NPPA New Drug Prices: దేశంలో సాధారణ పేషెంట్లకు మెడిసిన్ అధిక ధరల నుండి ఉపశమనం కలిగించడానికి నేషనల్ ఫార్మాస్యూటికల్ ప్రైసింగ్ అథారిటీ (NPPA) కీలక నిర్ణయం తీసుకుంది. అథారిటీ డ్రగ్స్ (ప్రైసెస్ కంట్రోల్) ఆర్డర్ అంటే DPCO 2013 పరిధిలో 39 కొత్త ఔషధాల రిటైల్ ధరలు నిర్ణయించింది. వీటిలో హై బ్లడ్ ప్రెషర్ (హై బీపీ), డయాబెటిస్, గుండె జబ్బులు (Heart Diseases), హెచ్ఐవి (HIV), కంటి ఇన్ఫెక్షన్లు, క్యాన్సర్ వంటి తీవ్రమైన వ్యాధుల చికిత్సలో వినియోగించే మెడిసిన్ ఉన్నాయి. ఈ ఔషధాలను రోగులకు మరింత అందుబాటు ధరల్లోకి తీసుకురావాలనే ఉద్దేశ్యంతో ధరల నియంత్రణకు చర్యలు చేపట్టింది.
ఇటీవల ఉత్తర్వులు జారీ
ఫార్మాస్యూటికల్స్ విభాగం తరపున 2026 జూలై 8న ఈ ధరల నోటిఫికేషన్ జారీ చేసింది. అయితే దీనిని DPCO 2013 లో పారాగ్రాఫ్ 5, 11, 15 కింద నోటిఫై చేశారు. అయితే, మార్కెట్లో ఇప్పటికే అందుబాటులో ఉన్న ఔషధాల ధరలను తగ్గించడానికి ఈ ఉత్తర్వులు కాదు. కొత్త ఔషధ ఫార్ములేషన్ల గరిష్ట రిటైల్ ధరలు నిర్ణయించడానికి జారీ చేశారని గమనించాలి. ఈ ధరలపై వర్తించే జీఎస్టీ (GST) అదనంగా వసూలు చేయనున్నారు.
పలు అవసరమైన ఔషధాల రిటైల్ ధరల నిర్ధారణ
NPPA విడుదల చేసిన జాబితాలో హై బ్లడ్ ప్రెషర్ (High BP) చికిత్సలో ఉపయోగించే Amlodipine+ Bisoprolol+ Telmisartan టాబ్లెట్ రిటైల్ ధరను ఒక్కో టాబ్లెట్కు రూ.14.74 గా నిర్ణయించారు. కంటి సర్జరీల తర్వాత, బ్యాక్టీరియా ఇన్ఫెక్షన్ల చికిత్సలో ఉపయోగించే Nepafenac+ Moxifloxacin Ophthalmic Solution మెడిసిన్ ధరను ప్రతి మిల్లీలీటర్కు రూ.68.64 గా నిర్ణయించారు. అలాగే గుండెపోటు, స్ట్రోక్ ప్రమాదాన్ని తగ్గించడానికి ఇచ్చే Clopidogrel+ Aspirin+ Atorvastatin ధరను ఒక్కో క్యాప్సూల్కు రూ6.37 గా ఫిక్స్ చేశారు.
ఈ జాబితాలో డయాబెటిస్ చికిత్సలో ఉపయోగించే పలు ఫిక్స్డ్ డోస్ కాంబినేషన్ మెడిసిన్ ధరలను కూడా నిర్ణయించారు. వీటిలో Dapagliflozin, Metformin, Empagliflozin, Sitagliptin, Glimepiride తో పాటు Voglibose ఆధారిత ఔషధాలు ఉన్నాయి.
ఇవే కాకుండా ఇన్ఫెక్షన్ల చికిత్సలో ఉపయోగించే Amoxicilline+ Clavulanate టాబ్లెట్లు, డిస్పర్సిబుల్ టాబ్లెట్లు, గ్లకోమా చికిత్సలో ఉపయోగించే ఐ డ్రాప్స్, HIV థెరపీ కిట్లు, విటమిన్ డి3 ఓరల్ సొల్యూషన్, క్యాన్సర్ ట్రీట్మెంట్ కోసం ఉపయోగించే Imatinib Oral Solution వంటి మెడిసిన్ ధరలను కూడా నిర్ణయించారు. వీటితో పాటు NPPA జాబితాలో అత్యంత ఖరీదైన ఔషధాలలో Tenecteplase (TNK-tpa) Injection 50mg ఉంది. గుండెపోటు చికిత్సలో వినియోగించే ఈ ఇంజెక్షన్ రిటైల్ ధరను ఒక్కో వయల్ (Vial) కు రూ.60,238.27 గా నిర్ణయించారు.
దుకాణదారులు ప్రైస్ లిస్ట్ను ప్రదర్శించాలి
తయారీ కంపెనీలు జారీ చేసిన ప్రైస్ లిస్ట్ను రిటైలర్లు, డీలర్లు అందరూ తమ దుకాణాల్లో ప్రదర్శించడం తప్పనిసరి అని NPPA మరోసారి స్పష్టం చేసింది. DPCO 2013 లోని పేరా 24 (4) ను ఉటంకిస్తూ, ప్రతి రిటైలర్, డీలర్ తమ దుకాణంలో కస్టమర్లకు సులభంగా కనిపించేలా ఈ ధరల జాబితాను, అనుబంధ ధరల జాబితాను ఉంచాలని అథారిటీ పేర్కొంది.
నిర్ణీత ధర కంటే ఎక్కువ వసూలు చేస్తే చర్యలు
నోటిఫై చేసిన రిటైల్ ధరను ఏదైనా తయారీ లేదా మార్కెటింగ్ కంపెనీ ఉల్లంఘించి, ఎక్కువ వసూలు చేసిన మొత్తాన్ని వడ్డీతో సహా ప్రభుత్వానికి జమ చేయాల్సి ఉంటుందని నోటిఫికేషన్లో స్పష్టం చేశారు. NPPA ప్రకారం.. ఒకవేళ ఈ ఔషధాల రిటైల్ ధరలను ఈ ఉత్తర్వులు, అందులోని నోటీసుల ప్రకారం నిర్ణయించకపోతే, సంబంధిత కంపెనీ DPCO 2013.. ఎసెన్షియల్ కమోడిటీస్ యాక్ట్ 1955 రూల్స్ ప్రకారం ఎక్కువ వసూలు చేసిన మొత్తాన్ని వడ్డీతో సహా ప్రభుత్వానికి చెల్లించాల్సి వస్తుంది.