క్రికెట్ ప్రపంచంలో తనకంటూ ఓ ప్రత్యేక స్థానం సంపాదించుకున్న టీమిండియా మాజీ కెప్టెన్ ఎంఎస్ ధోనీ, సినిమా ప్రపంచంలోకి అడుగు పెట్టారు. రీసెంట్ గా ధోని ఎంటర్‌టైన్‌మెంట్ అనే నిర్మాణ సంస్థను స్థాపించారు. ఈ సంస్థ నుంచి అతడి భార్య సాక్షి నిర్మాతగా ‘ఎల్‌జీఎం’ చిత్రం తెరకెక్కుతోంది. ఫీల్ గుడ్ మూవీగా రూపొందుతున్న ఈ సినిమాకు రమేష్ తమిళ మణి దర్శకత్వం వహిస్తున్నారు. హరీష్ కల్యాణ్, ఇవానా (లవ్ టుడే ఫేమ్), యోగి బాబు, మిర్చి విజయ్, నదియా సహా పలువురు కీలక పాత్రలు పోషిస్తున్నారు.
సీఎస్‌కే టీమ్‌లో చేర్చుకోమన్న యోగిబాబు
తాజాగా ‘ఎల్‌జీఎం’ సినిమాకు సంబంధించిన ట్రైలర్ రిలీజ్ వేడుక చెన్నైలో ఘనంగా జరిగింది. చిత్రబృందంతో పాటు ధోనీ, ఆయన సతీమణి సాక్షి ఈ వేడుకలో పాల్గొన్నారు. ఈ సందర్భంగా ఈ మూవీలో కీలక పాత్ర పోషిస్తున్న హాస్య నటుడు యోగి బాబు ధోనీని ఓ ప్రశ్న అడిగారు. చెన్నై సూపర్ కింగ్స్ టీమ్ లోకి తనను చేర్చుకోవాలని కోరారు. దీంతో ధోనీ అదిరిపోయే రిప్లై ఇచ్చారు. “చెన్నై టీమ్‌లో రాయుడు రిటైర్ అయ్యాడు. ప్రస్తుతం రాయుడు స్థానం ఖాళీగా ఉంది. నేను టీమ్ మేనేజ్మెంట్ తో మాట్లాడతాను. కానీ మీరు(యోగిబాబు) సినిమా షూటింగ్స్ తో బిజీగా ఉన్నారు. మా టీమ్ తరఫున ఆడితే మీరు నిలకడగా ఆడాలి. మీకు ఇంకో విషయం చెబుతున్నా. అసలే మావాళ్లు ఫుల్ స్పీడ్‌తో బాల్స్ వేస్తారు. మిమ్మల్ని గాయపరచడానికి వాళ్లు ప్రయత్నిస్తారు. జాగ్రత్తగా ఆడాలి’ అని అనడంతో అక్కడున్నవాళ్లంతా నవ్వుల్లో మునిగిపోయారు.
ముగ్గురి చుట్టూ తిరిగే ఓ సరదా కథ
ఇక ‘ఎల్‌జీఎం’ సినిమా గురించి ధోని మాట్లాడుతూ.. “ఈ సినిమా క్లీన్ ఫ్యామిలీ ఎంటర్‌టైనర్. ఈ సినిమా షూటింగ్ తక్కువ సమయంలో కంప్లీట్ అయ్యింది. ఈ సినిమాను ఫ్యామిలీ మెంబర్స్ అందరూ చూడవచ్చు. మూవీ అందరికీ నచ్చుతుంది. నా భార్య, కూతురుతో కూర్చుని ఈ సినిమా చూశాను. మా పాప బాగా ఎంజాయ్ చేసింది. ఈ సినిమా ముగ్గురి చుట్టూ తిరిగే ఓ సరదా కథ. తల్లి, భార్య మధ్య నలిగిపోయే పాత్రలో హీరో అద్భుతంగా నటించారు. ఈ సినిమా మీకందరికీ తప్పకుండా నచ్చుతుంది. నేనైతే మూవీని చాలా ఎంజాయ్ చేశాను” అని చెప్పారు.
ఆకట్టుకుంటున్న‘ఎల్‌జీఎం’ ట్రైలర్
ఇక ‘ఎల్‌జీఎం’ ట్రైలర్ వినోదం, భావోద్వేగాల మేళవింపుతో నిండిపోయింది. మీరాతో ప్రేమలో ఉన్న గౌతమ్, తన తల్లికి దూరంగా ఉండటం ఇష్టం ఉండదు. మీరాను పెళ్లి చేసుకుని తన తల్లితో కలిసి జీవించాలనుకుంటున్నాడు. మీరా ఈ నిర్ణయం పట్ల అసంతృప్తిగా ఉంటుంది. కూర్గ్ వెకేషన్ కు వెళ్లాలని ఇద్దరు భావిస్తారు. ఈ హాలీడే ట్రిప్ సందర్భంగా తమ బంధం మరితం బలపడుతుందని గౌతమ్ నమ్ముతాడు. అతడి ప్లాన్ అనుకున్నట్లు వర్కవుట్ అయ్యిందా? ఇవానా అత్తగారితో హాయిగా ఉంటుందా? ఆ తర్వాత ఏం జరిగింది? అనే విషయాలను ఈ ట్రైలర్ లో ప్రస్తావించారు. ధోని ఎంటర్‌టైన్‌మెంట్స్ నిర్మిస్తున్న ‘ఎల్‌జీఎం’(లెట్స్ గెట్ మ్యారీడ్) విడుదల తేదీని త్వరలో ప్రకటించనున్నారు.
Read Also: అమరావతికి అటు అమ్మ, ఇటు నాన్న- ‘గుంటూరు కారం’ అసలు కథ ఇదేనా?, ఆ టైటిల్ ఎందుకు మార్చారు?
ముఖ్యమైన, మరిన్ని ఆసక్తికర కథనాల కోసం ‘టెలిగ్రామ్’లో ‘ఏబీపీ దేశం’లో జాయిన్ అవ్వండి.
Join Us on Telegram: https://t.me/abpdesamofficial