Firing in America: అమెరికాలో కాల్పులు కొనసాగుతున్నాయి. వర్జీనియాలోని ఒక ప్రాథమిక పాఠశాలలో శుక్రవారం విద్యార్థి జరిపిన కాల్పుల్లో ఉపాధ్యాయుడికి గాయాలయ్యాయి. ఉపాధ్యాయుడిని వెంటనే ఆసుపత్రిలో చేరాడు. వర్జీనియాలోని న్యూపోర్ట్ సిటీలోని ఎలిమెంటరీ స్కూల్లో ఈ సంఘటన జరిగిందని పోలీసులు తెలిపారు. ఈ కాల్పుల్లో ఏ విద్యార్థి గాయపడలేదు.
ఈ కేసుకు సంబంధించి పోలీసులు ఒక విద్యార్థిని అదుపులోకి తీసుకున్నట్లు వర్జీనియా మేయర్ ఫిలిప్ జోన్స్ మీడియాకు తెలిపారు. విద్యార్థి వయస్సు ఎంత అనేది అధికారులు చెప్పనప్పటికీ, మీడియా నివేదికలు విద్యార్థి వయస్సు 6 సంవత్సరాలు అని పేర్కొన్నాయి. మధ్యాహ్నం 2 గంటల సమయంలో కాల్పుల గురించి తమకు కాల్ వచ్చిందని న్యూపోర్ట్ పోలీస్ చీఫ్ స్టీవ్ డ్రూ తెలిపారు. సమాచారం అందుకున్న వెంటనే, తమ టీం అక్కడికి చేరుకుందన్నారు.
నిందితుడి సమాచారం ఇవ్వని పోలీసులు
విద్యార్థులు, కుటుంబాలను కలిసేందుకు అనుమతి ఇవ్వలేదు. వారి యోగక్షేమాలపై కన్నవారు ఆందోళన చెందుతున్నారు. ప్రస్తుతం పోలీసులు అనుమానితుడి గురించి ఎటువంటి సమాచారం ఇవ్వడం లేదు. కాల్పులు జరిగిన న్యూపోర్ట్ సిటీలో 185,000 కంటే ఎక్కువ జనాభా ఉంది. ఈ పట్టణం చెసాపీక్, వర్జీనియా బీచ్ నుంచి 40 మైళ్ళ దూరంలో ఉంది. ఈ నగరం యు.ఎస్ నావికాదళానికి నౌకానిర్మాణానికి కూడా ప్రసిద్ది చెందింది.
పెరుగుతున్న షూటింగ్ ఘటనలు
అమెరికాలో కాల్పుల ఘటనలు కొత్తేమీ కాదు. ఇక్కడ ఇలాంటి కేసులు నిరంతరం పెరుగుతున్నాయి. గత సంవత్సరం అంటే 2022లో ఇలాంటి కాల్పుల్లో వందలాది మంది మరణించారు. ఆస్పత్రులు, పబ్బులు, మెట్రో స్టేషన్లు, ఇతర బహిరంగ ప్రదేశాల్లో ఈ కాల్పుల సంఘటనలు జరిగాయి. స్వయంగా అమెరికా అధ్యక్షుడే ఆయుధాల నియంత్రణపై మాట్లాడేంత సీరియస్‌ మేటర్‌ ఇది.
రెండు రోజుల క్రితం అమెరికాలో కాల్పుల కలకలం రేగింది. ఉటాహ్‌ రాష్ట్రంలో గన్ ఫైరింగ్‌లో 8 మంది ప్రాణాలు కోల్పోయారు. వీరిలో 5గురు చిన్నారులే. ఓ ఇంట్లో జరిగిన కాల్పుల్లో వీరంతా అక్కడికక్కడే మృతి చెందారు. దీనిపై ప్రస్తుతానికి అధికారులు పూర్తి స్థాయి సమాచారం ఇవ్వలేదు. 8 వేల మంది నివసించే ఓ చిన్న టౌన్‌లో ఈ ఘటన జరిగినట్టు వెల్లడించారు. ఫలితంగా...స్థానికులు భయంతో వణికిపోతున్నారు. ఎవరు ఈ పని చేశారు..? ఎందుకు చేశారు..? అన్న అంశాలపై విచారణ కొనసాగుతోంది.
త్వరలోనే నిందితుడుని పట్టుకుంటామని పోలీసులు స్పష్టం చేశారు. "నేను వెళ్లే చర్చ్‌కు వాళ్లూ వస్తారు. నాకు ఆ కుటుంబం అంతా పరిచయమే. వాళ్లకు ఇలా జరగడం షాకింగ్‌గా ఉంది. ఇరుగు పొరుగు వాళ్లతో ఎంతో ప్రేమగా ఉండేవాళ్లు" అని స్థానికుడు చెప్పాడు. 2023 మొదలై ఐదు రోజులు అవుతోంది. మొదటి మూడు రోజుల్లోనే అమెరికాలో గన్ ఫైరింగ్‌తో చనిపోయిన వారి సంఖ్య పెరిగిపోయింది. కేవలం ఈ మూడు రోజుల్లో 130 మంది చనిపోగా...300 మంది గాయపడ్డారు. కొందరు అనుకోకుండా చనిపోతే.. మరి కొందరు హత్యకు గురయ్యారని స్థానిక సంస్థ వెల్లడించింది. క్రిస్‌మస్‌ వేడుకల ముందు కూడా ఓ మాల్‌లో భారీగా కాల్పులు జరిగాయి.