YouTuber Anurag Dwivedi Case: సిలిగురి అక్రమ ఆన్లైన్ బెట్టింగ్ కేసులో ఈడీ (ఎన్ఫోర్స్మెంట్ డైరెక్టరేట్) కీలక చర్యలు చేపట్టింది. ప్రముఖ యూట్యూబర్, సోషల్ మీడియా ఇన్ఫ్లుయెన్సర్ అయిన అనురాగ్ ద్వివేదిని విచారణ పరిధిలోకి తీసుకుంది. ఈ కేసులో భాగంగా, ఈడీ డిసెంబర్ 17, 2025న లక్నో, ఉన్నావ్లలో 9 చోట్ల సోదాలు నిర్వహించింది. ఈ దాడుల్లో పలు కీలక ఆధారాలు లభించాయి.
పశ్చిమ బెంగాల్ పోలీసులు నమోదు చేసిన ఎఫ్ఐఆర్ (FIR) ఆధారంగా ఈడీ ఈ విచారణను ప్రారంభించింది. ఎఫ్ఐఆర్లో మోసం, ఫోర్జరీ, అక్రమ బెట్టింగ్కు సంబంధించిన ఆరోపణలు ఉన్నాయి. విచారణలో, సిలిగురి కేంద్రంగా ఒక ఆన్లైన్ బెట్టింగ్ ప్యానెల్ నడుస్తున్నట్లు తేలింది. దీనిని సోనూ కుమార్ ఠాకూర్, విశాల్ భరద్వాజ్ వంటి నిందితులు నిర్వహిస్తున్నట్లు సమాచారం.
అక్రమ ఆన్లైన్ బెట్టింగ్ ప్లాట్ఫామ్లను ప్రచారం చేసిన అనురాగ్
ఈ వ్యక్తులు నకిలీ బ్యాంక్ ఖాతాలు, టెలిగ్రామ్ ఛానెల్స్, ఇతర డిజిటల్ ప్లాట్ఫామ్ల ద్వారా ఆన్లైన్ జూదం, బెట్టింగ్ను ప్రోత్సహిస్తున్నారు. ఈడీ విచారణలో, యూట్యూబర్ అనురాగ్ ద్వివేది ఈ అక్రమ ఆన్లైన్ బెట్టింగ్ ప్లాట్ఫామ్లను ప్రచారం చేయడంలో చురుకైన, కీలక పాత్ర పోషించినట్లు వెల్లడైంది. అనురాగ్ తన సోషల్ మీడియా ప్లాట్ఫామ్లలో ప్రచార వీడియోలను రూపొందించి, షేర్ చేశాడు. దీనికి ప్రతిఫలంగా అతనికి భారీ మొత్తంలో డబ్బు లభించింది. ఈ డబ్బు హవాలా నెట్వర్క్, నకిలీ ఖాతాలు, నగదు రూపంలో అతనికి చేరింది.
అనురాగ్ దుబాయ్లో ఆస్తి కొనుగోలు
విచారణ సంస్థ ప్రకారం, అనురాగ్ కంపెనీలు, అతని కుటుంబ సభ్యుల బ్యాంక్ ఖాతాల్లోకి పెద్ద మొత్తంలో డబ్బు వచ్చింది. దీనికి ఎలాంటి చట్టబద్ధమైన వ్యాపార ఆధారం లభించలేదు. అక్రమ బెట్టింగ్ ద్వారా సంపాదించిన డబ్బుతో అనురాగ్ ద్వివేది దుబాయ్లో రియల్ ఎస్టేట్ ఆస్తిని కొనుగోలు చేశాడని ఈడీ వాదిస్తోంది. ఈ పెట్టుబడి కూడా హవాలా మార్గాల ద్వారానే జరిగింది. విచారణలో, అనురాగ్ భారతదేశం విడిచి దుబాయ్లో నివసిస్తున్నట్లు కూడా తేలింది. ఈడీ అతనికి పలుమార్లు సమన్లు జారీ చేసినా, ఇప్పటివరకు విచారణకు హాజరు కాలేదు.
లంబోర్ఘిని, మెర్సిడెస్ సహా 4 వాహనాలు స్వాధీనం
డిసెంబర్ 17న జరిగిన సోదాల్లో, దుబాయ్లో చేసిన పెట్టుబడులు, హవాలా ద్వారా డబ్బు పంపినట్లు నిర్ధారించే పత్రాలు, డిజిటల్ ఆధారాలు ఈడీకి లభించాయి. ఇవన్నీ మనీ లాండరింగ్ను సూచిస్తున్నాయి. ఈడీ అనురాగ్ ద్వివేదికి చెందిన నాలుగు వాహనాలను స్వాధీనం చేసుకుంది. వీటిని నేర కార్యకలాపాల ద్వారా సంపాదించిన ఆస్తులుగా పరిగణిస్తున్నారు.
లంబోర్గిని ఉరుస్, మెర్సిడెస్, ఫోర్డ్ ఎండీవర్, మహీంద్రా థార్ వాహనాలను స్వాధీనం చేసుకున్నారు. ఈడీ ఇప్పుడు ఈ నెట్వర్క్లోని డబ్బు మూలాలు, హవాలా లింకులు, విదేశీ ఆస్తులపై లోతుగా విచారణ చేస్తోంది. ఈ అక్రమ బెట్టింగ్ రాకెట్తో ఇంకా ఎవరు సంబంధం కలిగి ఉన్నారో కూడా ఈ సంస్థ తెలుసుకుంటోంది.