గుండె నిండా గుడి గంటలు నవంబర్ 06 ఎపిసోడ్ - Gunde Ninda Gudi Gantalu 2025 November 6th Episode
మీనా బంగారం ప్రభావతి దొంగతనం చేసి మనోజ్ కి ఇచ్చింది. మనోజ్ తాకట్టుపెట్టుకుని డబ్బులు తీసుకుంటాడు అనుకుంటే అమ్మేసి మరోసారి బద్ధిచూపించాడు. తీరా బాలు-మీనా వచ్చి బంగారం అడిగేసరికి అవాక్కైంది ప్రభావతి. ఆ ప్లేస్ లో గిల్ట్ నగలు పెట్టేసి అదే బాక్స్ మీనా చేతిలో పెట్టింది ప్రభావతి. ఆ విషయం తెలియని మీనా బాలు గోల్డ్ షాప్ కి వెళ్లి అవమానం ఎదుర్కొంటారు. ఇలాంటి దొంగతనాలు చేసి దొరికిపోయిన తర్వాత మాట మార్చుతున్నారా అని బంగారం షాపు యజమాని ఫైర్ అవుతాడు. బంగారమో కాదో ఇంటికెళ్లి తేల్చుకోవాల్సిందే అని బాలు కోపంగా బయలుదేరుతాడు. మొత్తం మనోజ్ చేశాడని బాలుకి డౌట్ వస్తుంది..అందులో ప్రభావతి హస్తం ఉందని కూడా పసిగట్టేస్తాడు.
సుశీలమ్మ బర్త్ డే సందర్భంగా ఇంట్లో అంతా సంతోషంగా ఉన్నారు..ఇలాంటి టైమ్ లో బంగారం గురించి మాట్లాడితే లేనిపోని గొడవ జరుగుతుంది.. అందుకే అమ్మమ్మ పుట్టినరోజు అయ్యేవరకూ ఆగండి, ఏమీ మాట్లాడకండి అని కంట్రోల్ చేస్తుంది మీనా. ఇంటికివెళ్లిన తర్వాత ఎలాంటి గొడవ చేయకూడదంటూ బాలు దగ్గర మాట తీసుకుంటుంది. హాల్లో అంతా బెలూన్స్ ఊదుతూ డెకరేషన్ చేస్తుంటారు. బాలు కోపంగా లోపలకు వెళ్లి బెలూన్స్ ఊదడం స్టార్ట్ చేస్తాడు. ఆ బెలూన్స్ లో గాలి ఎక్కువై పేలిపోతుంటాయ్.. ఏమైంది? ఎందుకంత కోపంగా ఉన్నాడని సత్యం అడుగుతాడు. కడుపులో మంట అగ్నిపర్వతంలా మండుతోందని మీనా చెబుతుంది. ఏం జరిగిందని ప్రభావతి అడిగితే..రెంజు రోజులు ఆగండి అప్పుడు చెప్తారు అంటుంది. వదినా నీకు వంటలో హెల్ప్ చేయనా అని రవి అడిగితే.. బాగా మండుతోంది, మంటా నేనే పెడతాను, వంటా నేనే చేస్తాను అనేసి వెళ్లిపోతుంది. మనోజ్ కూడా అక్కడి నుంచి తప్పించుకుని వెళ్లిపోతాడు.
రూమ్ లోకి వెళ్లిన రోహిణికి చింటూ కాల్ చేస్తాడు. అమ్మా నిన్ను చూడాలని ఉందని అడుగుతాడు.. ఇంతలో మనోజ్ రావడంతో కాల్ కట్ చేస్తుంది. నువ్వు ఎవరితో మాట్లాడుతున్నావ్ అని అడిగితే.. నా ఫ్రెండ్ అని చెబుతుంది. మరి బంగారం, బుజ్జికన్నా అంటున్నావ్ అనగానే...క్లోజ్ ఫ్రెండ్స్ అలానే పిలుస్తాను అంటుంది. నన్ను పిలవలేదంటాడు మనోజ్. నేను బంగారం అంటానంటే.. నేను బుజ్జికన్నా అని పిలుస్తా అంటాడు.
