Cyclonic Michaung live updates: బాపట్ల తీరాన్ని దాటిన మిగ్ జాం తుపాను - గంటకు 90 నుంచి 120 కి.మీ వేగంతో ఈదురు గాలులు

Cyclonic Michaung live updates: మిగ్‌జాం తుపానుకు సంబంధించిన లైవ్‌ అప్‌డేట్స్‌ కోసం ఇక్కడ క్లిక్ చేయండి.

Background

పశ్చిమ మధ్య బంగాళాఖాతం ఏర్పడిన తుపాను నెమ్మదిగా తీరంవైపునకు దూసుకొస్తోంది. దక్షిణ ఆంధ్ర ప్రదేశ్ - ఉత్తర తమిళనాడు తీరాల మీదుగా ఏర్పడిన తీవ్ర తుపాను మిగ్‌జాం గంటలకు 7 కిలోమీటర్ల వేగంతో పయనిస్తోంది. ఇది ఉత్తర వాయువ్య దిశగా కదిలి నెల్లూరుకు ఉత్తర-ఈశాన్యంగా 20 కి.మీ, చెన్నైకి ఉత్తరాన 170 కి.మీ, బాపట్లకు దక్షిణాన 150 కి.మీ, మచిలీపట్నానికి నైరుతి దిశలో 210 కి.మీ దూరంలో కేంద్రీకృతమై ఉంది. ఈ తుపాను ఉత్తరం వైపు సమాంతరంగా దక్షిణ ఆంధ్రప్రదేశ్ తీరానికి దగ్గరగా కదులుతోంది. ఈ తెల్లవారు జామున బాపట్లకు దగ్గరగా నెల్లూరు, మచిలీపట్నం మధ్య తీరం దాటే అవకాశం ఉంది. ఏపీలోలో 'మిగ్ జాం' (Michaung Cyclone) తీవ్ర తుపానుగా బలపడింది. ఈ ప్రభావంతో తిరుపతి (Tirupathi), నెల్లూరు (Nellore), ఉభయ గోదావరి, ప్రకాశం (Prakasam), కాకినాడ (Kakinada) జిల్లాల్లో భారీ వర్షాలు బీభత్సం సృష్టిస్తున్నాయి. తీర ప్రాంతాల్లో సముద్రం అల్లకల్లోలంగా ఉంది. తుపాను తీరం దాటే సమయంలో ప్రజలు అప్రమత్తంగా ఉండాలని వాతావరణ శాఖ అధికారులు హెచ్చరిస్తున్నారు. ఈ క్రమంలో సీఎం జగన్ తుపాను సహాయక చర్యలపై అధికారులతో సమీక్షించారు. ప్రభావిత ప్రాంతాల కలెక్టర్లతో వీడియో కాన్ఫరెన్స్ నిర్వహించారు. ఎక్కడా ప్రాణ నష్టం లేకుండా చూడాలని, లోతట్టు ప్రాంతాల ప్రజలను సురక్షిత ప్రాంతాలకు తరలించాలని ఆదేశించారు. యుద్ధ ప్రాతిపదికన అత్యవసర పనుల కోసం జిల్లాకు రూ.2 కోట్లు విడుదల చేయనున్నట్లు చెప్పారు. యుద్ధ ప్రాతిపదికన సహాయక చర్యలు కొనసాగించాలని, ఇందుకోసం ప్రభావిత జిల్లాలకు ప్రత్యేక అధికారులను నియమించారు.వారికి రూ.10 వేల సాయంతుపాను కారణంగా వర్షాలకు ఇళ్లు, గుడిసెలు దెబ్బతింటే వారికి రూ.10 వేల ఆర్థిక సాయం అందించాలని సీఎం జగన్ నిర్ణయించారు. సహాయక శిబిరాల్లో ప్రజలకు సౌకర్యాలు ఏర్పాటు చేయాలని, మందులు, మంచినీరు, ఆహారం అందుబాటులో ఉంచాలని సూచించారు. ప్రతి ఒక్కరికీ రూ.1,000 లేదా కుటుంబానికి రూ.2,500 ఇవ్వాలని ఆదేశించారు. శిబిరాలకు రాకుండా ఇళ్లలోకి నీళ్లు చేరిన వారికి 25 కేజీల బియ్యం, కందిపప్పు, పామాయిల్, ఉల్లిపాయలు, బంగాళదుంపలు కిలో చొప్పున ఇవ్వాలని అన్నారు. అలాగే భారీ వర్షాలతో రైతులకు ఎలాంటి నష్టం కలగకుండా అండగా నిలబడాలని అధికారులకు నిర్దేశించారు. పంట కోయని చోట్ల అలాగే ఉంచాలని, ఇప్పటికే కోసినట్లయితే ధాన్యాన్ని యుద్ధ ప్రాతిపదికన కొనుగోలు చేయాలని స్పష్టం చేశారు. కాగా, ఇప్పటివరకూ 6.5 లక్షల టన్నుల ధాన్యాన్ని భద్రపరిచినట్లు అధికారులు సీఎంకు వివరించారు. తుపాను తగ్గిన తర్వాత పంట నష్టం అంచనాలు రూపొందించి పరిహారం ఇవ్వాలని చెప్పారు.హెల్ప్ లైన్ నెంబర్లివేమరోవైపు, గుంటూరు, బాపట్ల జిల్లాల కలెక్టరేట్లలో తుపాను సహాయక చర్యలపై అధికారులు కంట్రోల్ రూమ్స్ ఏర్పాటు చేశారు. గుంటూరు - 0863 2234014, బాపట్ల - 8712655881, ఒంగోలు - 08592 280306, తెనాలి - 08644 227600, కాకినాడ - 0884 2374227, గూడూరు - 08624 250795, ఏలూరు - 08812 232267, భీమవరం - 08816 230098, నెల్లూరు 0861 2345863, విజయవాడ -0866 2571244 నెంబర్లకు ప్రజలు కాల్ చెయ్యాలని అధికారులు సూచించారు.'ప్రభావిత ప్రాంతాల్లో పర్యటిస్తా'మిగ్ జాం తుపాను ప్రభావం తగ్గిన తర్వాత వరద ప్రభావిత ప్రాంతాల్లో పర్యటించనున్నట్లు సీఎం జగన్ తెలిపారు. సహాయక చర్యల కోసం ఎస్డీఆర్ఎఫ్, ఎన్డీఆర్ఎఫ్ సేవలను వినియోగించుకోవాలని అధికారులకు సూచించారు. వాలంటీర్లు, గ్రామ వార్డు సచివాలయం వ్యవస్థను వినియోగించుకోవాలన్నారు. శిబిరాల్లో బాధితులకు ఎలాంటి ఇబ్బంది లేకుండా చర్యలు చేపట్టాలని సూచించారు. 

