VD 14 Movie: నిన్న మైక్ టైసన్, నేడు ‘ది మమ్మీ’ విలన్ - తగ్గేదే లేదంటున్న విజయ్ దేవరకొండ!

విజయ్ దేవరకొండ, రాహుల్ సంకృత్యాన్ దర్శకత్వంలో తెరకెక్కుతున్న VD14 మూవీకి సంబంధించి ఓ కేజ్రీ న్యూస్ వినిపిస్తోంది. ఈ చిత్రంలో ‘ది మమ్మీ’ విలన్ కీలక పాత్ర పోషించబోతున్నట్లు తెలుస్తోంది.

The Mummy Villain In Vijay Deverakondas Movie : గత కొద్ది కాలంగా సరైన హిట్ లేక ఇబ్బంది పడుతున్న విజయ్ దేవరకొండ ప్రస్తుతం వరుస సినిమాలు చేస్తున్నారు. ముచ్చటగా మూడు సినిమాల్లో నటిస్తున్నారు. ఈ మూడు సినిమాలు మూడు  భిన్నమైన జోనర్లలో ప్రేక్షకుల ముందుకురానున్నాయి. నానితో ‘జెర్సీ’ మూవీ తీసిన గౌతమ్ తిన్ననూరి VD12 మూవీని తెరకెక్కిస్తున్నారు. ఈ సినిమాలో విజయ్ ఓ స్పైలా కనిపించబోతున్నట్లు తెలుస్తోంది. విజయ్ తో కలిసి ‘ట్యాక్సీవాలా’ సినిమా చేసిన రాహుల్ సంకృత్యాన్ మరో సినిమా కూడా చేస్తున్నారు. విజయ్ కెరీర్ లో 14వ చిత్రంగా ఈ మూవీ తెరకెక్కుతోంది. ‘ఇతిహాసాలను ఎవరూ రాయరు.. అవి హీరోల రక్తంతో చెక్కబడతాయి’ అంటూ షేర్ చేసిన ఈ మూవీ పోస్టర్ ప్రేక్షకులలో క్యూరియాసిటీ పెంచింది. మరోవైపు  రవి కిరణ్ దర్శకత్వంలో విజయ్ దేవరకొండ VD15 అనే సినిమా చేస్తున్నారు.  

VD14లో ‘ది మమ్మీ’ విలన్

విజయ్ దేవరకొండ,  రాహుల్ సంకృత్యాన్ కాంబోలో వస్తున్న ‘VD 14’ సినిమాకు సంబంధించి ఇండస్ట్రీలో ఓ క్రేజీ న్యూస్ వినిపిస్తోంది. ఈ సినిమాలో దక్షిణాఫ్రికా నటుడు ఆర్నాల్డ్ వోస్లూ కీలక పాత్ర పోషించబోతున్నట్లు తెలుస్తోంది. ఆర్నాల్డ్  ‘ది మమ్మీ’ (1999), ‘ది మమ్మీ రిటర్న్స్’ (2001) లాంటి చిత్రాల్లో విలన్ పాత్రలు పోషించి ప్రపంచ వ్యాప్తంగా మంచి గుర్తింపు తెచ్చుకున్నారు. ఆయన ‘VD14’ చిత్రంలో విలన్ పాత్ర చేయబోతున్నట్లు తెలుస్తోంది. ప్రస్తుతం చిత్ర బృందం వోస్లూతో చర్చలు జరుపుతున్నాట్లు తెలుస్తోంది. త్వరలోనే ఆయన పాత్రకు సంబంధించి మేకర్స్ నుంచి అధికారికంగా ప్రకటన వచ్చే అవకాశం ఉంది.     

హాలీవుడ్ లో ప్రత్యేక గుర్తింపు తెచ్చుకున్న ఆర్నాల్డ్ వోస్లూ  

ఆర్నాల్డ్ వోస్లూ హాలీవుడ్ లో ఎన్నో అద్భుత చిత్రాల్లో నటించి మంచి గుర్తింపు తెచ్చుకున్నారు. సౌతాఫ్రికాకు చెందిన ఆయన ‘ది మమ్మీ’, ‘ది మమ్మీ రిటర్న్స్‌’ చిత్రాలతో ఓ రేంజ్ లో పాపులర్ అయ్యారు. ‘ఏజెంట్ కోడి బ్యాంక్స్’ (2003), ‘బ్లడ్ డైమండ్’ (2006), ‘సిల్వర్టన్ సీజ్’ (2022), ‘G.I’ లాంటి హాలీవుడ్ చిత్రాల్లో అద్భుతంగా నటించి ప్రేక్షకులను ఆకట్టుకున్నారు. గత దశాబ్దానికి పైగా హాలీవుడ్ ఇండస్ట్రీలో రాణిస్తున్నారు.  అమెరికన్ బుల్లితెరపైనా మంచి క్రేజ్ సంపాదించుకున్నారు. ‘24’, ‘NCIS’, ‘చక్’, ‘బోన్స్’, ‘ఎలిమెంటరీ’, ‘బాష్, ది బ్లాక్‌ లిస్ట్’ లాంటి షోలలో నటించారు. ఇప్పుడు ఆయన తెలుగు సినిమాలో నటించబోతున్నట్లు టాక్ వినిపిస్తోంది.   

‘లైగర్’ సినిమాలో మైక్ టైసన్

విజయ్ దేవరకొండ, పూరి జగన్నాథ్ కాంబోలో వచ్చిన ‘లైగర్’ సినిమాలో బాక్సింగ్ లెజెండ్ మైక్ టైసన్ కనిపించారు. ఈ సినిమా బాక్సాఫీస్ దగ్గర డిజాస్టర్ గా మిగిలింది. ఇప్పుడు తన సినిమాలో మరో హాలీవుడ్ నటుడు కనిపించబోతున్నారు. ఈ ప్రతిష్టాత్మక చిత్రాన్ని మైత్రీ మూవీ మేకర్స్ సంస్థ నిర్మిస్తోంది. ఈ భారీ బడ్జెట్ చిత్రం 2025 ప్రారంభంలో షూటింగ్ మొదలనున్నట్లు తెలుస్తోంది.