'సమ్మోహనం', 'వి' సినిమాల తర్వాత హీరో సుధీర్ బాబు, ద‌ర్శకుడు మోహనకృష్ణ ఇంద్రగంటి కాంబినేష‌న్ లో తెరకెక్కుతోన్న మూడో సినిమా 'ఆ అమ్మాయి గురించి మీకు చెప్పాలి'. రొమాంటిక్ డ్రామాగా తెరకెక్కుతోన్న ఈ సినిమాలో 'ఉప్పెన' ఫేమ్ కృతిశెట్టి హీరోయిన్ గా నటిస్తోంది. ఇప్పటికే ఈ సినిమాకి సంబంధించి లిరికల్ సాంగ్స్, టీజర్ విడుదలయ్యాయి. అవన్నీ ప్రేక్షకులను ఆకట్టుకున్నాయి. తాజాగా సినిమా ట్రైలర్ ను విడుదల చేశారు.
ట్రైలర్ ని బట్టి యాక్టర్ అవ్వాలనుకునే ఓ డాక్టర్ స్టోరీనే ఈ సినిమా అని తెలుస్తోంది. హీరో సుధీర్ బాబు సినిమా ఇండస్ట్రీకి చెందిన వ్యక్తి. కృతిశెట్టి డాక్టర్ ఫ్యామిలీకి చెందిన అమ్మాయి. తను కూడా ఓ డాక్టర్. ఆమెని హీరోయిన్ గా పరిచయం చేయాలనుకుంటారు హీరో. కానీ ఆమె ఇంట్లో సినిమాలన్నా, సినిమా వాళ్లన్నా అసహ్యం. దీంతో తనతో సినిమా చేయాలనుకుంటే సుధీర్ బాబుకి కొన్ని ఇబ్బందులు ఏర్పడతాయి. ఆ తరువాత ఏం జరిగిందనేదే ఈ సినిమా.
ప్రస్తుతం ఈ సినిమా పోస్ట్ ప్రొడక్షన్ దశలో ఉంది. ఈ సినిమాలో వెన్నెల కిషోర్, అవసరాల శ్రీనివాస్‌, రాహుల్‌ రామకృష్ణ, శ్రీకాంత్‌ అయ్యంగార్‌, కల్యాణి నటరాజన్‌ తదితరులు నటిస్తున్నారు. బెంచ్ మార్క్ స్టూడియోస్ ప‌తాకంపై గాజుల‌ప‌ల్లి సుధీర్ బాబు స‌మ‌ర్పిస్తోన్న ఈ చిత్రాన్ని బి.మ‌హేంద్రబాబు, కిర‌ణ్ బ‌ల్లప‌ల్లి సంయుక్తంగా నిర్మిస్తున్నారు. వివేక్ సాగ‌ర్ సంగీతం సమకూరుస్తుండగా పీజీ విందా సినిమాటోగ్రాఫ‌ర్‌గా వ్యవ‌హ‌రిస్తున్నారు. ఆర్ట్ డైరెక్టర్‌గా సాహి సురేష్‌, ఎడిట‌ర్‌గా మార్తాండ్ కె. వెంక‌టేష్ పనిచేస్తున్నారు. సిరివెన్నెల సీతారామ‌శాస్త్రి, రామ‌జోగ‌య్య శాస్త్రి సాహిత్యం అందిస్తున్నారు.