Viral Video:
నోయిడాలో..
నోయిడాలో యజమానులు, పని మనుషుల మధ్య గొడవలు చాలా కామన్ అయిపోయాయి. ఏదో ఓ కారణంతో...పని మనుషులపై దాడి చేస్తున్నారు యజమానులు. ఇప్పటికే పలు అపార్ట్‌మెంట్‌లలో ఇలాంటి ఘటనలు వెలుగులోకి వచ్చాయి. ఇప్పుడు మరోసారి ఇలాంటి ఘటనే మరోటి వైరల్ అవుతోంది. లిఫ్ట్‌లో నుంచి పని మనిషిని బలవంతంగా బయటకు లాగుతూ ఓ మహిళ దారుణంగా ప్రవర్తించింది. లిఫ్ట్‌లో ఉన్న సీసీ కెమెరాలో ఇదంతా రికార్డ్ అయింది. ట్విటర్‌లో ఈ వీడియో పోస్ట్ చేయగా...వైరల్ అయింది. మెడను గట్టిగా పట్టుకుని చేతులను కట్టేసి బయటకు లాగిన విజువల్స్ రికార్డ్ అయ్యాయి. నోయిడాలోని క్లియో కౌంటీ సొసైటీలో సెక్టార్ 121లో జరిగిందీ ఘటన. బాధితురాలి తండ్రి ఫిర్యాదు మేరకు ఈ ఘటన వెలుగులోకి వచ్చింది. ఈ మేరకు నిందితురాలు షెఫాలీ కౌల్‌పై పోలీసులు కేసు నమోదు చేశారు. నిందితురాలిపై కఠిన చర్యలు తీసుకుంటామని స్పష్టం చేశారు. బాధితురాలు చెప్పిన వివరాల ప్రకారం...షెఫాలీ కౌల్ రోజూ చిత్ర హింసలకు గురి చేస్తోంది. ఇంట్లోనే కట్టేసి దారుణంగా కొడుతున్నట్టు బాధితురాలు ఆవేదన వ్యక్తం చేసింది. ఈ వీడియోపై నెటిజన్లు సీరియస్‌గా రియాక్ట్ అవుతున్నారు. "ఇలాంటి వాళ్లను అలా వదిలేయకూడదు. కఠినంగా శిక్షించాలి" అని కామెంట్ చేస్తున్నారు. "ఎంత దారుణం. ఇలాంటి వాళ్లను చట్ట పరంగా శిక్షించాలి. మనుషుల్ని ట్రీట్ చేసే విధానం ఇది కాదు" అని మరో నెటిజన్ కామెంట్ చేశాడు. "కేవలం నెలకు రూ.2-5 వేల జీతం ఇచ్చి బానిసలుగా చూస్తుంటారు" అని మరొకరు ఆగ్రహం వ్యక్తం చేశారు. దీనిపై మహిళా కమిషన్ తప్పకుండా స్పందించాలని డిమాండ్ చేస్తున్నారు.