Kireeti Reddy's Junior OTT Release On Aha: కర్ణాటక మాజీ మంత్రి, ప్రముఖ బిజినెస్ మ్యాన్ గాలి జనార్దన్ రెడ్డి కుమారుడు గాలి కిరీటి రెడ్డి, యంగ్ బ్యూటీ శ్రీలీల జంటగా నటించిన లేటెస్ట్ లవ్ రొమాంటిక్ యాక్షన్ డ్రామా 'జూనియర్'. రాధాకృష్ణ రెడ్డి దర్శకత్వం వహించిన ఈ మూవీ జులై 18న ప్రేక్షకుల ముందుకు రాగా మిక్స్డ్ టాక్ సొంతం చేసుకుంది. అయితే, కిరీటి రెడ్డి నటన, డ్యాన్స్కు మంచి మార్కులే పడ్డాయి. కిరీటి, శ్రీలీల వైరల్ వయ్యారి పాట ఇప్పటికీ ట్రెండింగ్గా నిలిచింది.
ఎప్పుడు, ఎందులో స్ట్రీమింగ్ అంటే?
ఈ మూవీ డిజిటల్ స్ట్రీమింగ్ హక్కులను ప్రముఖ ఓటీటీ 'ఆహా' సొంతం చేసుకోగా తాజాగా స్ట్రీమింగ్ డేట్ను అఫీషియల్గా అనౌన్స్ చేశారు. ఈ నెల 22 నుంచి మూవీ ఓటీటీలోకి అందుబాటులోకి రానుంది. 'ప్రేమ, కలలు, ఒక షాకింగ్ నిజం. అన్నీ జూనియర్ మూవీలో చూడండి.' అని క్యాప్షన్ ఇస్తూ సదరు ఓటీటీ సంస్థ ఓ పోస్టర్ రిలీజ్ చేసింది.
Also Read: ఓటీటీలోకి వచ్చేసిన 'మహావతార్ నరసింహ' - రూ.300 కోట్ల డివోషనల్ విజువల్ వండర్ ఇప్పుడే చూసేయండి
ఈ మూవీకి రాధాకృష్ణారెడ్డి దర్శకత్వం వహించగా... ప్రముఖ నిర్మాత సాయి కొర్రపాటికి చెందిన వారాహి చలన చిత్ర బ్యానర్పై రజనీ కొర్రపాటి నిర్మించారు. మూవీలో కిరీటి, శ్రీలీలతో పాటుగా బొమ్మరిల్లు ఫేం, స్టార్ హీరోయిన్ జెనీలియా కీలక పాత్ర పోషించారు. కన్నడ యాక్టర్ రవిచంద్రన్, రావు రమేశ్, సత్య, వైవా హర్ష, సుధారాణి, అచ్యుత్ కుమార్ కీలక పాత్రలు పోషించారు.
కథ ఏంటంటే?
తన జీవితంలో జ్ఞాపకాలే ముఖ్యమని నాలుగేళ్ల ఇంజినీరింగ్ లైఫ్ను ఫ్రెండ్స్తో సరదాగా గడిపేస్తాడు అభి (కిరీటి). చిన్నప్పటి నుంచి తాను కోల్పోయిన జీవితాన్ని, జ్ఞాపకాలను పోగు చేసుకుంటాడు. ఇక తమకు లేక లేక పుట్టిన కొడుకని అభిపై అతి ప్రేమ చూపిస్తుంటాడు తండ్రి (రవిచంద్రన్). ఇది తట్టుకోలేక చదువు పూర్తైన తర్వాత తండ్రికి దూరంగా వెళ్లాలనుకుని ఓ పెద్ద కంపెనీలో ఉద్యోగానికి జాయిన్ అవుతాడు. ఇదే ఆఫీస్లో తాను ఇష్టపడ్డ స్ఫూర్తి (శ్రీలీల) కూడా జాబ్ చేస్తుంటుంది.
అయితే, కంపెనీలో చేరిన ఫస్ట్ డేనే బాస్ విజయ (జెనీలియా)కు అభిపై బ్యాడ్ ఇంప్రెషన్ వస్తుంది. ఆమెకు తన పేరుతోనే ఉన్న విజయనగరం అన్నా నచ్చదు. అలాంటి విజయ విధి లేని పరిస్థితుల్లో తనకి ఇష్టం లేని ఊరికి ఇష్టం లేని అభితో వెళ్లాల్సి వస్తుంది. అక్కడకు వెళ్లిన తర్వాత ఏం జరిగింది? అసలు విజయకు ఆ ఊరికి సంబంధం ఏంటి? అభి తండ్రికి ఆ ఊరికి సంబంధం ఏంటి? ఇందులో స్ఫూర్తి పాత్ర ఏంటి? ఇవన్నీ తెలియాలంటే మూవీ చూడాల్సిందే.