Gaza Fire Accident: భారీ అగ్ని ప్రమాదం- చిన్నారులు సహా 21 మంది సజీవదహనం

Gaza Fire Accident: పాలస్తీనాలోని గాజా నగరంలో ఘోర అగ్ని ప్రమాదం జరిగింది. ఈ ఘటనలో 21 మంది మృతి చెందారు.

Gaza Fire Accident: పాలస్తీనా గాజాలో ఘోర అగ్ని ప్రమాదం జరిగింది. ఈ ప్రమాదంలో 9 మంది చిన్నారులు సహా 21 మంది సజీవ దహనమయ్యారు. ఇంట్లో ఇంధనం నిల్వ చేయడంతో ప్రమాద తీవ్రత పెరిగినట్లు తెలుస్తోంది.

ఇదీ జరిగింది

గాజా స్ట్రిప్‌లోని ఓ ఇంట్లో ఒక్కసారిగా మంటలు చెలరేగడంతో ఈ ప్రమాదం జరిగింది. ఈ ఘటనలో 21 మంది సజీవ దహనమయ్యారు. వీరిలో తొమ్మిది మంది చిన్నారులు ఉన్నారు. గాజాలో అత్యధిక జనాభా కలిగిన జబాలియా శరణార్థుల క్యాంపు ప్రాంతంలో ఈ ప్రమాదం జరిగింది. అక్కడి నాలుగంతస్తుల ఇంట్లో మంటలు చెలరేగాయి. 

మొదట చివరి అంతస్తులో మంటలు అంటుకున్నాయని, క్రమంగా అవి భవనం మొత్తానికి వ్యాప్తి చెందాయని అధికారులు వెల్లడించారు.

అగ్నిప్రమాదానికి గల కారణాలు ఇంకా తెలియరాలేదు. మంటలను అదుపుచేయడానికి చాలా సమయం శ్రమించాల్సి వచ్చింది. క్షతగాత్రులను స్థానిక ఆసుపత్రికి తరలించాం. బిల్డింగ్‌లోని ఓ ఇంట్లో ఇంధనం నిల్వ చేయడంతో అగ్ని ప్రమాదం జరిగిందని అనుమానిస్తున్నాం. ఘటనపై దర్యాప్తు జరుగుతోంది.                                            -    అధికారులు

ఈ అగ్నిప్రమాదాన్ని జాతీయ విషాదంగా పాలస్తీనా అధ్యక్షుడు మహమూద్ అబ్బాస్ ప్రకటించారు. గాజాలోని ఎనిమిది శరణార్థుల క్యాంపుల్లో జబాలియా ఒక్కటి. ఇక్కడ 20 లక్షల 30 వేల మంది నివాసముంటున్నారు.