువగా తాగడం వల్ల కొందరిలో అలసట, తలనొప్పి రావచ్చు.
రోజూ కొన్ని నిమిషాలు ప్రశాంతంగా కూర్చుని శ్వాసపై దృష్టి పెట్టడం అలవాటు చేసుకోండి. ఇది ఒత్తిడిని తగ్గించుకోవడానికి, మనసును పనిపై నిలిపేందుకు సహాయపడవచ్చు. పని మధ్యలో ఆందోళనగా అనిపించినప్పుడు డీప్ బ్రీతింగ్ తీసుకోవడం మంచిది.