ఎంపీలు కూడా జంప్ అవుతారా..?
మహారాష్ట్రలో శివసేన పార్టీకి చెందిన 50 మంది ఎమ్మెల్యేలు ఏక్‌నాథ్ శిందే వైపు వెళ్లిపోవటం, ఆ తరవాత మారిన పరిణామాలతో శిందే సీఎం అవటం చకచకా జరిగిపోయాయి. అయితే ఇప్పుడు అందరి దృష్టి శివసేన ఎంపీలపైనా పడింది. దాదాపు 18 మంది శివసేన ఎంపీల్లో కొందరు ఏక్‌నాథ్ శిందే వైపు వచ్చే అవకాశాలున్నాయని అంచనా వేస్తున్నారు. ఓ శివసేన ఎంపీ చేసిన వ్యాఖ్యలు ఇందుకు బలాన్ని చేకూర్చు తున్నాయి. ఎన్‌డీఏ రాష్ట్రపతి అభ్యర్థి ద్రౌపది ముర్ముకి మద్దతు ఇవ్వాలని ఉద్దవ్ ఠాక్రేకు వినతి పంపారు ఆ ఎంపీ. ఇది కాస్తా పెద్ద చర్చకే దారి తీసింది. అంతే కాదు. ఏ రెబల్ ఎమ్మెల్యే చేసిన కామెంట్స్ కూడా శిందే తదుపరి లక్ష్యం ఏమిటో చెప్పకనే చెబుతున్నాయి. శివసేనకు చెందిన 18 మంది ఎంపీల్లో కనీసం 12 మంది సీఎం శిందే వైపు వచ్చేందుకు ఆసక్తి చూపుతున్నారని, రెబల్ ఎమ్మెల్యే గులాబ్‌రావ్ పాటిల్ అన్నారు. నలుగురు ఎంపీలను నేరుగా కలిసి ఈ విషయమై చర్చించాననీ చెప్పారు. 22 మంది మాజీ ఎమ్మెల్యేలూ కూడా తమతో టచ్‌లో ఉన్నారని వెల్లడించారు.
ఎన్‌డీఏ రాష్ట్రపతి అభ్యర్థికి మద్దతునివ్వండి..
శివసేన ఎంపీ రాహుల్ శెవాలే ఉద్దవ్ ఠాక్రేకు లేఖ రాశారు. గిరిజన మూలాలున్న నేత ద్రౌపది ముర్ముకి మద్దతుగా నిలవాలని కోరారు. బాలాసాహెబ్ ఠాక్రే సిద్ధాంతాలకు అనుగుణంగా నడుచుకోవాలని సూచించారు. పార్టీలకు అతీతంగా ఆయన యూపీఏ రాష్ట్రపతి అభ్యర్థులైన ప్రతిభా పాటిల్, ప్రణబ్ ముఖర్జీకి మద్దతునిచ్చారని గుర్తు చేశారు. అయితే వీరికి ఎన్నికల భయం పట్టుకోవటం వల్లే ఎన్‌డీఏకి పరోక్షంగా మద్దతు పలుకుతున్నారని అంటున్నారు రాజకీయ విశ్లేషకులు. స్థానికంగా ఎమ్మెల్యేల మద్దతు లేకుండా రానున్న ఎన్నికల్లో గెలవటం అసాధ్యం. అందుకే రాష్ట్రపతి అభ్యర్థికి మద్దతు ఇచ్చి, కాస్తో కూస్తో తమ విజయావకాశాలను పెంచుకోవాలని చూస్తున్నారన్న విశ్లేషణలున్నాయి.
శివసేన వీరినైనా కాపాడుకుంటుందా..?
నిజానికి 2019లో ఎన్నికల బరిలోకి దిగినప్పుడు శివసేన-భాజపా కూటమిగా ఉంది. అప్పుడు ప్రధాని నరేంద్ర మోదీ వేవ్ కారణంగా 48 సీట్లలో 18 స్థానాలు గెలుచుకుంది ఈ కూటమి. ఈ సారి భాజపాతో వైరం పెరగటం వల్ల ఆ కొన్ని స్థానాలు కూడా శివసేనకు రావటం కష్టమే అన్న వాదనలు వినిపిస్తున్నాయి. అటు ఎంపీలు కూడా అభద్రతా భావంతో ఉన్నారని తెలుస్తోంది. అందుకే ఎంత త్వరగా వీలైతే అంత త్వరగా శిందే శిబిరంలోకి వెళ్లిపోవాలని చూస్తున్నట్టు పుకార్లు వస్తున్నాయి. కానీ, ఈ విషయంలో స్పష్టత అయితే రాలేదు. కనీసం ఎంపీలనైనా శివసేన బుజ్జగించి కాపాడుకుంటుందా అన్నది చూడాల్సి ఉంది.