తెలంగాణ నుంచి రాయలసీమ మీదుగా దక్షిణ తమిళనాడు వరకు ఉపరితల ద్రోణి ఏర్పడిందని వాతావరణ శాఖ వెల్లడించింది. ఇది సముద్ర మట్టం నుంచి 0.9 కిలోమీటర్ల నుంచి 1.5 కిలోమీటర్ల ఎత్తు వరకు కొనసాగుతున్నట్లు వివరించింది. తూర్పు మధ్య బంగాళాఖాతంలో ఏర్పడిన ఉపరితల ఆవర్తనం.. వాయువ్య పరిసర పశ్చిమ బంగాళాఖాతంలో కొనసాగుతోందని చెప్పింది. ఇది ఆదివారం (నేడు) ఒడిశా తీరానికి చేరుకునే అవకాశం ఉందని తెలిపింది. దీని ఫలితంగా నేడు, రేపు తెలుగు రాష్ట్రాల్లో పలు ప్రాంతాల్లో ఉరుములు, మెరుపులతో కూడిన మోస్తరు నుంచి భారీ వర్షాలు కురిసే అవకాశం ఉందని పేర్కొంది.
ఏపీలో మరో మూడు రోజులు
వాయువ్య బంగాళాఖాతం, దానిని ఆనుకుని ఉన్న పశ్చిమ బంగాళాఖాతంలలో ఉపరితల ఆవర్తనం ఏర్పడిందని అమరావతి వాతావరణ కేంద్రం వెల్లడించింది. ఇది సముద్ర మట్టానికి సగటున 1.5 కిలోమీటర్ల నుంచి 5.8 కిలోమీటర్ల ఎత్తు మధ్య కొనసాగుతోందని తెలిపింది. ఎత్తుకు చేరే కొలదీ నైరుతి దిశ వైపునకు తిరిగి ఉన్నట్లు వివరించింది. ఇది రాబోయే 12 గంటల్లో ఒడిశా తీరం వైపు ప్రయాణించే అవకాశం ఉందని తెలిపింది. ఫలితంగా ఏపీలో రానున్న మూడు రోజుల వరకు పలు చోట్ల తెలికపాటి నుంచి మోస్తరు వర్షాలు కురిసే అవకాశం ఉందని పేర్కొంది.
నేడు (ఆదివారం), రేపు ఉత్తర కోస్తాంధ్రాలో పలు ప్రాంతాల్లో తేలికపాటి నుంచి ఒక మోస్తరు వర్షాలు కురిసే అవకాశం ఉందని చెప్పింది. దక్షిణ కోస్తాంధ్రాలో నేడు ఒకటి రెండు చోట్ల తేలికపాటి నుంచి మోస్తరు వర్షాలు.. రేపు (సోమవారం) ఉరుములు, మెరుపులతో కూడిన వర్షాలు కరిసే అవకాశం ఉందని వివరించింది. రాయలసీమలో కూడా మరో రెండు రోజుల పాటు తేలికపాటి నుంచి మోస్తరు వర్షాలు కురుస్తాయని చెప్పింది. విశాఖ పట్నం, తూర్పు గోదావరి, పశ్చిమ గోదావరి, విజయనగరం, శ్రీకాకుళం జిల్లాల వారు అప్రమత్తంగా ఉండాలని సూచించింది.
తెలంగాణలో భారీ వర్షాలు..
తెలంగాణలో ఇవాళ (సెప్టెంబర్ 19) పలు ప్రాంతాల్లో ఉరుములు, మెరుపులతో కూడిన వర్షాలు కురిసే అవకాశాలు ఉన్నాయని వాతావరణ శాఖ వెల్లడించింది. రేపు (సోమవారం) ఒకటి రెండు ప్రదేశాలలో ఉరుములు, మెరుపులతో కూడిన తేలికపాటి నుంచి మోస్తరు వర్షాలు కురిసే అవకాశాలు ఉన్నాయని తెలిపింది. రేపు, ఎల్లుండి (మంగళవారం) రాష్ట్రంలోని కొన్ని జిల్లాల్లో భారీ వర్షాలు కూడా కురిసే అవకాశాలు ఉన్నాయని వాతావరణ శాఖ అధికారులు పేర్కోన్నారు.