Heavy Menstrual Bleeding : పీరియడ్స్ సమయంలో కొందరికి రక్తస్రావంగ నార్మల్గానే ఉంటుంది. కానీ కొందరికి మాత్రం చాలా ఎక్కువగా బ్లీడింగ్ అవుతుంది. దీంతో రోజులో ఎక్కువసార్లు ప్యాడ్స్ మార్చుకోవాల్సి వస్తుంది. రక్తస్రావం ఎక్కువకావడం వల్ల బలహీనంగా అనిపించడం, తల తిరగడం వంటి లక్షణాలు కనిపిస్తాయి. అయితే ఇలా పీరియడ్స్లో ఎక్కువ రక్తస్రావం (Heavy Bleeding) నార్మలేనా? దీనికి కారణాలు ఏంటి? ఇలాంటి పరిస్థితుల్లో ఎలాంటి ఫుడ్స్ తీసుకోవాలో చూసేద్దాం.
బ్లీడింగ్ ఎక్కువ కావడమంటే..
బ్లీడింగ్ ఎక్కువ అవుతుందని ఎలా గుర్తించాలో తెలుసా? 1 లేదా 2 గంటలకోసారి ప్యాడ్ పూర్తిగా నిండిపోవడం నుంచి పీరియడ్స్ 7 రోజుల కంటే ఎక్కువ కొనసాగడం అధిక రక్తస్రావానికి గుర్తు. అలాగే పెద్ద పెద్ద బ్లడ్ క్లాట్స్ రావడం, తీవ్రమైన అలసట, ఊపిరి పీల్చుకోవడంలో ఇబ్బంది ఉంటుంది. ఇలాంటి లక్షణాలు ఉంటే అది నార్మల్ కాదని వైద్యులు చెప్తున్నారు.
పీరియడ్స్లో ఎక్కువ బ్లీడింగ్కు కారణాలు
బ్లీడింగ్ ఎక్కువ అవ్వడానికి వివిధ కారణాలు ఉంటాయి. ఈస్ట్రోజన్, ప్రొజెస్టెరాన్ హార్మోన్లు సరిగా బ్యాలెన్స్ కాకపోతే గర్భాశయ లైనింగ్ ఎక్కువగా పెరిగి అధిక రక్తస్రావం జరుగుతుంది. అలాగే ఐరన్ డెఫీషియన్సీ ఉన్న మహిళలకు బ్లీడింగ్ ఎక్కువగా ఉండే అవకాశం ఉంది. థైరాయిడ్ సరిగా పనిచేయకపోతే మెన్స్ట్రువల్ సైకిల్ దెబ్బతిని బ్లీడింగ్ పెరుగుతుంది. మానసిక ఒత్తిడి, నిద్ర లేకపోవడం వంటివి కూడా పీరియడ్స్ను ప్రభావితం చేస్తాయి. PCOS, గర్భాశయ సమస్యల వల్ల కూడా హెవీ బ్లీడింగ్ రావచ్చు.
బ్లీడింగ్ ఎక్కువ అవుతున్నప్పుడు ఎలాంటి ఫుడ్స్ తీసుకోవాలి?
బ్లీడింగ్ ఎక్కువ అవుతుంది కాబట్టి శరీరంలో ఓపిక నశిస్తుంది. అందుకే ఈ సమయంలో సరైన ఆహారం తీసుకోవడం చాలా ముఖ్యమని చెప్తున్నారు నిపుణులు. పాలకూర, మెంతికూర వంటి ఐరన్ పుష్కలంగా ఉండే ఫుడ్స్ తీసుకోవాలి. బీట్రూట్, ఖర్జూరం, ఎండుద్రాక్ష, బెల్లం వంటివి బెస్ట్ ఐరన్ సోర్స్గా చెప్పవచ్చు.
ఓపిక కోసం..
ఎనర్జీ రావాలంటే ప్రోటీన్ ఫుడ్స్ డైట్లో తీసుకోవాలి. గుడ్లు, పప్పులు, శెనగలు, వేరుశెనగ తీసుకోవాలి. విటమిన్ సి ఫుడ్స్ తీసుకుంటే ఐరన్ శోషణకు హెల్ప్ చేస్తుంది. కాబట్టి నారింజ, నిమ్మకాయ, ఉసిరికాయ వంటివి తీసుకోవచ్చు. అలాగే గోరువెచ్చని నీరు తాగితే క్రాంప్స్, నొప్పి నుంచి ఉపశమనం ఉంటుంది. మజ్జిగ, కొబ్బరి నీరు కూడా మంచి ప్రయోజనాలు ఇస్తాయి.
ఏవి తినకూడదు?
పీరియడ్స్ సమయంలో క్రేవింగ్స్ ఎక్కువగా ఉంటాయి. అయితే అలాంటప్పుడు తెలియకుండా జంక్ ఫుడ్ తినేస్తారు. కానీ ఇది పరిస్థితిని ఇంకా దారుణంగా చేస్తుంది. కాబట్టి జంక్ ఫుడ్కి దూరంగా ఉండాలి. అలాగే కాఫీ, టీలు ఎక్కువగా తీసుకోకూడదు. హెర్బల్ డ్రింక్స్ తీసుకోవచ్చు. ఉప్పు, మసాలా ఆహారం తగ్గించాలి.
డాక్టర్ దగ్గరకు వెళ్లాలా?
ఏదొక నెలలో హెవీ బ్లీడింగ్ ఉంటే పర్లేదు. లైఫ్ స్టైల్ రీసెట్ చేసుకుంటే తగ్గే అవకాశాలు ఉంటాయి. కానీ ప్రతి నెలా హెవీ బ్లీడింగ్ ఉండడం, తల తిరగడం, శ్వాస తీసుకోవడంలో ఇబ్బంది, బాగా బలహీనంగా అనిపిస్తే వెంటనే గైనకాలజిస్ట్ను సంప్రదిస్తే మంచిది. సరైన ఆహారం, విశ్రాంతితో పాటు వైద్య సలహా తీసుకోవడం చాలా అవసరమని గుర్తించాలి.
గమనిక : ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.