జాతిరత్నాలు దర్శకుడు అనుదీప్ దర్శకత్వంలో, తమిళ హీరో శివ కార్తికేయన్ హీరోగా నటించిన ‘ప్రిన్స్’ దీపావళికి థియేటర్లలో విడుదల అయింది. అయితే ప్రేక్షకుల వద్ద నుంచి ఈ సినిమాకు మిశ్రమ స్పందన లభించింది. ఈ సినిమా ఇప్పుడు ఓటీటీలో విడుదలకు సిద్ధం అవుతోంది.
నవంబర్ 25వ తేదీ నుంచి డిస్నీప్లస్ హాట్‌స్టార్ ఓటీటీ ప్లాట్‌ఫాంలో ఈ సినిమా విడుదల కానుంది. ఈ విషయాన్ని డిస్నీప్లస్ హాట్‌స్టార్ తమ తమిళ అధికారిక పేజీ ద్వారా ప్రకటించారు. అనుదీప్ మొదటి సినిమా జాతిరత్నాలు థియేటర్ల వద్ద సూపర్ హిట్ కాగా, ఓటీటీలో మిశ్రమ స్పందనను అందుకుంది. ప్రిన్స్‌కు థియేటర్ల వద్ద మిశ్రమ స్పందన ఎదురైంది. ఓటీటీల్లో ఆదరణ లభిస్తుందేమో చూడాలి.
టాలీవుడ్‌లో టాప్ ప్రొడక్షన్ హౌస్‌లు అయిన శ్రీ వెంకటేశ్వర సినిమాస్, సురేష్ ప్రొడక్షన్స్ ఈ సినిమాను సంయుక్తంగా నిర్మించాయి. శాంతి టాకీస్ నిర్మాణ భాగస్వామిగా ఉంది. నారాయణ్ దాస్ కె. నారంగ్, సురేష్ బాబు, పుస్కూర్ రామ్ మోహన్ రావు ఈ సినిమాకు నిర్మాతలుగా వ్యవహరిస్తున్నారు. ఈ చిత్రానికి థమన్ సంగీతం అందించారు.
ఒక భారతీయ కుర్రాడు, వేరే దేశానికి చెందిన అమ్మాయిని ప్రేమించడం వల్ల కలిగే ఇబ్బందులను ఈ సినిమాలో ఫన్నీగా చూపించారు. 'సీమ రాజా', 'రెమో', 'డాక్టర్', 'డాన్' సినిమాలతో శివకార్తికేయన్ తెలుగు ప్రేక్షకులకు ఇప్పటికే దగ్గరయ్యారు. ఈ నేపథ్యంలో ప్రపంచ వ్యాప్తంగా తెలుగు, తమిళ భాషల్లో భారీ ఎత్తున ఈ సినిమాను విడుదల చేశారు.
ఇక అనుదీప్ చేతిలో కూడా రెండు సినిమాలు ఉన్నట్లు తెలుస్తోంది. విక్టరీ వెంకటేష్‌తో హారిక హాసిని బ్యానర్‌లో ఒక సినిమా అనుకుంటున్నామని.. ఇంకా కథ ఓకే అవ్వలేదని చెప్పారు. అలానే హీరో రామ్‌కి ఒక కథ చెప్పాలని అన్నారు. హారిక హాసిని, మైత్రి మూవీ మేకర్స్ అంటే టాప్ ప్రొడక్షన్ హౌస్ లు. ఈ బ్యానర్స్ లో సినిమాలు పడి క్లిక్ అయితే అనుదీప్ టాప్ డైరెక్టర్ల లిస్ట్ లో చేరడం గ్యారెంటీ. మరేం జరుగుతుందో చూడాలి.