Satyabhama Today Episode సత్య తన పుట్టింటికి వెళ్తానని మహదేవయ్యతో పాటు ఇంట్లో వాళ్లకి చెప్తుంది. రుద్ర, భైరవి సత్యతో వాధించి పంపడానికి ఇష్టం లేదని అంటారు. విశ్వనాథాన్ని విడిపించడానికి అన్ని ఏర్పాట్లు చేశామని ఆయనే వినించుకోకపోయినప్పుడు నువ్వు వెళ్లి ఏం చేస్తావని అడుగుతాడు రుద్ర. ఇంతలో మహదేవయ్యకు పార్టీ ప్రెసిడెంట్ కాల్ చేసి నీ చిన్న కోడలు నిన్ను అందలం ఎక్కిస్తుందని అనుకుంటే కాళ్లు పట్టుకొని కిందకి లాగుతుందని అంటాడు.
మహదేవయ్య: చెప్పేదేదో సూటిగా చెప్పండి.
ఎంపీ: మీ వియ్యంకుడు పోలీస్ కేసులో ఇరుక్కున్నాడు కదా. పొరపాటున కూడా ఆ కేసులో ఇన్వాల్వ్ అవ్వకు. ఆ బురద నీకు అంటుకుంటుంది. నీ రాజకీయ భవిష్యత్ దెబ్బతింటుంది. జాగ్రత్త.
మహదేవయ్య: చిన్న సత్యని లోపలికి తీసుకెళ్లురా. చూడు సత్య నేను సాయం చేస్తా అంటే ఎప్పుడైతే మీ నాన్న వద్దు అన్నాడో అప్పుడే నేనే కాదు ఈ ఇంట్లో ఎవరూ ఆయన గురించి ఆలోచించడానికి వీల్లేదు.
సత్య: అదేంటి మామయ్య అలా అంటున్నారు. ఏదో సమస్య నాన్న గారి మనసుని సతాయిస్తుంది. అందుకే ఆయన అలా ప్రవర్తిస్తున్నారు. కొద్ది రోజులు ఓపిక పడితే ఆయనే సర్దుకుంటారు. ఆయన్ను వదిలేస్తే ఎలా. మీరు వదిలేసినా నేను కన్న కూతుర్ని నేను ఎలా వదిలేస్తాను.
మహదేవయ్య: ఆయన మొండితనం చూస్తూ సర్దుకుంటాడని నాకు అనిపించడం లేదు. ఆయన చేసిన తప్పు వల్ల ఈ ఇంటికి నష్టం జరగడానికి వీల్లేదు.
సత్య: మామయ్య మీరు నన్ను అర్థం చేసుకుంటున్నారు. నా గురించి పాజిటివ్‌గా ఆలోచిస్తున్నారు. దయచేసి ఆ మంచి తనం పక్కన పెట్టకండి.
మహదేవయ్య: వద్దమ్మ నన్ను నాలాగే ఉంచమ్మా. మంచోడిని చేయకు. కొన్ని దినాలు నువ్వు ఎక్కడికి వెళ్లొద్దు. బాధ అనిపించొచ్చు కానీ తప్పదు.
సత్య: నా వల్ల కాదు మామయ్య. మీరు ఇలా మాట్లాడటం కరెక్ట్ కాదు.
భైరవి: ఏయ్.. ఆయన చెప్పేది కరెక్టో కాదో చెప్పే స్థాయి కాదు నీది. ఆయన చెప్పేది వినడమే నీ పని.
క్రిష్: అమ్మా అలా అంటావ్ ఏంటి. తన బాధ చెప్పుకునే హక్కు లేదా ఈ ఇంట్లో. సత్య ఇప్పటికే బతిమాలింది చాలు ఇక బతిమాలకు. వాళ్లు నీకు పర్మిషన్ ఇవ్వరు. అయినా సరే నేను దగ్గరుండి నిన్ను నీ పుట్టింటికి తీసుకెళ్తా.
రుద్ర: అంటే బాపునే ఎదురిస్తున్నావా.
క్రిష్: లేదు సత్యకి ఒదార్పు ఇవ్వాలి అనుకుంటున్నా.
భైరవి: ఛీ.. నీకు నీ తండ్రి కంటే పెళ్లామే ఎక్కువ అయిందారా.
క్రిష్: ఇది ఎక్కువ తక్కువల సమస్య కాదు. దయచేసి ఎవరూ మనసులోకి తీసుకోకండి. నన్ను నమ్ముకొని తనకి నేను తోడు ఉంటానని తనకి నేను ఉండగా ఏం కాదు అని నమ్ముకొని నా భార్య ఈ ఇంటిలో అడుగుపెట్టింది. ఆ నమ్మకాన్ని నిలబెట్టుకోవడం నీ బాధ్యత.
భైరవి: తీసుకుపోరా.. పల్లకిలో ఊరేగించి తీసుకుపోరా. ఇదేనా నువ్వు నీ బాపునకి ఇచ్చిన మర్యాద.
క్రిష్: సత్య పద పోదాం.
భైరవి: ఏంటి అయ్యా ఇది. ఏం అనకుండా నవ్వుతున్నావ్.
మహదేవయ్య: నా రాజకీయ భవిష్యత్ కాపాడుకోవడానికి ఇంకో రూట్‌లో రెడీ అయ్యాను. బుద్ధిగా బయటకు తీసుకొస్తా అంటే వద్దన్నాడు. ఇప్పుడు నా రాజకీయం కోసం వియ్యంకుడి మీద హంతకుడు అనే ముద్ర వేసి యావజ్జీవ శిక్ష వేయించబోతున్నా. బంధుత్వం పక్కన పెట్టి న్యాయం పక్క నిల్చొన్న మహదేవయ్య అని జనం నాకు జేజేలు కొడతారు. ఎలక్షన్‌లో కళ్లు మూసుకొని ఓట్లు వేస్తారు.
