YSR Sunna Vaddi: వరుసగా నాలుగో ఏడాది వైఎస్సార్ సున్నా వడ్డీ పథకాన్ని అమలు చేసేందుకు సీఎం జగన్ మోహన్ రెడ్డి ఏర్పాట్లు చేస్తున్నారు. రాష్ట్ర వ్యాప్తంగా అర్హత గల 9.48 లక్షల స్వయం సహాయక సంఘాల్లోని 1,05,13,365 మంది అక్కాచెల్లెల్లు బ్యాంకులకు చెల్లించి రూ.1,353.76 కోట్ల వడ్డీని రీయంబర్స్ చేస్తూ వారి బ్యాంకు ఖాతాల్లో జమ చేయనున్నారు. డాక్టర్ బీఆర్ అంబేడ్కర్ కోనసీమ జిల్లా అమలాపురంలో సీఎం జగన్ బటన్ నొక్కి మరీ నగదు జమ చేయనున్నారు. ఈ రూ.1,353.76 కోట్లతో కలిపి వైఎస్సార్ సున్నా వడ్డీ పథకం కింద ఇప్పటి వరకు అందించిన మొత్తం సాయం రూ.4,969.05 కోట్లు అవుతుంది. పేద అక్కా, చెల్లెల్లకు సాధికారత కల్పిస్తూ.. వారు చేస్తున్న వ్యాపారాలకు ఊతం ఇచ్చేలా సున్నా వడ్డీకే రుణాలు అందించి, వారి జీవన ప్రమాణాలను ప్రభుత్వం మెరుగు పరుస్తున్న సంగతి అందరికీ తెలిసిందే.
సుస్థిరాభివృద్ధికి వైసీపీ సర్కారు బాటలు
ఈక్రమంలోనే బ్యాంకు రుణాలు సకాలంలో చెల్లించిన పొదుపు సంఘాల్లోని పేదింటి అక్కాచెల్లమ్మల మీద వడ్డీ భారం పడకుండా వారి తరఫున ఆ భారాన్ని వైఎస్సార్ సున్నా వడ్డీ కింద నేరుగా పొదుపు సంఘాల బ్యాంకు ఖాతాల్లో ప్రభుత్వం జమ చేస్తోంది. అక్కాచెల్లమ్మలు వారి కాళ్ల మీదు వారు నిలబడేలా.. జీవనోపాధి మెరుగు పడేలా బహుళ జాతి దిగ్గజ కంపెనీలు బ్యాంకులతో ఒప్పందాలు చేసుకుని వైఎస్సార్ చేయూత, వైఎస్సార్ కాపు నేస్తం, వైఎస్సార్ ఈబీసీ నేస్తం, వైఎస్సార్ ఆసరా, వైఎస్సార్ సున్నా వడ్డీ పథకాలతో సుస్థిర ఆర్థిక అభివృద్ధికి వైఎస్ జగన్ సర్కారు బాటలు వేసింది. ప్రభుత్వం చొరవ తీసుకొని బ్యాంకులతో మాట్లాడి వడ్డీ రేట్ల తగ్గించడంతో అక్కా చెల్లమ్మలపై రూ.1,244 కోట్ల మేర వడ్డీ భారం తగ్గింది. దీంతో ఏటా రూ.30 వేల కోట్లకు పైగా రుణాలు అందుకుని వ్యాపారాలు అభివృద్ధి చేసుకుంటూ రుణాల రికవరీలో 99.67 శాతంతో దేశంలోని ప్రథమ స్థానంలో నిలిచారు.
మొత్తం 16 లక్షల 44 వేల 29 మందికి నెలనెలా ఆదాయం
ప్రభుత్వ సాయంతో పశువుల కొనుగోలు, కిరాణా దుకాణాలు, వస్త్ర దుకాణాలు, కుట్టు మిషన్లు, వస్త్ర వ్యాపారాలు.. ఇలా అనేక రకాల పనులు చేసుకుంటూ వారి కాళ్ల మీద వారు నిలబడుతున్నారని తెలుస్తోంది. ఇలా మొత్తంగా 16,44,029 మంది అక్కచెల్లమ్మలకు నెలకు 7 వేల రూపాయల నుంచి 10 వేల రూపాయల వరకు అదనపు ఆదాయం వస్తోందని వైసీపీ అధికార ప్రతినిధులు చెబుతున్నారు. అమూల్ తో ఒప్పందం కారణంగా మార్కెట్ లో పోటీ పెరిగి లీటర్ పాలపై రూ.20 వరకు అదనపు ఆదాయం కూడా లభిస్తోందని అన్నారు.