Viral News in Telugu: బెడ్‌రూమ్‌లోకి వెళ్లగానే ఓ పెద్ద పాము కనిపిస్తే..? ఒక్కసారిగా అది బుసలు కొడితే..? గుండె జారిపోతుంది కదా. కర్ణాటకలో ఓ కుటుంబానికి ఇలాంటి అనుభవమే ఎదురైంది. ఎప్పుడు ఎలా వచ్చిందో తెలియదు కానీ..ఓ కోబ్రా బెడ్‌రూమ్‌లో చుట్టుకుని పడుకుంది. కాసేపటికి మెల్లగా సబ్జపైకి ఎక్కి ఓ బాక్స్‌లోకి దూరింది. అక్కడి నుంచి ఇంచు కూడా కదలకుండా అలాగే పడుకుంది. ఇంట్లో వాళ్లంతా తెగ కంగారు పడిపోయారు. ఎలాగోలా బయటకు పంపేద్దామనుకున్నారు. కానీ...అది ఏకంగా 9 అడుగుల పొడవుంది. ఏం చేయాలో అర్థం కాక స్నేక్ రెస్క్యూ టీమ్‌కి కాల్ చేసి సమాచారం అందించారు.
Agumbe Rainforest Research Station కి చెందిన టీమ్ వెంటనే రంగంలోకి దిగింది. ఇంటికి వచ్చీ రాగానే అందరికీ కొన్ని సూచనలు చేసింది సిబ్బంది. పాముని పట్టుకునే సమయంలో ఎవరూ గుంపులు గుంపులుగా వచ్చి మీద పడొద్దని చెప్పింది. పాములను చంపొద్దని అవగాహన కల్పించింది. ఆ తరవాత పాముని రెస్క్యూ చేసేందుకు అంతా సిద్ధం చేసుకుంది. ఓ వ్యక్తి పాముని పట్టుకునే స్టిక్‌తో పై నుంచి కిందకు తీసుకొచ్చాడు. అక్కడే ఓ బ్యాగ్ ఏర్పాటు చేశాడు. అందులోకి పంపించేందుకు ప్రయత్నించాడు. కానీ..ఆ పాము అటూ ఇటూ వెళ్లింది. వెంటనే మళ్లీ దాన్ని పట్టుకుని బ్యాగ్‌లోకి పంపించాడు. అలా పాముని రక్షించి అడవిలో వదిలారు. సోషల్ మీడియాలో ఈ వీడియో వైరల్ అవుతోంది.