Thaman: నిన్న చూపు లేని యువకుడికి గాయకుడిగా అవకాశం... నేను కిడ్నీ పేషెంట్‌కు సాయం- తమన్‌పై నెటిజన్ల ప్రశంసలు

మ్యూజిక్ డైరెక్టర్ తమన్ మంచి మనసు చాటుకున్నారు. అనారోగ్యంతో బాధపడుతున్న ఓ రోగికి అండగా నిలిచారు. ఆయన సాయంపై నెటిజన్లు ప్రశంసలు కురిపిస్తున్నారు.

Music Director Thaman Help: తెలుగు సినిమా పరిశ్రమలో టాప్ మ్యూజిక్ డైరెక్టర్ గా కొనసాగుతున్న తమన్ తన మంచి మనసు చాటుకుంటున్నరు. ఆపదలో ఉన్నవారికి ఆపన్న హస్తం అందివ్వడంలో ముందుంటున్నారు. రీసెంట్ గా ఓ చూపు లేని యువకుడికి ఇండియన్ ఐడల్ తెలుగులో పాడే అవకాశం కల్పించిన ఆయన, తాజాగా అనారోగ్యంతో బాధపడుతున్న ఓ పేషెంట్ కు అండగా నిలిచారు. కిడ్నీ మార్పిడికి కోసం ఆర్థికసాయం చేసి ప్రాణాలు కాపాడారు.   

సోషల్ మీడియాలో పోస్టు పెట్టిన డాక్టర్

తమన్ సాయం గురించి కిడ్నీ ట్రాన్స్ ప్లాంటేషన్ చేసిన డాక్టర్ లీలా క్రిష్ సోషల్ మీడియాలో పోస్టు పెట్టారు. తమన్ ఆర్థిక సాయం చేసి, ఓ పేషెంట్ ప్రాణాలు కాపాడారని వెల్లడించారు. “ ప్రియమైన బ్రదర్ తమన్ కు కృజ్ఞతలు. ఓ పేషెంట్ కిడ్నీ మార్పికి సాయం చేసి ప్రాణాలు కాపాడావు. మీ సాయం వాళ్లు ఎప్పటికీ మర్చిపోలేరు. మీ సాయం ఎంతో మందికి స్ఫూర్తిగా నిలవాలని కోరుకుంటున్నాను” అని రాసుకొచ్చారు. డాక్టర్ లీలా క్రిష్ పెట్టిన పోస్టును తమన్ షేర్ చేశారు. కిడ్నీ మార్పిడి ఆపరేషన్ సక్సెస్ ఫుల్ గా నిర్వహించిన డాక్టర్ ను అభినందించారు. “గాడ్ ఈజ్ గ్రేట్ డియర్ డాక్టర్ లీలా క్రిష్” అని రాసుకొచ్చారు.

తమన్ పై ప్రశంసలు కురిపిస్తున్న నెటిజన్లు

అటు తమన్ సాయంపై నెటిజన్లు ప్రశంసలు కురిపిస్తున్నారు. మంచి మనసుతో ఓ నిండు ప్రాణాన్ని కాపాడటం నిజంగా అభినందనీయం అంటున్నారు. “మీ సాయం ఎంతో మందికి ఆదర్శం కావాలి” అని నెటిజన్లు కామెంట్స్ పెడుతున్నారు.  “ఆపదలో మీరు చేసిన సాయం.. ఓ కుటుంబాన్ని నిలబెట్టింది” అని ఇంకొందరు అభినందిస్తున్నారు.

చూపు లేని యువకుడిగా తమన్ అవకాశం

ఇటీవల చూపులేని ఓ యువకుడు అద్భుతంగా పాడుతున్న వీడియో చూసి సాయం చేయడానికి తమన్ ముందుకు వచ్చారు. ఇండియన్ ఐడల్ సీజన్ 4లో పాడే అవకాశం కల్పిస్తున్నట్లు చెప్పారు. “ఇండియన్‌ ఐడల్‌ సీజన్‌ 4లో ఈ యువకుడు తప్పకుండా పాడతాడు. ఆహా టీమ్ నా అభ్యర్థన అనుకోండి, ఆర్డర్ అనుకోండి.. తనను ఇండియన్ ఐడల్ స్టేజి మీద పాడే అవకాశం కల్పించండి. ఇండియన్‌ ఐడల్‌ లో తన ప్రత్యేక ప్రదర్శన ఉంటుంది. అతడితో కలిసి నేను పర్ఫార్మెన్స్ ఇస్తాను. తనలో చాలా టాలెంట్ ఉంది. పర్ఫెక్ట్ పిచింగ్ లో పాటలు పాడుతున్నాడు. దేవుడు కొన్నిసార్లు కఠినంగా ఉంటాడు. కానీ మనం మనుషులం అందరం కలిసి అతడిని అందరూ గర్వించే స్థాయికి తీసుకొద్దాం” అంటూ ఎక్స్ వేదికగా రాసుకొచ్చారు. ఈ తమన్ అవకాశం కల్పించడం పట్ల ఆర్టీసీ ఎండీ సజ్జనార్ ప్రత్యేక కృతజ్ఞతలు చెప్పారు. నెటిజన్లు సైతం తమన్ సాయం పట్ల అభినందనలు కురిపించారు.

వరుస సినిమాలతో ఫుల్ బిజీ

అటు ప్రస్తుతం తమన్ వరుస సినిమాలో ఫుల్ బిజీగా ఉన్నారు. రామ్ చరణ్, శంకర్ కాంబోలో వస్తున్న ప్రతిష్టాత్మక చిత్రం ‘గేమ్ ఛేంజర్’కు తమన్ సంగీతం అందిస్తున్నారు. సంక్రాంతి కానుకగా జనవరి 10, 2025న ఈ సినిమా విడుదలకానుంది. ఈ మూవీతో పాటు పలు ప్రతిష్టాత్మక చిత్రాలకు సంగీతం అందిస్తున్నారు.