05/12/2023 16:25:33

బాపట్ల తీరాన్ని దాటిన మిగ్ జాం తుపాను - గంటకు 90 నుంచి 120 కి.మీ వేగంతో ఈదురు గాలులు

బాపట్ల వద్ద మిగ్ జాం తుపాను తీరం దాటింది. ఈ క్రమంలో తీరం వెంబడి గంటకు 90 నుంచి 120 కి.మీ వేగంతో ఈదురు గాలులు వీస్తున్నాయి. మరో 2 గంటల్లో తీవ్ర తుపాను అల్ప పీడనంగా బలహీన పడనుంది. తుపాను తీరం దాటినా, ప్రజలు అప్రమత్తంగా ఉండాలని అధికారులు సూచించారు.

05/12/2023 16:21:33

కాకినాడ, తిరుపతి వెళ్లే ప్రయాణికులకు గుడ్ న్యూస్

మిగ్‌జాం తుపాను కారణంగా రద్దు చేసిన ట్రైన్స్‌ను కొన్నింటిని పునరుద్దరించినట్టు దక్షిణ మధ్య రైల్వే ప్రకటించింది. 12710 నెంబర్‌తో సికింద్రాబాద్ గూడూరు మధ్య నడిచే ట్రైన్ పునరుద్ధించింది. 12733 నెంబర్‌తో నడిచే తిరుపతి లింగపల్లి మధ్య నడిచే ట్రైన్ ప్రారంభంకానుంది. 12764 నెంబర్‌తో సికింద్రాబాద్‌ తిరుపతి మధ్య నడిచే ట్రైన్ యధావిథిగా నడవనుంది. 17210 నెంబర్‌తో కాకినాడ టౌన్‌ ఎస్‌ఎంవీటీ బెంగళూరు మధ్య నడిచే ట్రైన్‌ను కూడా పునరుద్ధరించారు. 

05/12/2023 16:16:51

మిగ్ జాం ఎఫెక్ట్ - తెలంగాణ జిల్లాలకు రెడ్ అలర్ట్

మిగ్ జాం తుపాను ప్రభావంతో తెలంగాణలో మంగళ, బుధవారాల్లో రాష్ట్రంలోని ములుగు, భద్రాద్రి, ఖమ్మం జిల్లాల్లో ఉరుములు, మెరుపులతో కూడిన భారీ  నుంచి అతి భారీ వర్షాలు కురిసే అవకాశం ఉందని వాతావరణ శాఖ అధికారులు తెలిపారు. ఈ మేరకు ఆయా జిల్లాలకు రెడ్ అలర్ట్ జారీ చేశారు.

05/12/2023 13:21:41

బాపట్ల సమీపంలో తీరం దాటనున్న మిగ్ జాం తుపాను - 9,500 మంది సురక్షిత ప్రాంతాలకు తరలింపు

మిగ్ జాం తుపాను మరికాసేపట్లో బాపట్ల సమీపంలో తీరం దాటనుంది. ప్రస్తుతానికి ఒంగోలుకు 25 కి.మీ, బాపట్లకు 60 కి.మీ, మచిలీపట్నానికి 130 కి.మీ దూరంలో కేంద్రీకృతమై ఉన్నట్లు అధికారులు తెలిపారు. తుపాను తీరం దాటే సమయంలో గంటకు 90 నుంచి 110 కి.మీ వేగంతో బలమైన ఈదురు గాలులు వీస్తాయని చెప్పారు. ఆ సమయంలో వర్ష తీవ్రత మరింత పెరిగే అవకాశం ఉందని వెల్లడించారు. ప్రజలు అప్రమత్తంగా ఉండాలని సూచించారు. మరోవైపు, ఇప్పటివరకూ 211 సహాయక శిబిరాల్లో 9,500 మందిని సురక్షిత ప్రాంతాలకు తరలించినట్లు ఏపీ అధికారులు తెలిపారు.