రుద్ర: ప్లాన్ బాగుంది కానీ సత్య ఊరుకోదు. కొట్లాడి మరీ తండ్రిని విడిపిస్తుంది.
మహదేవయ్య: బలవంతుడితో గెలవచ్చు కానీ రాజకీయ నాయకుడితో గెలవడం కష్టం. సత్యని నా బలంతో ఒంటరిని చేస్తా. అయ్యో అనేవాళ్లే తప్ప ఆదుకునే వాళ్లు ఉండరు. నా కాళ్ల మీద పడటం తప్ప వేరే దారి లేకుండా చేస్తా.
శాంతమ్మ హర్షతో తనని కొడుకు దగ్గరకు తీసుకెళ్లమని బతిమాలుతాను అంటుంది. ఆయన ఎవరు చెప్పినా వినడంలేదని విశాలాక్షి అంటుంది. విశ్వనాథం బయటకు ఎలా వస్తాడని అడుగుతారు. దానికి హర్ష నేను కూడా లొంగిపోతానని అంటాడు. విశాలాక్షి కొడుకుని తిడుతుంది. నువ్వు లొంగిపోతే నిన్ను జైలులో పెడతారు కానీ నాన్నని ఎలా వదిలేస్తారని సంధ్య అడుగుతుంది. నందిని వచ్చి మామయ్య అమాయకంగా జైలుకి పోయారని ఏదో ఒక రోజు వస్తారులే అని అంటుంది. ఇక క్రిష్, సత్య ఇంటికి వస్తారు. క్రిష్ నందినిని లోపలికి వెళ్లిపోమని అంటాడు. సత్య తల్లికి ధైర్యం చెప్తుంది. క్రిష్ లాయర్‌ని పెట్టి మామయ్యని బయటకు తీసుకొస్తానని అంటాడు. జైలులో విశ్వనాథం పిల్లలు కుటుంబాన్ని తలచుకొని బాధ పడతాడు. ఎస్‌ఐ వచ్చి కావాలని కేసులో ఇరుక్కున్నావని అంటాడు. కేసు నుంచి తప్పించడానికి మీ వాళ్లు సిద్ధంగా ఉన్నారని కోర్టుకి వెళ్తే రక్షించడం ఎవరి తరం కాదు అని ఎస్‌ఐ అంటాడు. కానీ మొండిగా విశ్వనాథం ప్రవర్తిస్తాడు.
క్రిష్: ఒక మనిషి ఇంకో మనిషిని చంపాలి అనుకున్నాడు అంటే ఏదో పెద్ద కారణం ఉండాలి. పైగా మామయ్య లాంటి మనిషి ఇలాంటి పని చేశాడు అంటే చాలా గట్టి కారణం ఉండాలి. అది అందరికి తెలియాలి. లేకుంటే జరిగే నష్టం మామూలుగా ఉండదు.
హర్ష: కారణం అందరికీ తెలుసుకదా. కాళీ సంధ్య వెంట పడటం.
క్రిష్: లేదు బామ్మర్ది. అంతకు మించి ఏదో ఉంది. ఆయన జైలులో ఉండాలి అని ఫిక్స్ అయ్యారు అందుకే చెప్పడం లేదు. నిజాన్ని గుండెల్లో దాచుకొని తప్పు చేస్తున్నారు. మామయ్యని రక్షించాలి అంటే ఆ నిజం బయటకు తెలియాలి అంటాను.
హర్ష: బావ ఉన్న తల నొప్పులు చాలు వాటి నుంచి బయట పడితే చాలు. కొత్త సమస్యలు వద్దు. ఉహాగానాలు వద్దు.
క్రిష్: ఇది ఉహాగానం కాదు నిజం.
హర్ష: అలా ఎలా చెప్తావు.
క్రిష్: నీ కళ్లలో కనిపిస్తున్న కంగారు బట్టి. అబద్ధం చెప్పడం తప్పు. నిజం దాచడం అంతకన్నా పెద్ద తప్పు. నువ్వు ఈ రెండు తప్పులు ఒకేసారి చేస్తున్నావ్ అని అనుమానంగా ఉంది. ఒక్క సంధ్య విషయం అయితే మామయ్య అంత బెదరడు. నేను డీల్ చేస్తా అని తెలుసు. నీతో కూడా చెప్పకుండా కాళీని డీల్ చేస్తా అనుకున్నాడు అంటే అది నాకు తెలియకూడని విషయం అయింటుంది. అందుకే నన్ను దూరం పెట్టాడు.
హర్ష: మనసులో.. సత్య కిడ్నాప్ విషయం బావకి తెలియకూడదు అని జాగ్రత్త పడుతున్నాం అని తెలిస్తే గొడవలు అయిపోతాయ్.
క్రిష్: బామర్ది ఏదో దాస్తున్నావ్. నువ్వు నిజం దాస్తే నష్టపోయేది మనమే. నాకు నిజం చెప్పకుండా పారిపోతున్నావ్ కదూ. నువ్వు చెప్పకపోయినా నేను తెలుసుకుంటా. నా ఆరాటం అర్థం చేసుకుంటావ్ అనుకున్నా కానీ నువ్వు మామయ్య కంటే మొండివాడివని ఇప్పుడే తెలిసింది. క్రిష్ కాళీ దోస్త్‌లను తీసుకురమ్మని బాబీ వాళ్లకి చెప్తాడు. దీంతో ఇవాళ్టి ఎపిసోడ్ పూర్తయిపోతుంది.