RRR Song Dosti: ఫ్యాన్స్ బీ రెడీ.. 'దోస్తీ' సాంగ్ రెండో వెర్షన్ ఉందట.. 

స్నేహితుల దినోత్సవాన్ని పురస్కరించుకొని 'ఆర్ఆర్ఆర్' సినిమా నుండి 'దోస్తీ' సాంగ్ ను విడుదల చేసింది చిత్రబృందం. ఈ పాటకు ప్రేక్షకుల నుండి భారీ రెస్పాన్స్ వస్తోంది. ఈ ఒక్క థీమ్ సాంగ్ కోసం మూడు కోట్ల వరకు ఖర్చు చేసినట్లు సమాచారం. హేమచంద్ర పాడిన ఈ పాట మొత్తం ఒక ఎత్తైతే పాట చివర్లో చరణ్, ఎన్టీఆర్ లు చేయి కలుపుతూ కనిపించి అభిమానుల ఉత్సాహాన్ని మరింత పెంచారు.

అయితే ఈ పాటకు ఇది ఒక వెర్షన్ మాత్రమేనని సమాచారం. మరో వెర్షన్ కూడా ఉందట. దాన్ని మాత్రం సినిమాలోనే చూడాలి. ఈ 'దోస్తీ' పాటలో మాత్రం చిత్రబృందం అంతా కనిపిస్తుంది. రాజమౌళి దగ్గర నుండి సినిమాకి పని చేసిన టెక్నీషియన్లు, నటీనటులంతా ఈ పాటలో కనిపిస్తారు. సినిమా మొత్తం ఈ పాట బిట్లు బిట్లుగా వినిపిస్తుంది. 

చివర్లో మాత్రం ఎండింగ్ టైటిల్ లో చిత్రబృందం అంతా కలిసి ఈ పాటలో కనిపించి కనువిందు చేయబోతుంది. ఈ సినిమాలో మిగిలిన పాతాళ లిరికల్ వీడియోలను సైతం ఇలానే కొత్తగా డిజైన్ చేసి రిలీజ్ చేయబోతున్నారు. దానికోసం స్పెషల్ గా ఓ బడ్జెట్ కూడా అనుకున్నారట. 

రాజమౌళి తన సినిమాలన్నిటికీ కీరవాణినే సంగీత దర్శకుడిగా తీసుకుంటారు. ఆయన కూడా తన మ్యూజిక్ తో సినిమా స్థాయిని మరింత పెంచుతారు. ఇప్పుడు 'ఆర్ఆర్ఆర్' విషయంలో కీరవాణి తన బెస్ట్ ఇచ్చారని ఒక్క థీమ్ సాంగ్ తో చెప్పకనే చెప్పారు. 

తెలుగులో ఈ పాటను హేమచంద్ర పాడగా.. హిందీలో అమిత్ త్రివేది.. తమిళంలో అనిరుద్.. కన్నడలో యాజిన్ నైజర్.. మలయాళంలో విజయ్ ఏసుదాస్ ఆలపించారు. అన్ని భాషల్లో ఈ థీమ్ సాంగ్ సూపర్ హిట్ అయింది. మిలియన్లలో వ్యూస్ అందుకుంటూ యూట్యూబ్ లో రికార్డులు సృష్టిస్తుంది. 

ఇక ఈ సినిమాలో రామ్ చరణ్ కు జంటగా అలియా భట్.. ఎన్టీఆర్ కి జోడీగా ఒలీవియా మోరీస్‌ కనిపించనున్నారు. వీరితో పాటు రేయ్‌ స్టీవ్‌సన్‌, ఆలిసన్‌ డ్యూడీ, శ్రియ, అజయ్‌ దేవ్‌గణ్‌, సముద్రఖనిలు కీలకపాత్రలు పోషించారు.