Rainy Season Laundry Tips : వర్షాకాలంలో వచ్చే ప్రధాన సమస్యల్లో బట్టలు ఆరకపోవడం కూడా ఒకటి. చినుకులు పడటం, సూర్యరశ్మి తక్కువగా ఉండటం, గాలిలో తేమ ఎక్కువగా ఉండటం వల్ల బట్టలు ఉతికి ఆరేసినా.. అవి గంటల తరబడి తడిగానే ఉంటాయి. దీంతో దుర్వాసన రావడం, ఫంగస్ పెరగడం, బ్యాక్టీరియా వృద్ధి చెందడం వంటి సమస్యలు ఎదురవుతాయి. మీరు ఇలాంటి ఇబ్బందిని ఎదుర్కొంటుంటే.. కొన్ని సింపుల్ చిట్కాలు (Best Ways to Dry Clothes Quickly During Monsoon) ఫాలో అవ్వడం మరచిపోకండి. ఎందుకంటే వాటివల్ల వర్షాకాలంలో కూడా బట్టలు త్వరగా ఆరి.. దుర్వాసన లేకుండా తాజాగా ఉంటాయి. ఆ టిప్స్ ఏంటంటే..
అదనపు నీటిని తొలగించడం..
బట్టలు ఉతికిన వెంటనే వీలైనంత వరకు అదనపు నీటిని తొలగించాలి. వాషింగ్ మెషిన్లో మీరు బట్టలు ఉతికితే.. స్పిన్ మోడ్ను మరోసారి ఉపయోగించాలి. దీనివల్ల దుస్తుల్లోని మిగిలిన నీరు తగ్గుతుంది. ఒకవేళ చేతితో ఉతికితే బట్టలను మెల్లగా, పూర్తిగా పిండాలి. బాగా గట్టిగా పిండితే కొన్ని రకాల బట్టలు దెబ్బతినే అవకాశం ఉంటుంది.
Also Read : పొట్ట (Belly Fat), బరువును తగ్గించడంలో హెల్ప్ చేసే 7 రకాల జ్యూస్లు ఇవే.. ఆరోగ్యానికి కూడా చాలా మంచివి
దూరంగా ఆరేయండి..
బట్టలు ఒకదానికొకటి అతుక్కునేలా ఆరేయకూడదు. వాటి మధ్య కొంత ఖాళీ ఉంటే గాలి అన్ని వైపులా తగిలి త్వరగా ఆరే అవకాశం ఉంటుంది. అలాగే మందంగా ఉండే జీన్స్, తువ్వాళ్లు, దుప్పట్లు వంటివి ఆరడానికి ఎక్కువ సమయం తీసుకుంటాయి. కాబట్టి వీటిని పలుచటి బట్టలతో కలపకుండా విడిగా ఆరేయడం మంచిది.
గాలి వచ్చే ప్రదేశంలో
వర్షాకాలంలో ఎండలేకపోయినా.. వెలుతురు, గాలి బాగా వచ్చే ప్రదేశంలో దుస్తులు ఆరేయాలి. బాల్కనీ, కిటికీ దగ్గర లేదా వెంటిలేషన్ ఉన్న ప్రదేశంలో బట్టలు ఆరేస్తే..గాలి ప్రవాహం పెరిగి బట్టల్లోని తేమ తగ్గుతుంది.
ఇంట్లో ఆరేస్తే..
బయట ఎక్కడా ఖాళీ లేదు అనుకున్నప్పుడు చాలామంది అత్యవసర పరిస్థితుల్లో ఇంట్లోనే వాటిని ఆరేసుకుంటారు. అలా చేస్తే.. సీలింగ్ ఫ్యాన్ లేదా టేబుల్ ఫ్యాన్ ఆన్ చేసి బట్టల వైపు గాలి వచ్చేలా ఉంచండి. ఇది ఆరే సమయాన్ని తగ్గించడంలో సహాయపడుతుంది. డ్రై మోడ్లో ఏసీని ఆన్ చేసి కూడా ఆరేసుకోవచ్చు.
Also Read : మహిళల్లో థైరాయిడ్ సమస్యలు మగవారికంటే ఎక్కువ రావడానికి కారణాలేంటి? ఈ లక్షణాలను నిర్లక్ష్యం చేయకండి
త్వరగా ఆరాలంటే ఫాలో అవ్వాల్సిన మరిన్ని చిట్కాలు..
బట్టలు త్వరగా ఆరాలనుకుంటే కేవలం ఒకవైపే కాకుండా.. లోపలి వైపు కాసేపు, బయట వైపు కాసేపు తిప్పుతూ ఆరేస్తే రెండు వైపులా గాలి చేరి త్వరగా ఆరుతాయి. అలాగే బట్టల నుంచి దుర్వాసన రాకుండా ఉండాలంటే.. ఉతికిన తర్వాత బట్టలను బకెట్లో లేదా వాషింగ్ మెషిన్లో ఎక్కువసేపు అలాగే ఉంచకండి. అలా చేస్తే దుర్వాసనతో పాటు బ్యాక్టీరియా పెరిగే అవకాశం ఉంటుంది. అలాగే బట్టలు పూర్తిగా ఆరిన తర్వాతే వాటిని మడత పెట్టండి. ఒకేసారి ఎక్కువ బట్టలు కాకుండా.. తక్కువగా ఉన్నప్పుడే ఉతికేసుకుంటే మంచిది.