Vitamin A: విటమిన్ A లోపిస్తే ఎంత ప్రమాదమో తెలుసా? ఈ లక్షణాలు కనిపిస్తే జాగ్రత్త

శరీరానికి అత్యవసరమైన విటమిన్ A. ఇది లోపిస్తే కొన్ని రకాల లక్షణాలు కనిపిస్తాయి.

శరీరానికి అత్యవసరమైన పోషకాల్లో విటమిన్ A ఒకటి. ప్రధాన అవయవాలకు విటమిన్ A చాలా ముఖ్యమైనది. ఇది లోపిస్తే శరీర ఆరోగ్యం కుంటుపడుతుంది. విటమిన్ A లోపిస్తే కంటి నుండి చర్మం వరకు అనేక అనారోగ్య సమస్యలు వస్తాయి. ప్రపంచ ఆరోగ్య సంస్థ చెబుతున్న ప్రకారం విటమిన్ A లోపం వల్ల బాల్యంలో అంటువ్యాధులు సోకి మరణాలు సంభవించే అవకాశం ఉంది. అందుకే విటమిన్ A లోపం రాకుండా చూసుకోవాల్సిన అవసరం ఉంది.  మన శరీరంలో కణాల పెరుగుదలకు, రోగ నిరోధక శక్తికి, చర్మం, ఊపిరితిత్తులు, పేగులు, మూత్రశయం వంటి వాటిపై ఉపరితల కణజాలాలను ఏర్పరచడానికి విటమిన్ A చాలా అవసరం. గర్భిణీ స్త్రీలు, పిల్లలు, బాలింతలు విటమిన్ A లోపానికి గురయ్యే అవకాశం ఎక్కువ. దీనివల్ల శ్వాసకోశ ఇన్ఫెక్షన్లు వచ్చే అవకాశం ఉంది.  కాబట్టి విటమిన్ A లోపం రాకుండా చూసుకోవాలి. ఈ లోపం ఏర్పడినప్పుడు కొన్ని రకాల లక్షణాలను మన శరీరం బయటపెడుతుంది. 

చర్మం పొడిబారడం 
చర్మ కణాలను రిపేర్ చేయడానికి విటమిన్ A చాలా ముఖ్యమైనది. ఇది ఇన్ఫ్లమేషన్ నుండి రక్షణ కల్పిస్తుంది. చర్మం పొడి బారడం, తామర, దురదలు, చర్మం ఎర్రబడడం వంటివన్నీ విటమిన్ A లోపాన్ని సూచిస్తాయి. 

కళ్ళు పొడిబారడం 
విటమిన్ A లోపానికి చికిత్స చేయడం ద్వారా అనేక కంటి సమస్యలను పరిష్కరించుకోవచ్చు.  విటమిన్ A లోపిస్తే కళ్ళు కన్నీళ్లను ఉత్పత్తి చేయలేవు. దీని కారణంగా పొడిగా మారుతాయి.  రేచీకటి వచ్చే అవకాశం కూడా ఎక్కువ.

పునరుత్పత్తి వ్యవస్థ
విటమిన్ A లోపం వల్ల గర్భం దాల్చే అవకాశాలు తగ్గుతాయి. లేదా గర్భం దాల్చిన తర్వాత అనేక ఆరోగ్య సమస్యలు వస్తాయి. పిండం అభివృద్ధిపై ఇది ప్రభావం చూపిస్తుంది. పుట్టే బిడ్డలు లోపాలతో జన్మించే అవకాశం ఉంది. 

పిల్లల్లో ఎదుగుదల 
విటమిన్ A అనేది మన శరీర ఎదుగుదలకు అతి ముఖ్యమైనది. ఈ విటమిన్ లోపిస్తే ఎదుగుదల కుంటుపడుతుంది. పిల్లల్లో అనేక రకాల సమస్యలు వస్తాయి.

ఇన్ఫెక్షన్లు
విటమిన్ A లోపించడం వల్ల పిల్లల్లో గొంతు,  ఛాతి ఇన్ఫెక్షన్లు వస్తాయి. వారు శ్వాసకోశ ఇన్ఫెక్షన్లకు గురయ్యే అవకాశం ఉంది. ముఖ్యంగా శిశువుల్లో ఇది ప్రాణాంతకంగా మారుతుంది.

గాయాలకు...
శరీరానికి గాయం తగిలితే అది త్వరగా తగ్గాలంటే విటమిన్ A చాలా అవసరం. గాయాన్ని నయం చేసే దశల్లో ఇది ముఖ్య పాత్ర పోషిస్తుంది. విటమిన్ A వల్ల శరీరంలో ఎపిథిలియల్ ఉత్పత్తి అవుతుంది. ఇది గాయాన్ని నయం చేసే సామర్థ్యం కలిగి ఉంటుంది. అలాగే విటమిన్ A ఆరోగ్యకరమైన చర్మం విషయంలో ముఖ్యమైన పాత్ర పోషిస్తుంది. కొలాజెన్ ఉత్పత్తి అయ్యేలా చేయడంలో సహాయపడుతుంది. 

గమనిక: పలు అధ్యయనాలు, పరిశోధనలు, హెల్త్ జర్నల్స్ నుంచి సేకరించిన సమాచారాన్ని మీ అవగాహన కోసం ఇక్కడ యథావిధిగా అందించాం. ఈ సమాచారం వైద్యానికి లేదా చికిత్సకు ప్రత్యామ్నాయం కాదు. ఆరోగ్యానికి సంబంధించి.. ఎలాంటి సందేహాలున్నా మీరు తప్పకుండా డాక్టర్‌ను సంప్రదించాలి. ఈ ఆర్టికల్‌లో పేర్కొన్న అంశాలకు ‘ఏబీపీ దేశం’, ‘ఏబీపీ నెట్‌వర్క్’ ఎటువంటి బాధ్యత వహించవని గమనించగలరు.