కోలీవుడ్ స్టార్ హీరో విజయ్ నటిస్తున్న లేటెస్ట్ సినిమా 'బీస్ట్'. ఇందులో పూజా హెగ్డే హీరోయిన్. 'డాక్టర్'తో తెలుగులోనూ మంచి విజయం అందుకున్న నెల్సన్ దిలీప్ కుమార్ దర్శకత్వం వహిస్తున్నారు. నిర్మాణ సంస్థ సన్ పిక్చర్స్ ఈ సినిమాకు సంబంధించిన మేజర్ అప్‌డేట్‌ను ఈ రోజు ఇచ్చింది.
'బీస్ట్' సినిమాలో తొలి పాట 'అరబిక్ కుతు'ను ప్రేమికుల దినోత్సవం సందర్భంగా ఫిబ్రవరి 14న విడుదల చేయనున్నట్టు ప్రకటించారు. ఫస్ట్ సాంగ్ ఎలా చేయాలనే విషయమై సంగీత దర్శకుడు అనిరుద్ రవిచంద్రన్, దర్శకుడు నెల్సన్ దిలీప్ కుమార్ డిస్కషన్స్ చేసుకున్న వీడియోను కూడా విడుదల చేశారు. అందులో హీరో శివ కార్తికేయన్ కూడా కనిపించారు. అరబిక్ స్టైల్ లో ఈ సాంగ్ ఉండబోతోందని తెలుస్తోంది. 'అందరూ పాన్ వరల్డ్ అంటున్నారు. మనం పాన్ వరల్డ్ సాంగ్ చేద్దాం. అరబిక్ స్టైల్ లో చేద్దాం' అని అనిరుద్ రవిచందర్ అనడం... పాట గురించి విజయ్ కు చెప్పడం... వీడియోను బాగా డిజైన్ చేశారు. ఈ పాటను హీరో శివ కార్తికేయన్ రాశారు.
అనిరుద్ రవిచందర్ సంగీతం అందిస్తున్న 'బీస్ట్'కు మనోజ్ పరమహంస సినిమాటోగ్రాఫర్. ప్రభాస్ 'రాధే శ్యామ్' సినిమాకూ ఆయనే సినిమాటోగ్రఫీ అందించారు. ఏప్రిల్ 14న సినిమా విడుదల కానుంది. అదే రోజున కన్నడ స్టార్ హీరో యష్ బ్లాక్ బస్టర్ సినిమా 'కె.జి.యఫ్' సెకండ్ చాఫ్టర్ కూడా రిలీజ్ కానున్న సంగతి తెలిసిందే. పరిస్థితులను బట్టి రవితేజ 'రామారావు ఆన్ డ్యూటీ' కూడా వచ్చే అవకాశం ఉంది. మార్చి 25 లేదా ఏప్రిల్ 15న సినిమాను విడుదల చేయాలని అనుకుంటున్నట్టు వెల్లడించిన సంగతి తెలిసిందే.