తన పుట్టింటికి కాల్ చేసిన మీనా..సంతోషంగా మాట్లాడుతుంది. రేపు అమ్మమ్మగారి 75వ పుట్టినరోజు అని చెబుతుంది మీనా. అవును మీ మావయ్యగారు కాల్ చేశారని చెబుతుంది మీనా తల్లి. రేపు మర్చిపోకుండా రండి అని బాలు కూడా పిలుస్తాడు. ఏం కొనాలని ఆలోచిస్తుంది మీనా తల్లి..మీరు ఖర్చులు పెట్టుకోవద్దు.. రండి చాలు అంటాడు బాలు. కాల్ కట్ చేసిన మనం బంగారం కొనలేకపోతున్నాం అని బాధపడతాడు..మీనా ఓదార్చుతుంది. వస్తువు బహుమతిగా ఇస్తే ఆవిడ కాసేపు సంతోషంగా ఉంటుంది..కానీ ఎప్పుడూ గుర్తుండిపోయేలా ఏదైనా చేయాలి అని సలహా ఇస్తుంది మీనా.
సుశీలమ్మ వస్తోందని కాల్ రావడంతో తీసుకొచ్చేందుకు వెళతాడు బాలు. ఎప్పుడూ నానమ్మను చూడగానే ఎగిరిగంతేసే బాలు.. ఈసారి అందుకు భిన్నంగా మౌనంగా ఉండిపోతాడు. లోలోపలే బాధను దాచుకుని బయటకు బాగానే మాట్లాడతాడు. ఏం జరిగింది? ఎందుకలా ఉన్నావని సుశీలమ్మ అడిగినా సమాధానం చెప్పడు. రాత్రంతా ట్రిప్ కి వెళ్లాను..సరిగ్గా నిద్రలేక అలా కనిపిస్తున్నా అంటాడు. నేను ఆటోలో వచ్చేదాన్ని కదా అంటుంది సుశీల... నీకన్నా ఏదీ ఎక్కువకాదంటాడు.
తల్లికోసం బయట నిల్చుంటాడు సత్యం.. లోపలకు రారా ఏంటి అని సెటైర్ వేస్తుంది ప్రభావతి. నీకు తల్లి విలువ తెలియదులే అని ఫైర్ అవుతాడు. అమ్మమ్మ వస్తోందంటూ హారతి ఇచ్చేందుకు అన్నీ సిద్ధం చేస్తుంది మీనా. అప్పుడే ఎంట్రీ ఇచ్చిన ప్రభావతి..మా అత్తగారికి సేవలు చేసి నువ్వు గొప్పదానివి అయిపోదాం అనుకుంటున్నావా.. ఆ హారతి రోహిణి, శ్రుతికి ఇవ్వు వాళ్లిస్తారు అంటుంది. అలా మీనా చేతిలో హారతి పళ్లెం రోహిణి, శ్రుతి చేతికి వెళుతుంది. అప్పుడే ఎంట్రీ ఇస్తుంది సుశీలమ్మ. రోహిణి, శ్రుతి హారతి ఇవ్వండమ్మా అంటుంది ప్రభావతి. మీనా ఎక్కడుందని చూస్తుంటుంది సుశీలమ్మ. హారతి... రోహిణి ఇస్తుందిలే అతమ్మా అంటుంది ప్రభావతి. ఆ హారతి మీనానే సిద్ధం చేసి ఉంటుంది షీలా డార్లింగ్..మధ్యలోనే పళ్లెం ఎత్తేశారంటూ సెటైర్ వేస్తాడు బాలు. నాకు ఆ మాత్రం తెలియదా ఏంటి అంటుంది సుశీలమ్మ. ఆ తర్వాత ముగ్గురూ కలసి హారతి ఇస్తారు. లోపల బర్త్ డే ఏర్పాట్లు చూసి మురిసిపోతుంది సుశీలమ్మ...