బాలీవుడ్ స్టార్ హీరో సల్మాన్ ఖాన్, అతడి తండ్రి సలీమ్ ఖాన్ లను చంపేస్తామంటూ కొందరు దుండగులు బెదిరింపులకు పాల్పడిన సంగతి తెలిసిందే. పంజాబ్ సింగర్ సిద్ధూకి పట్టిన గతే మీకు కూడా పడుతుందని కొన్ని రోజుల క్రితం లెటర్ పంపించారు. ఈ విషయంలో సల్మాన్ ఖాన్.. బాంద్రా పోలీసులకు ఫిర్యాదు కూడా చేశారు. అయితే ఇప్పుడు సల్మాన్ ఖాన్ గన్ లైసెన్స్ కోసం ప్రయత్నిస్తున్నట్లు తెలుస్తోంది.
ఇందులో భాగంగా ఈరోజు సల్మాన్ ఖాన్ ముంబై పోలీస్ హెడ్ క్వార్టర్స్ ను విజిట్ చేశారు. గన్ లైసెన్స్ కోసం సంబంధిత అధికారులతో మీటింగ్ లో పాల్గొన్నారు. తనకు, తన ఫ్యామిలీ మెంబర్స్ భద్రత కోసం గన్ లైసెన్స్ మంజూరు చేయమని రిక్వెస్ట్ చేసినట్లు తెలుస్తోంది. త్వరలోనే సల్మాన్ కి గన్ లైసెన్స్ వచ్చే ఛాన్స్ ఉంది.
ఇదివరకు కూడా సల్మాన్ ఖాన్ ను చంపేస్తామంటూ బెదిరింపులు వచ్చాయి. కృష్ణ జింకను దైవంగా భావించే లారెన్స్ బిష్ణోయ్.. కృష్ణజింకల వేట కేసులో ఆరోపణలు ఎదుర్కొన్న సల్మాన్‌ను చంపేస్తామని కోర్టు ఆవరణలోనే సంచలన వ్యాఖ్యలు చేశారు. బిష్ణోయ్ ముఠా.. సల్మాన్ హత్యకు ప్లాన్ చేశారని.. పోలీసులు ఆ ప్రయత్నాన్ని అడ్డుకున్నారని చెబుతుంటారు. ఇక సల్మాన్ ఖాన్ సినిమాల విషయానికొస్తే.. ఇటీవల ఆయన 'కభీ ఈద్ కభీ దివాలి' అనే సినిమాను మొదలుపెట్టారు. పూజాహెగ్డే హీరోయిన్ గా నటిస్తోన్న ఈ సినిమా షూటింగ్ దశలో ఉంది. అలానే సల్మాన్ ఖాన్ ను 'టైగర్ 3' సినిమాలో చూడబోతున్నారు ప్రేక్షకులు. ఇందులో కత్రినా కైఫ్ హీరోయిన్ గా నటిస్తోంది.