Jagadhatri Serial Today Episode: బుల్లితెర ప్రేక్షకులను ఎంతో ఆకట్టుకుంటున్న జగధాత్రి సీరియల్ ఈరోజు ట్విస్టులపై ట్విస్టులతో అదిరిపోయింది. కేదార్,వైజయంతిని చంపడానికి వచ్చిన పాపారాయుడిని జగధాత్రి జైలుకు పంపిస్తుంది.అలాగే తొలిరోజు ఆఫీసులో అడుగుపెట్టిన యువరాజును పీఏ సోనీ లైన్లో పెట్టడానికి ట్రై చేస్తుండటం చూసి నిషిక రుసరసలాడిపోతుంది. అలాగే పాటిల్ చావుకు కారణం తెలుసుకున్న జేడీ షాక్ తింటుంది.. ఇలాంటి ట్విస్టులతో ఈరోజు జగధాత్రి సీరియల్ రసవత్తరంగా సాగుతుంది.
పాపారాయుడు అరెస్ట్
కేదార్ను చంపడానికి ప్రయత్నిస్తున్న పాపారాయుడిని కొట్టి కిందపడేస్తుంది జగధాత్రి. ఆ తర్వాత అతని చేతులు కట్టేసి గన్తీసుకుని వస్తారు కేదార్, దాత్రి. మా అన్నయ్యనే కట్టేస్తారా మీకు ఎంత ధైర్యమని వైజయంతి అంటుంది. బాబాయిని కట్టేయడానికి మీకు ఎన్ని గుండెలని నిషిక ప్రశ్నిస్తుంది. మర్యాదగా కట్లుతీయండని అంటుంది. బాబాయిగారి కట్లు విప్పితే మొదట కాల్చిపడేసేది వైజయంతి అత్తయ్యనేనని అనడంతో వైజయంతి అదిరిపడుతుంది.ఇప్పటికైనా మించిపోయిందిలేదు...మీరు ఇక్కడ ఎవరికీ ఎలాంటి హానీ తలపెట్టరని చెబితే కట్లు విప్పి వదిలేస్తామని జగధాత్రి అంటుంది. మీ బెదిరింపులకు భయపడేది లేదని పాపారాయుడు అనడంతో ఇలాంటి మృగాన్ని జైలులో పెట్టాలని సుధాకర్ అంటాడు. దీంతో కౌషికి పోలీసులకు ఫోన్ చేసి రమ్మనగా వాళ్లు వచ్చి పాపారాయుడిని అరెస్ట్ చేసి స్టేషన్కు తీసుకెళ్తారు.
తొలిరోజు ఆఫీసులో అడుగుపెట్టిన యువరాజు
కౌషికి తొలిసారి యువరాజును ఆఫీసుకు తీసుకెళ్లి అందరికీ పరిచయం చేస్తుంది. బాబాయికి యాక్సిడెంట్ అవ్వడం వల్ల కొద్దిరోజులుపాటు బాబాయి పనులన్నీ యువరాజు చూస్తాడని...మీరుఅందరూ సహకరించాలని చెబుతుంది. నేను మానాన్నని రీప్లేస్ చేయలేను కానీ...ఆయన చేయాల్సిన పనులను కొద్దిగా అయినా చేసి నిరూపించుకుంటానని అంటాడు. తన ఛాంబర్లోకి యువరాజు వెళ్తుండగా లోపలి నుంచి ఓ బ్యూటీ బయటకు వస్తుంది. ఆమెను చూడగానే యువరాజు మైకంలో పడిపోతాడు.ఆమె మీ పర్సనల్ సెక్రటరీ అని కౌషికి పరిచయం చేస్తుంది. సోనీ కావాలనే యువరాజుకు దగ్గరవ్వడానికి బాగా ట్రై చేస్తుండటం చూసి నిషిక ఒళ్లు మండిపోతుంది. అవసరం ఉన్నా లేకపోయినా యువరాజుతో చనువుగా ఉంటుంది సోనీ.అది చూసి నిషికకు ఏడ్వాలో తన భర్త ఆఫీసులోకి వచ్చాడని సంతోషపడాలో తెలియక చిరాకు, కోపంతో రుసరుసలాడుతుంది.
పాటిల్ హత్య కేసులో కీలక మలుపు
పాటిల్ హత్య కేసు విచారణలో భాగంగా జగధాత్రి నరసింహా ఫోన్ కాల్లిస్టు మొత్తం షార్ట్అవుట్ చేసి ఒక నెంబర్ను తెలుసుకుంటుంది. అతనే ఈ హత్యకు కీలకమని భావించి లొకేషన్ తెలుసుకుని అక్కడికి వెళ్తారు. బయట చాలామంది రౌడీలు ఉండటం చూసి...ఇప్పుడు మనం ఎటాక్ చేస్తే అసలైనవాడు పారిపోతాడని జేడీ అంటుంది.కాబట్టి నేను డెలివరీ గాల్లా లోపలికి వెళ్తానని చెబుతుంది. పార్శిల్ వచ్చిందంటూ జేడీ లోపలికి వెళ్లి రవీందర్సింగ్తో సంతకం తీసుకుంటుంది. ఇంతలో అక్కడ ఉన్న రౌడీ జేడీని గుర్తుపట్టి పోలీసులు వచ్చారని అలెర్ట్ చేస్తాడు. దీంతో రౌడీలకు, జగధాత్రికి మధ్య ఫైట్ జరుగుతుంది.అప్పుడే లోపలికి వచ్చిన కేదార్,రమ్య అందిరనీ కొట్టి అరెస్ట్ చేస్తారు.మర్యాదగా ఈ హత్య ఎవరు చేయించారో చెప్పకపోతే నువ్వు కూడా చచ్చిపోతావని బెదిరించడంతో పాటిల్ తమ్ముడు లక్ష్మణ్పాటిల్ ఈ హత్య చేయించాడని చెప్పడంతో జేడీ,కేడీ షాక్ తింటారు. లక్ష్మణ్కు వాళ్ల అన్న అంటే ప్రాణం కదా అని అంటాడు.అదంతా ఉత్తుత్తిదేనని...ఆస్తి కోసం అతనే ఈ పనిచేయించాడని చెబుతాడు. లక్ష్మణ్ ఎక్కడ ఉన్నాడో తెలుసుకుని జేడీ, కేడీ అక్కడికి వెళ్తారు.
అసలు ఇంతకీ ఈ సోనీ ఎవరు..?
సోనీని చూసినప్పటి నుంచి నిషిక ఈమెను ఎక్కడో చూశానని అనుకుంటుంది.ఆమె అనుమానం నిజమైనట్లే సోనీ ఎవరో కాదు...దివ్యాంక మనిషి.యువరాజకు తాను చాలా దగ్గరయ్యానని ఇక నా చుట్టూ తిరిగేలా చేసుకుంటానని సోనీ దివ్యాంకకు ఫోన్ చేసి చెబుతుంది.చాలా మంచిపని చేశావని....నన్ను అవమానించిన ఆ నిషికకు మనశ్శాంతి లేకుండా చేస్తానని దివ్యాంక అంటుంది.అలాగే వాళ్ల ద్వారా వచ్చిన నష్టం వాళ్లతోనే పూడ్చుకుంటానని దివ్యాంక అంటుంది.యువరాజు చెక్కులపై పెట్టే సంతకాల్లో మన చెక్కులు ఉండాలని చెబుతుంది. దీంతో అటు కౌషికిని. ఇటు నిషికను ఒకేసారి దెబ్బకొట్టినట్లు ఉంటుందని అంటుంది.