Tamilnadu VCK: తమిళనాడు రాజకీయం ప్రస్తుతం విడుతలై చిరుతైగల్ కట్చి అధినేత తోల్ తిరుమావళవన్ చుట్టూ తిరుగుతోంది. నటుడు విజయ్ నేతృత్వంలోని తమిళగ వెట్రి కళగం పార్టీతో పొత్తు విషయమై తిరుమావళవన్ అనుసరిస్తున్న వ్యూహాలు ఇప్పుడు రాష్ట్ర రాజకీయాల్లో హాట్ టాపిక్ గా మారాయి. విజయ్కు మద్దతు ఇచ్చే విషయంలో ఆయన ఇప్పటికీ స్పష్టత ఇవ్వకపోవడమే కాకుండా, తెర వెనుక భారీ షరతులు విధిస్తున్నారరు. దీంతో విజయ్ రాజకీయ ప్రయాణానికి ఆరంభంలోనే గట్టి సవాళ్లు ఎదురవుతున్నాయి.
పొత్తులో భాగంగా వీసీకే అధినేత అత్యంత కీలకమైన డిప్యూటీ సీఎం పదవిని కోరుతున్నట్లు సమాచారం. కేవలం సీట్ల సర్దుబాటుతో సరిపెట్టుకోకుండా, అధికారంలో సమాన వాటా ఉండాలని ఆయన పట్టుబడుతున్నారు. దశాబ్దాలుగా ద్రావిడ పార్టీల నీడలో ఉన్నా దక్కని గౌరవం, విజయ్ పార్టీ ద్వారా సాధించుకోవాలనేది ఆయన ఆలోచనగా కనిపిస్తోంది. ఒకవేళ పొత్తు కుదిరితే ప్రభుత్వంలో వీసీకేకు కీలక ప్రాతినిధ్యం ఉండాలనే షరతుపై ఆయన వెనక్కి తగ్గడం లేదని చెబుతున్నారు.
మరోవైపు నియోజకవర్గాల విషయంలోనూ తిరుమావళవన్ పట్టు విడవడం లేదు. ముఖ్యంగా తిరుచ్చి ఈస్ట్ అసెంబ్లీ స్థానాన్ని తన పార్టీకి కేటాయించాలని ఆయన డిమాండ్ చేస్తున్నట్లు తెలుస్తోంది. ఆ స్థానం నుంచి విజయ్ గెలిచారు. రాజీనామా చేస్తున్నారు. ఆ స్థానాన్ని పొందడం ద్వారా అసెంబ్లీలో తన పార్టీ బలాన్ని పెంచుకోవాలని ఆయన యోచిస్తున్నారు. కేవలం రెండు సీట్లు ఉన్న పార్టీకీ ఉప ముఖ్యమంత్రి వంటి కీలక పదవులపై హామీ ఇవ్వడం వల్ల భవిష్యత్తులో ఇబ్బందులు వస్తాయని విజయ్ సన్నిహితులు భావిస్తున్నారు. సీఎం పదవి కోసం.. విజయ్ రాజీపడ్డారన్నప్రచారంజరుగుతోంది.
మొత్తానికి తమిళనాడు రాజకీయాల్లో సీనియర్ నేత తిరుమావళవన్ తన అనుభవంతో యువ నేత విజయ్కు ముచ్చెమటలు పట్టిస్తున్నారు. అటు డీఎంకే, ఇటు టీవీకేల మధ్య దోబూచులాడుతూ తన పార్టీ ప్రయోజనాలే పరమావధిగా ఆయన వ్యవహరిస్తున్నారు. ఇవాళ ఆయన తన మద్దతు ఎవరికో ప్రకటించే అవకాశం ఉంది. విజయ్ తన డిమాండ్లకు అంగీకరిస్తే ఆయన మద్దతు లేఖ గవర్నర్ కు ఇస్తారు. లేకపోతే.. ఆయన నిర్ణయాన్ని వాయిదా వేసుకునే అవకాశం ఉంది.