Prophet Muhammad Row: 'ముందు మీ పని చూసుకోండి'- పాకిస్థాన్‌కు భారత్ కౌంటర్

Prophet Muhammad Row: మహ్మద్ ప్రవక్తపై వివాదాస్పద వ్యాఖ్యల అంశంలో పాకిస్థాన్ చేసిన ఆరోపణలపై భారత్ తీవ్రంగా స్పందించింది.

Prophet Muhammad Row: మహ్మద్ ప్రవక్తపై భాజపా నేతలు చేసిన వివాదాస్పద వ్యాఖ్యలపై అంతర్జాతీయంగా వ్యక్తమవుతోన్న విమర్శలను భారత్ తిప్పికొట్టింది. ఇస్లామిక్ సహకార సంస్థ(ఓఐసీ) చేసిన విమర్శలు అసమంజసంగా, సంకుచిత ధోరణితో ఉన్నాయని భారత విదేశాంగ శాఖ పేర్కొంది. 

ఇస్లామిక్ సహకార సంస్థ (ఓఐసీ) సెక్రటేరియట్ మరోసారి తప్పుదోవ పట్టించే వ్యాఖ్యలు చేసింది. ఇది చాలా విచారకరం. స్వార్థ ప్రయోజనాల వల్లే ఈ విభజనపూరిత అజెండాను ప్రదర్శిస్తున్నారని భారత్ భావిస్తోంది. ఓఐసీ సెక్రెటేరియట్​ మతపరమైన విధానాలను పక్కనబెట్టి, అన్ని విశ్వాసాలను గౌరవించాలి. మతపరమైన వ్యక్తులను కించపరుస్తూ కొందరు చేసిన వ్యాఖ్యలు వారి వ్యక్తిగతం. అవి భారత ప్రభుత్వ అభిప్రాయాలు కావు. ఆ వ్యక్తులపై సంబంధిత సంస్థ(భాజపా) ఇప్పటికే చర్యలు తీసుకుంది.                             -  -అరిందమ్ బాగ్చి, విదేశాంగ శాఖ ప్రతినిధి

భాజపా నేతలు చేసిన ఈ వివాదాస్పద వ్యాఖ్యలను ఖండిస్తూ సౌదీ అరేబియా, ఖతర్, ఇరాన్, కువైట్ దేశాలు ప్రకటనలు చేశాయి. సదరు వ్యక్తులపై భాజపా తీసుకున్న చర్యలను సౌదీ అరేబియా స్వాగతించింది. 

పాక్ కుటిల నీతి

మరోవైపు పాకిస్థాన్ ఈ వ్యవహారంపై నిరసన వ్యక్తం చేస్తూ భారత దౌత్యవేత్తకు సమన్లు జారీ చేయడంపై విదేశాంగ శాఖ మండిపడింది. ఎన్నో ఏళ్ల నుంచి మైనారిటీ హక్కులను కాలరాస్తున్న పాకిస్థాన్ మరో దేశంలోని మైనారిటీల వ్యవహారాలపై మాట్లాడటం హాస్యాస్పదంగా ఉందని విదేశాంగ శాఖ పేర్కొంది. 

పాకిస్థాన్ ముందుగా వారి దేశంలో శాంతి, భద్రతల పరిస్థితులపై, అక్కడి మైనారిటీల సంక్షేమంపై దృష్టిసారించాలని భారత విదేశాంగ శాఖ హితవు పలికింది.