Precautions for Contact Lenses : కంఫర్ట్​గా ఉంటుందని, వివిధ కారణాలతో చాలామంది లెన్స్​లు ఉపయోగిస్తారు. ముఖ్యంగా కళ్లజోడు వాడడం ఇష్టం లేనివారు, గ్లామర్ ఇండస్ట్రీలో ఉండేవారు వీటిని ఎక్కువగా వినియోగిస్తారు. అయితే మీకు తెలుసా? లెన్స్​లు వాడేప్పుడు సరైన జాగ్రత్తలు తీసుకోకపోతే కంటిచూపు కోల్పోయే ప్రమాదం ఉందట. అందుకే కొన్ని తప్పులు అస్సలు చేయకూడదని చెప్తున్నారు. ఇంతకీ అవి ఏంటి? లెన్సులు వాడేప్పుడు ఎలాంటి జాగ్రత్తలు తీసుకోవాలో చూసేద్దాం. 

లెన్స్​లు ఏ కారణంతో వినియోగించిన సరైన పద్ధతుల్లో ఉపయోగించకపోతే కంటి ఇన్​ఫెక్షన్లు వస్తాయి. కళ్లు పొడిబారడం లేదా దృష్టి కోల్పోవడం జరుగుతుంది. కాబట్టి లెన్స్ ఉపయోగించేప్పుడు కచ్చితంగా తీసుకోవాల్సిన జాగ్రత్తలు, చిట్కాలు తెలుసుకుందాం. 

చేతులు కడుక్కోవాల్సిందే.. 

కాంటాక్ట్ లెన్స్​లు పెట్టుకునేప్పుడు ముందుగా చేతులను శుభ్రంగా కడుక్కోవాలి. చేతులు కడుక్కునేందుకు మాయిశ్చరైజర్​ని ఇచ్చే సబ్బులు, లోషన్లు ఉపయోగించకపోవడమే మంచిది. అలాగే చేతులు శుభ్రంగా ఆరిన తర్వాత లెన్సులను పట్టుకోవాలి. 

శుభ్రత 

లెన్స్​లను శుభ్రం చేసేందుకు వైద్యులు సూచించిన లెన్స్ క్లీనింగ్ సొల్యూషన్ మాత్రమే ఉపయోగించాలి. లెన్స్​లను శుభ్రం చేయడానికి నీరు, ఉమ్మి, లేదా ఇంట్లో తయారు చేసిన ఇతర సొల్యూషన్​లను ఉపయోగించకూడదు. వైద్యులు సూచించిన సొల్యూషన్​తో రెగ్యులర్​గా వాటిని క్లీన్ చేసుకోవాలి. అలాగే ఎయిర్ డ్రై చేయాలి. 

నిద్రపోకూడదు.. 

లెన్స్ పెట్టుకున్నప్పుడు ఎట్టి పరిస్థితుల్లోనూ పడుకోకూడదు. లెన్స్ పెట్టుకుని పడుకుంటే కంటి ఇన్​ఫెక్షన్ల ప్రమాదం ఎక్కువ అవుతుంది. కంటికి ఆక్సిజన్ అందడం తగ్గిపోతుంది. ఎక్స్​టెండ్ చేసిన లెన్స్​లు వైద్యులు సూచిస్తే.. అప్పుడు మాత్రమే పడుకోవచ్చు. లేదంటే లెన్స్​లు పెట్టుకుని పడుకోకూడదట. 

ఆ సమయంలో వద్దు 

స్విమ్మింగ్ చేసేప్పుడు, స్నానం చేసేప్పుడు లెన్స్​ని ఉపయోగించకూడదు. లేదంటే కంటికి హానీ చేసే మైక్రోబ్స్ లోపలికి వెళ్లిపోతాయి. 

ఐ మేకప్

లెన్స్ పెట్టుకోకముందు ఐ మేకప్ అప్లై చేయకూడదు. లెన్స్ పెట్టుకున్న తర్వాతే మేకప్ వేసుకోవాలి. అలాగే మేకప్ తీసేసే ముందే చేతులు శుభ్రం చేసుకుని లెన్స్​లు తీసేయాలి. 

షేర్ చేసుకోకూడదు

షేరింగ్ ఈజ్ కేరింగ్ కానీ.. కాంటాక్ట్ లెన్స్​ని మాత్రం షేర్ చేసుకోకూడదు. ఎందుకంటే ఇవి పర్సనల్. షేర్ చేసుకోవడం వల్ల బ్యాక్టీరియా, వైరస్ ఈజీగా ట్రాన్స్​ఫర్ అవుతుంది. 

రిప్లెస్​మెంట్

లెన్స్​లను వైద్యులు ఎన్నిరోజులు ఉపయోగించమంటే అప్పటివరకు మాత్రమే వాటిని ఉపయోగించాలి. తర్వాత వాటిని కచ్చితంగా రిప్లేస్ చేయాలి. మీరు వాడే లెన్స్​లు బట్టి రోజుకు లేదా వారానికి లేదా నెలకు మార్చాల్సి ఉంటుంది. ఎక్స్​పైరీ తర్వాత కూడా వినియోగిస్తే కంటిచూపు దెబ్బతింటుంది. 

కంటిలో దురద, పొడిబారడం, ఎర్రగా మారడం, కళ్లు కనిపించకపోవడం, నొప్పి వంటి లక్షణాలు గుర్తించినప్పుడు వెంటనే లెన్స్ తీసేసి వైద్య సహాయం తీసుకోవాలి. లెన్స్ కేస్​ని నెల నుంచి మూడు నెలలకోసారి మార్చాలి. రెగ్యులర్​గా చెకప్స్ చేయించుకోవాలి. దీనివల్ల కంటి ఆరోగ్యానికి ఎలాంటి ఇబ్బంది కలగకుండా ఉంటుంది.

గమనిక: పలు అధ్యయనాలు, పరిశోధనలు, హెల్త్ జర్నల్స్ నుంచి సేకరించిన సమాచారాన్ని మీ అవగాహన కోసం ఇక్కడ యథావిధిగా అందించాం. ఈ సమాచారం వైద్యానికి లేదా చికిత్సకు ప్రత్యామ్నాయం కాదు. ఆరోగ్యానికి సంబంధించి.. ఎలాంటి సందేహాలున్నా మీరు తప్పకుండా డాక్టర్‌ను సంప్రదించాలి. ఈ ఆర్టికల్‌లో పేర్కొన్న అంశాలకు ‘ఏబీపీ దేశం’, ‘ఏబీపీ నెట్‌వర్క్’ ఎటువంటి బాధ్యత వహించవని గమనించగలరు.