‘బిగ్ బాస్’ విన్నర్, నటుడు సిద్ధార్థ్ శుక్లా.. గురువారం గుండె నొప్పితో కన్ను మూశారు. తీవ్రమైన గుండె నొప్పితో బాధపడుతున్న సిద్ధార్థ్ శుక్లాను హుటాహుటిన హాస్పిటల్‌కు తరలించారు. అయితే, అప్పటికే సిద్ధార్థ్ శుక్లా కన్నుమూశారని వైద్యులు ధృవీకరించారు. 40 ఏళ్ల సిద్ధార్థ్.. హిందీలో ప్రసారమయ్యే ‘బిగ్ బాస్’సీజన్ 13లో విజేతగా నిలిచారు. హోస్ట్ సల్మాన్ ఖాన్ నుంచి ట్రోపీ అందుకున్నారు. సిద్ధార్థ్ ‘బాలికా వధు’ (తెలుగులో ‘చిన్నారి పెళ్లి కూతురు’) తదితర సీరియల్స్‌తో ప్రేక్షకాధరణ పొందారు. పలు బాలీవుడ్ సినిమాల్లో కూడా నటించారు. సిద్ధార్థ్ మరణంతో సిని, టీవీ పరిశ్రమ విషాదంలో మునిగిపోయింది.
ముంబయిలో నివసిస్తున్న సిద్ధార్థ్‌కు గురువారం తెల్లవారుజామున గుండెలో నొప్పి వచ్చిందని, దీంతో మాత్రలు వేసుకుని నిద్రపోయారని తెలిసింది. ఆ తర్వాత ఎంతకీ చలనం లేకపోవడంతో కుటుంబ సభ్యులు హుటాహుటిన కూపర్ హాస్పిటల్‌కు తరలించారు. సిద్ధార్థ్‌కు తన తల్లి, ఇద్దరు చెల్లెళ్లతో కలిసి నివసిస్తున్నారు.
సిద్ధార్థ్ 2004లో ‘షో‌బిజ్’ ద్వారా మోడలింగ్ రంగంలోకి అడుగుపెట్టారు. 2005లో టర్కీలో జరిగిన మోడలింగ్ పోటీల్లో కూడా పాల్గొన్నారు. ఆ తర్వాత పలు వాణిజ్య ప్రకటనల్లో నటిస్తూ 2008లో టెలివిజన్ రంగంలోకి అడుగుపెట్టారు. సోనీలో ప్రసారమయ్యే ‘బాబుల్ కా అంగాన్ చూటే నా’ సీరియల్ ద్వారా బుల్లితెర ప్రేక్షకులకు పరిచమయ్యారు. ఆ తర్వాత ‘లవ్ యు జిందగీ’, ‘పవిత్ర పునియా’ సీరియల్స్ ద్వారా మరింత గుర్తింపు పొందారు.
2012లో ‘బాలికా వధు’ (చిన్నారి పెళ్లికూతురు) సీరియల్‌లో కలెక్టర్ శివరాజ్ శేఖర్ పాత్రలో కనిపించారు. ఆ సీరియల్ సూపర్ హిట్ కావడంతో శుక్లాకు అభిమానులు పెరిగారు. బాధాకరమైన విషయం ఏమిటంటే.. ఆ సీరియల్‌లో ఆనంది పాత్ర పోషించిన ప్రత్యూష బెనర్జీ కూడా చనిపోయారు. 2016లో ముంబయిలోని తన ఫ్లాట్‌లో ఆత్మహత్య చేసుకుంది.
‘బాలిక వధు’ సీరియల్‌లో శుక్లా నటనకు పలు అవార్డులు కూడా దక్కాయి. దీంతో పలు రియాలిటీ షోల్లో కూడా శుక్లా పాల్గోని తన టాలెంట్ చూపించారు. శుక్లా క్రేజ్.. బిగ్ బాస్ వైపు అడుగులు వేయించింది. 2020లో ప్రసారమైన ‘బిగ్ బాస్’ సీజన్ 13 ద్వారా సిద్ధార్థ్ శుక్లా ప్రేక్షకులకు మరింత దగ్గరయ్యారు. అందులో అతడి వ్యక్తిత్వాన్ని చూసి ప్రేక్షకులు విజేతగా నిలిపారు. ఆల్ట్ బాలాజీ, మ్యాక్స్ ప్లేయర్‌ తదితర ఓటీటీల్లో ప్రసారమవుతున్న వెబ్ సీరిస్‌ల్లో కూడా శుక్లా నటిస్తున్నారు. ‘బిగ్ బాస్’ సీజన్ 14లో వీకెండ్ వార్‌లో సల్మాన్‌కు బదులు హోస్ట్‌గా కూడా శుక్లా ఆకట్టుకున్నారు.
Also Read: పవర్ స్టార్ @ 50: బాల్యం నుంచి నేటి వరకు.. పవన్ కళ్యాణ్ అరుదైన చిత్రాలు