Simple Hacks to Stay Cool Without AC at Night : వేసవి మొదలైంది. పగలే కాదు.. రాత్రుళ్లు కూడా వేడి తీవ్రత ఎక్కువగా ఉంటుంది. ఈ సమయంలో ఉక్కపోత, చెమట, గాలి లేకపోవడం వంటివి నిద్రను దూరం చేస్తాయి. అందుకే చాలామంది వేసవిలో ఏసీని వినియోగిస్తూ ఉంటారు. కానీ కొందరికి ఏసీ అందుబాటులో ఉండకపోవచ్చు. అలాంటివారికి ఇలాంటి వాతావరణంలో నిద్ర అనేది అందని ద్రాక్షగా మారుతుంది. వేడి వల్ల నిద్ర పట్టదు. అయితే ఏసీ లేకున్నా కొన్ని టిప్స్ ఫాలో అవ్వడం వల్ల సమ్మర్లో కూల్గా నిద్రపోవచ్చు. వాటిని ఫాలో అయితే వేడి ఎక్కువగా ఉన్నప్పుడు కూడా హాయిగా డీప్ స్లీప్ వేయొచ్చు. ఆ చిట్కాలు ఏంటంటే..
గదిని చల్లగా ఉంచేందుకు..
రాత్రుళ్లు రూమ్ చల్లగా ఉండాలంటే.. పగలే కొన్ని జాగ్రత్తలు తీసుకోవాలి. డే టైమ్లో గదిలోకి ఎక్కువ వేడి రాకుండా కర్టెన్లు మూసి ఉంచాలి. అలాగే రాత్రి గాలి కాస్త చల్లగా మారిన తర్వాత కిటికీలు తెరిస్తే గది కూల్ అవుతుంది.
పడుకునే ముందు స్నానం
రాత్రి నిద్రకు ముందు.. గోరువెచ్చని లేదా కొద్దిగా చల్లని నీటితో స్నానం చేయాలి. ఇలా చేయడం వల్ల శరీర ఉష్ణోగ్రత తగ్గి నిద్ర సులభంగా పడుతుంది.
బెడ్షీట్ ఎంపిక
సమ్మర్లో బెడ్ షీట్గా కొన్ని రకాలు ఎంచుకోకూడదు. సిల్క్ కలిసిన బెడ్షీట్స్ మరింత వేడిని పెంచుతాయి. కాబట్టి కాటన్ బెడ్షీట్లు, లైట్ కలర్స్ ఉపయోగిస్తే మంచిది. ఇవి వేడిని తగ్గిస్తాయి.
నీరు తాగండి
డీహైడ్రేషన్ పెరిగితే శరీరంలో వేడి పెరుగుతుంది. కాబట్టి పడుకునే ముందు కొంచెం నీరు తాగడం వల్ల కూల్గా ఉంటుంది. మరి ఎక్కువ తాగితే వాష్ రూమ్ కోసం లేవాల్సి వస్తుంది.
ఫ్యాన్ వేసుకున్నప్పుడు..
రాత్రుళ్లు ఫ్యాన్ వేసుకున్నప్పుడు.. ఒక బౌల్లో ఐస్ క్యూబ్స్ లేదా చల్లని నీరు పెట్టండి. దీనివల్ల గాలి మరింత చల్లగా అనిపిస్తుంది. వేడి తగ్గుతుంది. మంచి నిద్ర మీ సొంతమవుతుంది.
దుస్తులు విషయంలో..
రాత్రుళ్లు టైట్గా, డార్క్ కలర్ డ్రెస్లు వేసుకోకపోవడం మంచిది. లూజ్గా, కాటన్ బట్టలు వేసుకుంటే చెమట తగ్గి కంఫర్ట్గా ఉంటుంది.
రిలాక్స్ అవ్వండి
మొబైల్, ల్యాప్టాప్లను పక్కన పెట్టి.. కొద్దిసేపు రిలాక్స్ అవ్వండి. ఇది మెదడును ప్రశాంతంగా ఉంచి నిద్రకు సహాయపడుతుంది. ఒత్తిడి తగ్గి.. శరీరంలో వేడి అదుపులో ఉంటుంది. దీనివల్ల మెరుగైన నిద్ర మీ సొంతమవుతుంది.
కూలింగ్ డ్రింక్స్
కూలింగ్ డ్రింక్స్ అంటే చాలామంది కూల్ డ్రింక్స్ అనుకుంటారు. అస్సలు కాదు. శరీరంలో వేడిని తగ్గించే మజ్జిగ, కొబ్బరి నీళ్లు వంటి కూలింగ్ డ్రింక్స్ తీసుకుంటే శరీరంలో వేడిని తగ్గిస్తాయి.
వెంటిలేషన్
క్రాస్ వెంటిలేషన్ ఉండేలా తలుపులు, కిటికీలు ఓపెన్ చేయండి. దీనివల్ల వేడి గాలి లోపలే ఉండకుండా ఫ్రెష్ గాలి లోపలికి వస్తుంది.
కాళ్లు కడుక్కోవాలి..
పడుకునే ముందు కాళ్లను చల్లని నీటితో కడిగితే శరీరం మొత్తం కూల్ అవుతుంది. దీనివల్ల వేడి తగ్గి.. హాయిగా నిద్ర పట్టవచ్చు.
మొత్తానికి ఏసీ లేకపోయినా ఈ చిన్న చిన్న టిప్స్ ఫాలో అయితే వేసవిలో కూడా హాయిగా నిద్రపోవచ్చు. మంచి నిద్ర ఆరోగ్యానికి చాలా ముఖ్యం కాబట్టి ఈ అలవాట్లను మీ డైలీ రూటీన్లో చేర్చుకోండి.