Grok AI: కేంద్ర ప్రభుత్వం సోషల్ మీడియా ప్లాట్ఫారమ్ 'X'కి కఠినమైన నోటీసు పంపింది, Grok AI నుండి అశ్లీల కంటెంట్ను తొలగించాలని ఆదేశించింది. దీనితో పాటు, కంపెనీ 72 గంటల్లో నివేదిక పంపాలని ప్రభుత్వం కోరింది.
శుక్రవారం నాడు సమాచార సాంకేతిక మంత్రిత్వ శాఖ (MeitY) ఎలాన్ మస్క్ యాజమాన్యంలోని సోషల్ మీడియా ప్లాట్ఫామ్ X కి అధికారిక నోటీసు జారీ చేసింది. ఇన్ఫర్మేషన్ టెక్నాలజీ చట్టం, IT నియమాల ప్రకారం చట్టబద్ధమైన డ్యూ డిలిజెన్స్లో తీవ్రమైన లోపాలను గుర్తించింది. ప్లాట్ఫారమ్కు చెందిన AI సాధనం Grok దుర్వినియోగంపై పెరుగుతున్న ఆందోళనల మధ్య, ఈ సాధనం అశ్లీల, లైంగికంగా అసభ్యకరమైన, అవమానకరమైన కంటెంట్ను, ముఖ్యంగా మహిళలు, పిల్లలను లక్ష్యంగా చేసుకుని ఉత్పత్తి చేసిన సందర్భాలను మంత్రిత్వ శాఖ హైలైట్ చేసింది. అధికారులు దీనిని గౌరవం, గోప్యత, డిజిటల్ భద్రత తీవ్రమైన ఉల్లంఘనగా అభివర్ణించారు.
ప్రభుత్వం తక్షణ చర్య తీసుకోవాలని డిమాండ్ చేస్తోంది
MeitY X ని Grok సాంకేతిక, కార్యకలాపాలను వెంటనే సమీక్షించాలని, చట్టవిరుద్ధమైన కంటెంట్ను తొలగించాలని ఆదేశించారు. నేరపూరిత వినియోగదారులపై చర్య తీసుకోవాలని స్పష్టం చేశారు. 72 గంటల్లోపు యాక్షన్ టేకెన్ రిపోర్ట్ (ATR)ను సమర్పించాలని ఆదేశించింది. కేంద్ర మంత్రి అశ్విని వైష్ణవ్ నేతృత్వంలోని మంత్రిత్వ శాఖ, నిబంధనలను సరిగా పాటించకపోతే IT చట్టం కింద ప్లాట్ఫారమ్పై చర్యలు తప్పవని హెచ్చరించింది. చట్టపరమైన రక్షణను కోల్పోయే ప్రమాదం ఉందని పేర్కొంది. మల్టీ సైబర్, క్రిమినల్, పిల్లల రక్షణ చట్టాల కింద శిక్షార్హులని స్పష్టం చేసింది.
సోషల్ మీడియా జవాబుదారీతనం అవసరం
శుక్రవారం ప్రారంభంలో, సోషల్ మీడియా ప్లాట్ఫామ్లు తాము ప్రచురించే కంటెంట్కు బాధ్యత వహించాలని వైష్ణవ్ గట్టిగా చెప్పారు. ఆన్లైన్ ప్లాట్ఫామ్ల జవాబుదారీతనాన్ని నిర్ధారించడానికి స్టాండింగ్ కమిటీ ఇప్పటికే బలమైన చట్టాన్ని సిఫార్సు చేసిందని ఆయన అన్నారు. మహిళల అసభ్యకరమైన ఫోటోలను సృష్టించడానికి, వాటిని ఆన్లైన్లో పబ్లిష్, షేర్ చేయడానికి AI యాప్లను ఉపయోగించినట్లు తమ దృష్టికి వచ్చిందని తక్షణ ప్రభుత్వ జోక్యం కోరుతూ రాజ్యసభ ఎంపీ ప్రియాంక చతుర్వేది కూడా మంత్రికి లేఖ రాశారు. వేర్వేరు మార్గాల్లో వచ్చిన ఫిర్యాదులు, ఎంపీ ఫిర్యాదను పరిగణలోకి తీసుకున్న ప్రభుత్వం ఎక్స్కు నోటీసు జారీ చేసింది.
స్టాండింగ్ కమిటీ కఠినమైన చట్టాలను సిఫార్సు చేసింది
నకిలీ కంటెంట్, వార్తలు, దుష్ప్రచారానికి కేంద్రంగా మారుతున్న సోషల్ మీడియా, ప్లాట్ఫామ్లను జవాబుదారీగా ఉంచాలని పార్లమెంటరీ స్టాండింగ్ కమిటీ ప్రభుత్వాన్ని కోరింది. దుర్వినియోగాన్ని అరికట్టడానికి, సోషల్ మీడియా ప్లాట్ఫామ్లు అభ్యంతరకరమైన కంటెంట్కు బాధ్యత వహించేలా జోక్యం అవసరం అని కూడా స్పష్టం చేసినట్టు వైష్ణవ్ హైలైట్ చేశారు.