మీరా జాస్మిన్.. ఒకప్పుడు తమిళ్, తెలుగు చిత్ర పరిశ్రమలలో ఎన్నో అద్భుత సినిమాల్లో నటించింది. టాప్ హీరోలతో కలిసి పని చేసింది. ఈమె ఏడాదికి అర డజన్ కు పైగా సినిమాల్లో నటించిన సందర్భాలున్నాయి. కన్నడ, మలయాళ సినిమాలు కూడా చేసింది. 2010 తర్వాత సినిమాలు చేయడం తగ్గించింది. కొద్ది కాలం తర్వాత పూర్తిగా సినిమాలకే దూరం అయ్యింది. సుమారు దశాబ్దం తర్వాత సెకెండ్ ఇన్నింగ్స్ మొదలు పెట్టింది మీరా. రీసెంట్ గా ‘టెస్ట్’ అనే తమిళ సినిమాలో నటిస్తోంది. ఈ సినిమా ప్రమోషన్ లో భాగంగా ఓ ఇంటర్వ్యూ లో పాల్గొన్న ఆమె, తను సినిమా పరిశ్రమకు ఎందుకు దూరంగా ఉండాల్సి వచ్చిందో వివవరించే ప్రయత్నం చేసింది.
సినిమాలకు ఎందుకు దూరం అయ్యానంటే?
హీరోయిన్ గా చక్కటి ప్రయాణాన్ని కొనసాగించినట్లు మీరా జాస్మిన్ తెలిపింది. “హీరోయిన్ గా చాలా చక్కటి ప్రయాణాన్ని కొనసాగించాను. నటిగా ప్రేక్షకుల నుంచి మంచి ఆదరణ దక్కించుకోవడం చాలా గొప్పగా ఫీలవుతున్నాను. సినిమాలకు దూరం కావడానికి పెద్దగా కారణాలు ఏమీ లేవు. వ్యక్తిగతంగా నన్ను నేను మెరుగుపరుచుకోవాలి అనే ఉద్దేశంతోనే సినిమాలు చేయలేదు. ప్రస్తుతం మళ్లీ సినిమాలు చేస్తున్నాను. నటిగా నా ప్రయాణం మళ్లీ మొదలైనట్లు భావిస్తున్నాను” అని చెప్పింది.
‘టెస్ట్’ ప్రేక్షకులకు బాగా నచ్చుతుంది!
ఇక ‘టెస్ట్’ సినిమా గురించి మీరా జాస్మిన్ పలు విషయాలు వెల్లడించింది. “మాధవన్‌, సిద్ధార్థ్‌తో కలిసి పని చేయడం చాలా సంతోషంగా ఉంది. ఇప్పటికే వారితో కలిసి పని చేశాను. మరోసారి వారితో నటించడం మంచి అనుభూతిని కలిగిస్తోంది. సౌత్ లేడీ సూపర్ స్టార్ గా పేరు సంపాదించుకున్న నయనతారతో కలిసి తొలిసారి నటిస్తున్నాను. ఆమెతో కలిసి స్క్రీన్ షేర్ చేసుకోవడం గొప్పగా భావిస్తున్నాను. దర్శకుడు శశికాంత్ నాకు ఈ సినిమా కథను చెప్పగానే చాలా నచ్చింది. వెంటనే ఓకే చెప్పాను. ఈ సినిమా క్రికెట్ నేపథ్యంలో కొనసాగుతుంది. ప్రేక్షకులకు బాగా నచ్చుతుంది అని భావిస్తున్నాను” అని చెప్పుకొచ్చింది.
‘రన్’ చిత్రంతో తెలుగు ప్రేక్షకులకు పరిచయం
మీరా జాస్మిన్ ఇప్పటికే ‘రన్’, ‘యువ’ సినిమాల్లో మాధన్ తో కలిసి నటించింది. ఈ రెండు సినిమాలు ప్రేక్షకులను బాగా ఆకట్టుకున్నాయి. అటు సిద్దార్థ్ తోనూ ఆమె స్క్రీన్ షేర్ చేసుకుంది. ఈ ఇద్దరు కలిసి నటించిన ‘యువ’ సినిమా అప్పట్లో మంచి విజయాన్ని అందుకుంది. ఇక మీరా జాస్మిన్ హీరోయిన్ గా నటించిన చివరి తమిళ చిత్రం ‘విజ్ఞాని’. 2014లో వచ్చిన సినిమా ప్రేక్షకులను బాగానే ఆకట్టుకుంది. వాస్తవానికి డబ్బింగ్ మూవీగా వచ్చిన ‘రన్’ చిత్రంతో మీరా తెలుగు ఆడియెన్స్ కు పరిచయం అయ్యింది. ఆ తర్వాత ‘అమ్మాయి బాగుంది’ సినిమాతో డైరెక్టుగా తెలుగు సినిమా చేసింది. ఈ సినిమా మంచి ప్రేక్షకాదరణ పొందింది. తొలి చిత్రంతోనే మంచి క్రేజ్ సంపాదించుకుంది. ఆ తర్వాత మీరాకు వరుస అవకాశాలు వచ్చాయి. ‘గుడుంబా శంకర్‌’, ‘భద్ర’, ‘రారాజు’, ‘మహారథి’, ‘బంగారు బాబు’ లాంటి సినిమాలతో అద్భుత విజయాలు అందుకుంది. తెలుగులో టాప్ హీరోయిన్ గా ఎదిగింది. సుమారు దశాబ్దం తర్వాత రీసెంట్ గా ‘విమానం’ సినిమాతో రీ ఎంట్రీ ఇచ్చింది. ఇందులో ఎయిర్ హోస్టెస్ గా ఆకట్టుకుంది. పాత్ర నిడివి తక్కువే అయినా, చక్కటి గుర్తింపు పొందింది. ప్రస్తుతం ఈ చిత్రం ఓటీటీలో అందుబాటులో ఉంది.
Read Also: గుర్తుపట్టలేనంతగా మారిపోయిన సమంత, ఆరు నెలలు చాలా కఠినమంటూ సెల్ఫీతో షాకిచ్చిన సామ్!
Join Us on Telegram: https://t.me/abpdesamofficial