05/12/2023 12:07:01

చెన్నై అతలాకుతలం - 8 మంది మృతి, సహాయక చర్యలు ముమ్మరం

మిగ్ జాం తుపాను ప్రభావంతో చెన్నై మహా నగరం అతలాకుతలమవుతోంది. వర్షాల వల్ల ఇప్పటివరకూ 8 మంది మృతి చెందారు. ప్రస్తుతం వర్షాలు కాస్త తెరిపినివ్వడంతో అధికారులు సహాయక చర్యలు ముమ్మరం చేశారు. అటు సీఎం స్టాలిన్ వరద ప్రభావిత ప్రాంతాల్లో పర్యటిస్తూ, సహాయక చర్యలను పర్యవేక్షిస్తున్నారు. తమిళనాడు ఉత్తర తీర ప్రాంతం, పుదుచ్చేరిల్లో ఓ మోస్తరు వర్షాలు కురుస్తున్నట్లు అధికారులు తెలిపారు.

05/12/2023 12:06:18

అప్రమత్తంగా ఉన్నాం: భూమన

తుపాను ప్రభావంతో గత నాలుగు రోజులుగా కురుస్తున్న భారీ వర్షం కారణంగా శేషాచలం అటవీ ప్రాంతంలోని వరద నీరు మాల్వాడిగుండం ద్వారా కపిలతీర్ధానికి చేరుకుని అక్కడి నుండి వరదనీరు నేరుగా తిరుపతిలోని లోతట్టు ప్రాంతాలకు చేరుకుందని, దీంతో నివాసాల్లోకి  వరదనీరు చేరుకుంది. వరద బాధితులకు ప్రభుత్వం ద్వారా ముమ్మరంగా సహాయక చర్యలు చేపడుతున్నామని ఎమ్మెల్యే భూమన తెలిపారు పరిహారాన్ని అందిస్తామని, ఇప్పటి వరకూ 200‌ మందిని సురక్షిత ప్రాంతాలకు తరలించినట్టు పేర్కొన్నారు. వర్షాల కారణంగా కొన్ని ప్రాంతాలు జలమయంగా మారాయ్యాయని, కొన్ని ఇళ్లలోకి వరద నీరు.. బాధితులకు సహాయక చర్యలు చేపడుతున్నట్టు తెలిపారు. అధికారలమంతా అప్రమత్తంగా ఉంటూ ఎప్పటికప్పుడు ప్రత్యామ్నాయ చర్యలు చేపడుతున్నట్లు చెప్పారు.

05/12/2023 12:04:29

వరద ప్రభావిత ప్రాంతాలను పరిశీలించిన తిరుపతి ఎమ్మెల్యే భుమన కరుణాకర్ రెడ్డి

తుపాను ప్రభావంతో ఇబ్బందులు ఎదుర్కొంటున్న వరద బాధితులను తిరుపతి‌ ఎమ్మెల్యే భూమన కరుణాకర్ రెడ్డి పరామర్శించారు.. పూలవానిగుంటి, గొల్లవానిగుంట వరద భాధితులకు అవసరంమైన ఏర్పాట్లను చేపట్టారు.. లోతట్టు ప్రాంతాల ప్రజలంతా అప్రమత్తంగా ఉండాలని, ఏ అవసరమొచ్చిన తక్షణమే తమ దృష్టికి తీసుకురావాలని సూచించారు.. పునరావాస కేంద్రాలకు తరలించిన వారితో పాటు అవసరమైన ప్రాంత ప్రజలకు పునరావాస కేంద్రాలకు రాలేని పరిస్థితి ఉన్నా సరే అలాంటి వారికి  ఫుడ్‌ అందజేయాలని తహశీల్దార్ వెంకట రమణకు ఆదేశించారు.

05/12/2023 12:03:24

మిగ్ జాం ఎఫెక్ట్ - ఏపీ వ్యాప్తంగా భారీ వర్షాలు

మిగ్ జాం తుపాను కారణంగా ఏపీ వ్యాప్తంగా భారీ వర్షాలు కురుస్తున్నాయి. చిత్తూరు, నెల్లూరు, ప్రకాశం, గుంటూరు, బాపట్ల, కృష్ణా జిల్లాలో అతి భారీ వర్షాలు కురుస్తున్నాయి. మరో 24 గంటల పాటు కోస్తాంధ్ర, రాయలసీమ జిల్లాలకు వర్ష సూచనలు ఉన్నాయి.