Shakini-Dhakini: ‘శాకిని డాకిని’ రిలీజ్ డేట్ ఫిక్స్, యాక్షన్ కామెడీతో వస్తున్న రెజినా, నివేదా థామస్

రెజినా, నివేదా థామస్‌లు అదిరిపోయే కొరియన్ థ్రిల్లర్‌, కామెడీ మూవీతో ప్రేక్షకుల ముందుకు రాబోతున్నారు. మంగళవారం రిలీజ్ డేట్ ప్రకటించారు.

అందాల భామలు నివేదా థామస్, రెజీనా కసాండ్రా ప్రధాన పాత్రల్లో నటించిన తాజా సినిమా శాకిని-డాకిని. ఇది కొరియన్ సినిమాకు రీమేక్. ఈ సినిమా ఇప్పటికే షూటింగ్ పూర్తిచేసుకున్నా.. రిలీజ్‌కు మాత్రం నోచుకోవడం లేదు. ఎట్టకేలకు చిత్రయూనిట్ విడుదల తేదీని ప్రకటించారు. ఈ సినిమా సెప్టెంబర్ 16న జనాల ముందుకు రానుంది. ఈ చిత్రం తొలుత ఓటీటీలో విడుదల అవుతున్నట్లు ప్రకటనలు వచ్చాయి. అయితే, నిర్మాతలు థియేటర్లోనే విడుదల చేయాలని నిర్ణయించుకున్నారు. 

ఇద్దరు ముద్దుగుమ్మలు కీరోల్ ప్లే చేస్తున్న ఈ సినిమా ‘మిడ్‌ నైట్‌ రన్నర్స్‌’ అనే కొరియన్ సినిమాకు రీమేక్. ఈ సినిమాకు సుధీర్ వర్మ దర్శకత్వం వహిస్తున్నారు. కొరియన్ సినిమాలో ఇద్దరు యువకులు ప్రధాన పాత్రలు పోషించారు. అదే సినిమాను తెలుగులోకి వచ్చేసరికి ఇద్దరు అమ్మాయిలతో ప్లాన్ చేశాడు దర్శకుడు. ఉమెన్ సెంట్రిక్ మూవీగా తెరకెక్కించారు. ఈ సందర్భంగా కథలో చిన్న చిన్న మార్పులు చేసినట్లు తెలుస్తోంది. ఈ సినిమా పోస్ట్ ప్రొడక్షన్ పనులు కూడా పూర్తైనట్లు సమాచారం. త్వరలోనే ఈ చిత్రం టీజర్, ట్రైలర్లు విడుదలకానున్నాయి.  
 
ఇక సినిమా స్టోరీ విషయానికి వస్తే.. ఇద్దరు అమ్మాయిలు ట్రైనీ పోలీస్ ఆఫీసర్లు. అనుకోని పరిస్థితుల్లో అమ్మాయిలను వ్యభిచారంలోకి దింపే రౌడీ మూకల బారిన పడతారు. మానవ అక్రమ రవాణా నుంచి ఆ ఇద్దరు అమ్మాయిలు తమను తాము కాపాడుకుంటూనే.. మిగతా వారిని ఎలా రక్షించారు అనేదే సినిమా కథ. ఈ సినిమాలో ఇద్దరు హీరోయిన్ల క్యారెక్టర్లను దర్శకుడు వైవిధ్యభరితంగా రూపొందించినట్లు తెలుస్తోంది. 

సస్పెన్స్ థిల్లర్ గా కొనసాగే ఈ సినిమాను దగ్గుబాటి సురేశ్ బాబు, సునీత తాటి కలిసి నిర్మిస్తున్నారు. ఓ బేబి సినిమా తర్వాత వీరిద్దరి నిర్మాణ సంస్థలు కలిసి నిర్మిస్తున్న రెండో సినిమా ఇది. తొలుత ఈ సినిమా విడుదలపై సురేష్ బాబు కీలక వ్యాఖ్యలు చేశారు. ఈ చిత్రాన్ని ఓటీటీలో విడుదల చేసేందుకే మొగ్గు చూపుతున్నట్లు  చెప్పారు. ప్రస్తుతం జనాలు థియేటర్లకు వచ్చి సినిమాలు చూడటం కంటే ఓటీటీల్లోనే ఎక్కువగా సినిమాలు చూస్తున్నారని అభిప్రాయపడ్డారు. అందుకే ఈ సినిమాను కూడా ఓటీటీలోనే విడుదల చేయాలనుకుంటున్నట్లు చెప్పారు. కానీ, చివరకు ఈ సినిమాను థియేటర్లలోనే విడుదల చేసేందుకు నిర్మాణ సంస్థలు సిద్ధం కావడం విశేషం.
 
అటు తన తాజా మూవీ వకీల్ సాబ్‌ తో నివేదా థామస్ జనాలను ఎంతగానో ఆకట్టుకుంది. ఈ సినిమాలో తన నటనకు అందరూ ఫిదా అయ్యారు. మెస్మరైజింగ్ యాక్టింగ్ తో అదరగొట్టింది ఈ ముద్దుగుమ్మ. శాకిని-డాకిని సినిమాతో మరోసారి జనాలను అలరించేందుకు రెడీ అవుతోంది. ప్రస్తుతం నివేద థామస్ తమిళంతో పాటు తెలుగు సినిమాల్లో నటిస్తోంది. అటు రెజీనా మాత్రం శాకిని-డాకిని మీదే ఆశలు పెట్టుకుంది.