నవీన్ పోలిశెట్టి, అనుష్క శెట్టి హీరో, హీరోయిన్లుగా నటిస్తున్న సినిమా ‘మిస్ శెట్టి మిస్టర్ పోలిశెట్టి’. సెప్టెంబర్ 7వ తేదీన ఈ సినిమా ప్రేక్షకుల ముందుకు రానుంది. ఇప్పుడు ఈ సినిమా ట్రైలర్‌ను నిర్మాతలు విడుదల చేశారు. మంచి ఫన్ ఎలిమెంట్స్‌తో, ఫీల్ గుడ్ ఎంటర్‌టైనర్ అనిపించేలా ట్రైలర్‌ను కట్ చేశారు. తెలుగులో కామెడీ మీద బేస్ అయిన మంచి లవ్ స్టోరీ వచ్చి చాలా కాలం అయింది. ఆ లోటును ‘మిస్ శెట్టి మిస్టర్ పోలిశెట్టి’ తీర్చే అవకాశం ఉంది. ముఖ్యంగా నవీన్ పోలిశెట్టి కామెడీ టైమింగ్ ఎక్సలెంట్ అని చెప్పవచ్చు.
‘అమ్మాయిలకి అబ్బాయిలు నచ్చాలంటే చాలా పెద్ద లిస్ట్ ఉంటుంది బ్రో… కానీ అబ్బాయిలకి లిస్ట్ ఏంవుండదు. జస్ట్ అమ్మాయి అయితే చాలు!’, ‘సీసీటీవీ కెమెరా ఉంది అక్కడ. నాకేం ప్రాబ్లం లేదు. వైరల్ అయిపోతాం.’ లాంటి నేటి యూత్ కనెక్ట్ అయ్యే ఫన్నీ డైలాగ్స్‌తో ట్రైలర్‌ను నింపేశారు. ఈ డైలాగులకు నవీన్ పోలిశెట్టి మార్కు డైలాగ్ డెలివరీ యాడ్ అయి మరింత హిలేరియస్‌గా మారిపోయాయి. ఇది సాధారణ లవ్ స్టోరీ మాత్రమే కాదని, అంతకు మించిందేదో ఉందనే హింట్ కూడా ట్రైలర్‌లో ఇచ్చారు.
‘మిస్ శెట్టి మిస్టర్ పోలిశెట్టి’ సినిమాలో నవీన్ పోలిశెట్టి స్టాండప్ కమెడియన్ పాత్రలో, అనుష్క శెట్టి ఫేమస్ షెఫ్ పాత్రలో నటించారు. ఈ సినిమాని యూవీ క్రియేషన్స్ బ్యానర్‌పై వంశీ, ప్రమోద్ నిర్మించారు. సందీప్ కిషన్, జగపతి బాబు, రెజీనా, కళ్యాణి ప్రధాన తారలుగా 'రారా కృష్ణయ్య' అనే చిత్రాన్ని తెరకెక్కించిన పి. మహేష్ బాబు ఈ సినిమాకు దర్శకత్వం వహించారు. ఇది అనుష్కకు 48వ చిత్రం. యూవీ క్రియేషన్స్, అనుష్క కాంబినేషన్‌లో 'మిర్చి', 'భాగమతి' సినిమాలు భారీ విజయాలు సాధించాయి. ఇప్పుడు ‘మిస్ శెట్టి మిస్టర్ పోలిశెట్టి’ సినిమాతో హ్యాట్రిక్ మీద కన్నేశారు.
తొలుత 'మిస్ శెట్టి మిస్టర్ పోలిశెట్టి' సినిమాని ఆగస్టు 4వ తేదీన విడుదల చేయడానికి సన్నాహాలు చేశారు. కానీ పోస్ట్ ప్రొడక్షన్ పనుల్లో ఆలస్యం కారణంగా వాయిదా వేసినట్లు నిర్మాణ సంస్థ పేర్కొంది. తర్వాత ఆగస్టు 18వ తేదీన 'మిస్ శెట్టి మిస్టర్ పోలిశెట్టి' విడుదల కావచ్చని వార్తలు వచ్చాయి. ఆ ఊహాగానాలకు తెర దించుతూ సెప్టెంబర్ 7వ తేదీన చిత్రాన్ని ప్రేక్షకుల ముందుకు తీసుకు రానున్నట్లు అధికారికంగా ప్రకటించారు. తెలుగు, తమిళ, కన్నడ, మలయాళ భాషల్లో ఈ సినిమాను విడుదల చేస్తున్నారు. అదే రోజు విడుదల కానున్న షారుక్ ఖాన్ ‘జవాన్’ సినిమాతో 'మిస్ శెట్టి మిస్టర్ పోలిశెట్టి' పోటీ పడనుంది.
ఇక అనుష్క సినిమా థియేటర్లలోకి వచ్చి ఐదేళ్ళు పైనే అవుతోంది. 'భాగమతి' 2018లో విడుదల అయింది. ఆ తర్వాత ఆమె నటించిన 'నిశ్శబ్దం' అమెజాన్ ప్రైమ్ వీడియో ఓటీటీలో విడుదలైంది. మధ్యలో మెగాస్టార్ చిరంజీవి 'సైరా నరసింహా రెడ్డి'లో చిన్న అతిథి పాత్రలో కనిపించారు. కాబట్టి అనుష్క సినిమా కోసం అభిమానులు ఎన్నో రోజులుగా ఎదురు చూస్తున్నారు. 2021లో వచ్చిన ‘జాతి రత్నాలు’ తర్వాత నవీన్ పోలిశెట్టి నటిస్తున్న సినిమా ఇదే. దాదాపు రెండేళ్లు ఈ సినిమా మీదనే గడిపేశారు నవీన్. సితార ఎంటర్‌టైన్‌మెంట్స్ బ్యానర్‌పై ‘అనగనగా ఒక రాజు’ అనే సినిమాను కూడా ప్రకటించారు. దాని షూటింగ్ త్వరలో ప్రారంభం అయ్యే అవకాశం ఉంది. ఈ సినిమా సినిమా శాటిలైట్, డిజిటల్ స్ట్రీమింగ్ రైట్స్‌ను జీ సంస్థ దక్కించుకుంది.
ముఖ్యమైన, మరిన్ని ఆసక్తికర కథనాల కోసం ‘టెలిగ్రామ్’లో ‘ఏబీపీ దేశం’లో జాయిన్ అవ్వండి.
Join Us on Telegram: https://t.me/abpdesamofficial