అక్కినేని నాగచైతన్య, సమంత ఎందుకు విడాకులు తీసుకున్నారు? ఈ ప్రశ్నకు ఇప్పటికీ చాలా మందికి సమాధానం తెలియదు. తెలుసుకోవాలని ఎంతో మంది ప్రయత్నిస్తున్నారు. అయితే... నాగార్జున ఈ విడాకుల మీద ఓ ఇంటర్వ్యూలో స్పందించినట్టు గురువారం ఉదయం నేషనల్ మీడియాలో కథనాలు వచ్చాయి. చై - సామ్ విడాకులపై షాకింగ్ కామెంట్స్ చేశారంటూ... విడాకులు తీసుకోవడానికి కారణం సమంత అని, ఆమె కోరడంతో చైతన్య విడాకులు ఇచ్చాడని ఆయన కొచ్చినట్టు రాసుకొచ్చాయి.
అసలు నాగార్జున ఏమన్నారని నేషనల్ మీడియా పేర్కొందంటే... "నాగచైతన్య, సమంతకు వివాహమైన నాలుగు సంవత్సరాల్లో విడిపోయే అంతటి సమస్య నాకు తెలిసినంత వరకూ రాలేదు. ఇద్దరూ ఎంతో ప్రేమగా ఉండేవారు. గత ఏడాది కొత్త సంవత్సర వేడుకలను కూడా కలిసే సెలబ్రేట్ చేసుకున్నారు. ఆ తర్వాతే ఏదో సమస్య వచ్చింది. దాంతో విడాకులు తీసుకోవాలని అనుకున్నారు. సమస్య ఏమిటన్నది నాకు కచ్చితంగా తెలియదు. కానీ, విడుదల కావాలని సమంతే కోరింది. విడాకులకు దరఖాస్తు చేసింది. దాంతో ఆమె నిర్ణయాన్ని చైతన్య గౌరవిస్తూ తన అంగీకారం తెలిపాడు. అయితే... విడాకుల విషయంలో నా గురించి చైతన్య ఎక్కువ బాధపడ్డాడు. నేను ఎలా స్పందిస్తానోనని ఎక్కువ ఆలోచించాడు. కుటుంబ పరువు ఏమవుతుంది? కుటుంబ మర్యాద ఏమవుతుంది? అని ఎక్కువ మథనపడ్డాడు" అని! ఈ వ్యాఖ్యలు నిజమా? కాదా? అనేది పక్కన పెడితే... సోషల్ మీడియా, ఎలక్ట్రానిక్ మీడియాలో వైరల్ అయ్యాయి.
విడాకుల తర్వాత సమంత మీద ఎక్కువ ట్రోల్స్ వచ్చాయి. ఓ దశలో విమర్శలు పెరగడంతో సమంత స్పందించక తప్పలేదు. ఆమెకు ఎవరితోనో సంబంధం ఉందని, డబ్బు కోసం విడాకులు తీసుకున్నారని, పిల్లల్ని కనడం ఇష్టం లేదని వచ్చిన పుకార్లను ఖండించారు. విడాకుల తర్వాత ఒక సందర్భంలో చచ్చిపోవాలని అనిపించినట్టు కూడా చెప్పుకొచ్చారు. తర్వాత తాను స్ట్రాంగ్ అయ్యానని ఆమె అన్నారు.
ఇక, నాగచైతన్య విషయానికి వస్తే... 'బంగార్రాజు' విడుదలకు ముందు ఇచ్చిన ఇంటర్వ్యూలో ఇద్దరి సంతోషం కోసమే విడాకులు తీసుకున్నట్టు తెలిపారు. అంతకు మించి విడాకుల గురించి నాగచైతన్య స్పందించలేదు. ఎక్కువ సందర్భాల్లో అతను మౌనం వహిస్తున్నారు. తనపై విమర్శలు వస్తున్నాయి కనుక సమంత స్పందించక తప్పడం లేదు. అయితే... విడాకుల తర్వాత ఎవరి సినిమాలు వారు చేసుకుంటున్నారు. ఇప్పట్లో ఇద్దరూ కలిసి నటించే అవకాశాలు లేకపోవచ్చు. కానీ, సమంతతో బెస్ట్ ఆన్ స్క్రీన్ కెమిస్ట్రీ షేర్ చేసుకున్నట్టు ఇటీవల నాగచైతన్య చెప్పడం విశేషం.