Viral News in Telugu: కార్‌లో వెళ్తుండగా ఉన్నట్టుండి రోడ్డు కుంగిపోతే..? ఒక్కసారిగా భారీ గోతిలో కార్ కూరుకుపోతే..? తలుచుకుంటేనే కాస్త భయం వేస్తోంది కదా. సౌత్ కొరియాలోని సియోల్‌లో ఇదే జరిగింది. ఇద్దరు వృద్ధులు SUV కార్‌లో ప్రయాణిస్తుండగా ఉన్నట్టుండి రోడ్డుపై భారీ గుంత ఏర్పడింది. అందులో కార్ కూరుకుపోయింది. ఈ ప్రమాదంలో ఇద్దరూ గాయపడ్డారు. వెంటనే ఇద్దరినీ హాస్పిటల్‌కి తరలించారు. అకస్మాత్తుగా రోడ్డుపై ఈ ప్రమాదం జరగడం వల్ల స్థానికంగా అలజడి రేగింది. మిగతా వాహనదారులూ ఆందోళన చెందారు. ఈ ప్రమాదానికి సంబంధించిన వీడియోలు, ఫొటోలు సోషల్ మీడియాలో వైరల్ అవుతున్నాయి. ఆ భారీ గోతిలో కార్ అమాంతం పడిపోయింది. అధికారులు వెంటనే అప్రమత్తమయ్యారు. కార్‌ని బయటకు తీసి బాధితులను హాస్పిటల్‌కి తరలించారు.
సౌత్ కొరియాలో ఇలాంటి ప్రమాదాలు తరచూ జరుగుతున్నాయి. 2019-23 మధ్య కాలంలోనే దాదాపు 879 ఘటనలు నమోదైనట్టు అక్కడి మీడియా వెల్లడించింది. అయితే..డ్రైనేజ్ పైప్‌లు పగిలిపోవడం వల్ల రోడ్లు ఇలా కుంగిపోతున్నాయన్న వాదనలు వినిపిస్తున్నాయి. ఇటీవల కౌలాలంపూర్‌లో భారత్‌కి చెందిన మహిళ ఇలానే ప్రమాదానికి గురైంది. ఫుట్‌పాత్‌పై నడుస్తూ ఉండగా ఒక్కసారిగా రోడ్డు కుంగిపోయింది. ఆమె భర్త, కొడుకు ఏదో విధంగా ప్రాణాలతో బయటపడినా ఆమె మాత్రం ఆ డ్రైనేజ్‌లో పడి కొట్టుకుపోయింది. ఆ తరవాత గాలింపు చర్యలు చేపట్టి ఆమె మృతదేహాన్ని కనుగొన్నారు.
Also Read: Viral Video: ఇంట్లోకి వచ్చిన 12 అడుగుల మొసలి, గజగజ వణికిపోయిన స్థానికులు - వీడియో