Sai Madhav Burra: సాయి మాధవ్ బుర్రా సూపర్‌విజన్‌లో... పొలిటికల్ లీడర్ కటౌట్ తగలబెట్టిన అవినాష్, సిమ్రాన్ చౌదరి!
అటు సెంట్రల్... ఇటు తెలుగు స్టేట్స్... ప్రజెంట్ ఎటు చూసినా సరే పొలిటికల్ హడావిడి! ఒకవైపు కొందరు రాజకీయ నాయకులకు ప్రజలు నీరాజనాలు పడుతుంటే... మరొకవైపు ఇంకొందరిపై ఆగ్రహ జ్వాలలు వ్యక్తం చేస్తున్నారు. ఈ తరుణంలో పొలిటికల్ లీడర్ కటౌట్ సామాన్య ప్రజలు తగలబెట్టిన ఫస్ట్ లుక్ పోస్టర్ ఒకటి విడుదలైంది. పూజతో సినిమా మొదలైంది. ఆ సినిమాకు స్కిప్ట్ సూపర్ విజన్ ప్రముఖ రచయిత సాయి మాధవ్ బుర్రాది కావడం విశేషం. ఆ వివరాల్లోకి వెళితే...
Download ABP Live App and Watch All Latest Videos
View In Appఅవినాష్ తిరువీధుల, సిమ్రాన్ చౌదరి జంటగా ఓ సినిమా రూపొందుతోంది. దీనిని సిల్వర్‌ స్క్రీన్‌ సినిమాస్‌ ఎల్‌ఎల్‌పి పతాకంపై ప్రొడక్షన్ 1గా శాంతనూపతి, ఆలపాటి రాజా, అవినాష్ బుయాని, అంకిత్‌ రెడ్డి సంయుక్తంగా ప్రొడ్యూస్ చేస్తున్నారు. కార్తి దర్శకత్వం వహిస్తున్నారు. ప్రముఖ రచయిత సాయి మాధవ్ బుర్రా స్క్రిప్ట్‌ సూపర్ విజన్, డైలాగులతో రూపొందుతోంది. హైదరాబాద్ సారధి స్టూడియోలో ఆదివారం పూజా కార్యక్రమాలతో ఘనంగా సినిమా ప్రారంభమైంది.
అవినాష్ తిరువీధుల, సిమ్రాన్ చౌదరిపై చిత్రీకరించిన ముహూర్తపు సన్నివేశానికి ముఖ్య అతిథులుగా ప్రముఖ దర్శకుడు బాబీ గౌరవ దర్శకత్వం వహించగా... పీపుల్ మీడియా ఫ్యాక్టరీ అధినేత టీజీ విశ్వ ప్రసాద్‌ కెమెరా స్విచ్ఛాన్‌ చేశారు. హైదరాబాద్ సిటీ పోలీస్‌ కమీషనర్‌ శ్రీనివాస రెడ్డి క్లాప్‌ కొట్టారు.
నిర్మాతల్లో ఒకరైన శాంత నూపతి మాట్లాడుతూ... ''మంచి సినిమాలు ప్రేక్షకులకు అందించాలని అమెరికా నుంచి వచ్చాం. నాలుగేళ్లుగా కథలు వింటూ సినిమా ప్రొడ్యూస్ చేయాలని ట్రై చేస్తున్నాం. కరోనా వల్ల కొంత టైం వేస్ట్‌ కాగా... టోటల్ 30 కథలు విన్నాం. విశ్వజిత్‌ చెప్పిన స్టోరీ లైన్‌ నచ్చడంతో సినిమా స్టార్ట్ చేశాం. సాయి మాధవ్ బుర్రా గారు డైలాగ్స్‌ రాయడం మా మూవీకి మరింత ప్లస్‌'' అని అన్నారు. దర్శకుడు కార్తి మాట్లాడుతూ... ''ఇది నాకు తొలి సినిమా. మంచి కథ, నటీనటులు, సాంకేతిక నిపుణులు లభించారు. తొలి సినిమాకు టాప్‌ టెక్నీషియన్స్‌ కుదరడం నా అదృష్టం. ఈ రోజు నుంచి రెగ్యులర్‌ షూటింగ్‌ స్టార్ట్ చేస్తాం'' అని అన్నారు.
హీరో అవినాష్ తిరువీధుల మాట్లాడుతూ... ''నాకు సినిమా అంటే పిచ్చి. చదువుకు కేటాయించిన సమయం కంటే.... సినిమా థియేటర్లలో గడిపిన టైమ్ ఎక్కువ. ఈ సినిమా నిర్మాతలు నా క్లోజ్‌ ఫ్రెండ్స్‌. మంచి కథ కుదరడంతో పాటు టాప్‌ టెక్నీషియన్లతో సినిమా చేస్తుండటం మా యూనిట్‌ అదృష్టంగా భావిస్తున్నా. మంచి హిట్ సినిమా ప్రేక్షకులకు అందిస్తాం'' అని చెప్పారు.
హీరోయిన్‌ సిమ్రాన్ చౌదరి మాట్లాడుతూ... ''మంచి సినిమాలో నటించే అవకాశం నాకు ఇచ్చిన దర్శక, నిర్మాతలకు కృతజ్ఞతలు. నటనకు ఆస్కారం ఉన్న పాత్ర చేస్తున్నా'' అని తెలిపారు. తెలుగు రాష్ట్రాల్లో ఆరు జిల్లాలకు చెందిన 150 మందికి కథ చెప్పి, వాళ్ల ఫీడ్ బ్యాక్ తీసుకుని సినిమా స్టార్ట్ చేశామని రచయిత విశ్వజిత్‌ వివరించారు.
నిర్మాతలు అంబిక కృష్ణ, కెఎల్ దామోదర ప్రసాద్‌, తుమ్మలపల్లి రామ సత్యనారాయణ, తాండూర్‌ ఎమ్మెల్యే మనోహర్‌ రెడ్డి, ఎమ్మెల్సీ మహేష్‌ నాయుడు తదితరులు సినిమా ప్రారంభోత్సవానికి హాజరయ్యారు. అవినాష్, సిమ్రాన్ చౌదరి జంటగా నందు, శివాజీ రాజా, సత్య, హర్షవర్ధన్‌, టార్జాన్‌, హర్ష, భాషా, ఆమని, 'ఈటీవీ' ప్రభాకర్‌, సమ్మెట గాంధీ ఇతర కీలక పాత్రల్లో కనిపించనున్న ఈ సినిమాకు స్క్రిప్ట్‌ సూపర్ విజన్ - డైలాగ్స్‌: సాయి మాధవ్ బుర్రా, ఛాయాగ్రహణం: ఎ. విశ్వనాథ్‌, కథ - కథనం: విశ్వజిత్‌ పూరేటి, సంగీతం: వివేక్‌ సాగర్‌, కూర్పు: చోటా కె. ప్రసాద్‌, నిర్మాతలు: శాంత నూపతి - ఆలపాటి రాజా - అవినాష్ బుయాని - అంకిత్‌ రెడ్డి, దర్శకత్వం: కార్తీ.