Engineering Marvel Chaina Railway Station:  ఇంజనీరింగ్ అద్భుతాలకు పెట్టింది పేరు చైనా. తాజాగా నైరుతి చైనాలో రూ. 65 వేల కోట్ల  వ్యయంతో నిర్మించిన  చోంగ్‌కింగ్ ఈస్ట్ స్టేషన్  ప్రపంచాన్ని ఆశ్చర్యానికి గురి చేస్తోంది. ఒక భారీ పర్వత శిఖరంపై, అత్యంత కష్టతరమైన భౌగోళిక పరిస్థితుల్లో  1.22 మిలియన్ చదరపు మీటర్ల  విస్తీర్ణంలో దీనిని నిర్మించారు. కేవలం 38 నెలల రికార్డు సమయంలో 40,000 మంది కార్మికులు రాత్రింబవళ్లు శ్రమించి ఈ మెగా ప్రాజెక్టును పూర్తి చేయడం చైనా నిర్మాణ వేగానికి నిదర్శనంగా నిలుస్తోంది.

Continues below advertisement

 నేలపై నిర్మించి.. ఆకాశంలోకి ఎక్కించి! 

ఈ స్టేషన్ నిర్మాణంలో అత్యంత క్లిష్టమైన ఘట్టం దాని భారీ స్టీల్ రూఫ్ అమరిక. సుమారు  16,500 టన్నుల బరువున్న  స్టీల్ ట్యూబ్ ట్రస్ రూఫ్‌ను ముందుగా నేలపైనే అసెంబుల్ చేశారు. అనంతరం హైడ్రాలిక్ లిఫ్టింగ్ టెక్నాలజీని ఉపయోగించి, 57 మీటర్ల ఎత్తుకు చాలా జాగ్రత్తగా స్లైడింగ్ చేస్తూ అమర్చారు. ఇంతటి భారీ బరువును భూమికి 50 మీటర్ల పైకి చేర్చడం ఆధునిక ఇంజనీరింగ్ చరిత్రలోనే ఒక గొప్ప ప్రయోగంగా నిలిచింది. పర్వత వాలుపై 57 మీటర్ల ఎత్తులో స్టెయిన్‌లెస్ స్టీల్ క్లాడింగ్ ఇన్‌స్టాలేషన్ చేయడం మరో సాహసోపేతమైన ప్రక్రియ. ఈ వీడియోను ఎలాన్ మాస్క్ పంచుకోవడంతో వైరల్ గా మారింది.    

Continues below advertisement

 భూకంపాలను తట్టుకునే  హువాంగ్జీ స్తంభాలు 

చోంగ్‌కింగ్ నగర చిహ్నమైన హువాంగ్జీ వృక్షం ఆకారంలో ఈ స్టేషన్ పిల్లర్లను రూపొందించారు.  41 మీటర్ల ఎత్తు  ఉండే ఈ బ్రాంచింగ్ స్టీల్ స్ట్రక్చర్స్ కేవలం అందం కోసమే కాదు, భారీ భూకంపాలను సైతం తట్టుకునేలా అత్యంత దృఢంగా నిర్మించబడ్డాయి. చెట్టు కొమ్మల్లా విస్తరించి ఉండే ఈ స్తంభాలు స్టేషన్ లోపలి భాగంలో సహజమైన వెలుతురు వచ్చేలా, పైకప్పు బరువును సమానంగా పంపిణీ చేసేలా డిజైన్ చేశారు. 

ప్రపంచంలోనే అతిపెద్ద రైల్వే హబ్ 

విస్తీర్ణం పరంగా చూస్తే, చోంగ్‌కింగ్ ఈస్ట్ స్టేషన్ ప్రస్తుతం ప్రపంచంలోనే అతిపెద్ద రైల్వే హబ్‌గా రికార్డు సృష్టించింది. ఇది కేవలం రైల్వే స్టేషన్ మాత్రమే కాదు, బహుళ రవాణా వ్యవస్థల   సంగమం. నైరుతి చైనాను దేశంలోని మిగిలిన ప్రాంతాలతో అనుసంధానిస్తూ, ఏకకాలంలో వేల మంది ప్రయాణికులకు సేవలు అందించేలా దీని సామర్థ్యాన్ని పెంచారు. పర్వత ప్రాంతంలో ఇంతటి భారీ నిర్మాణం చేపట్టడం ద్వారా చైనా తన పారిశ్రామిక శక్తిని మరోసారి చాటిచెప్పింది.

 14 నగరాలకు హై-స్పీడ్ కనెక్టివిటీ 

ఈ స్టేషన్ అందుబాటులోకి రావడంతో చైనాలోని 14 ప్రధాన నగరాలకు హై-స్పీడ్ రైలు ప్రయాణం సులభతరం కానుంది. చైనా తన హై-స్పీడ్ రైల్ నెట్‌వర్క్‌ను మరింత విస్తృతం చేస్తూ, మారుమూల పర్వత ప్రాంతాలను సైతం మెట్రో నగరాలతో వేగంగా అనుసంధానిస్తోంది. ఆర్థికాభివృద్ధిని వేగవంతం చేయడంలో ఈ ప్రాజెక్టు కీలక పాత్ర పోషించనుంది. ఇంజనీరింగ్ నైపుణ్యం, ఆధునిక సాంకేతికత కలిస్తే పర్వతాల పైన కూడా అద్భుతాలు సృష్టించవచ్చని చోంగ్‌కింగ్ ఈస్ట్ స్టేషన్ నిరూపించింది.