టాలీవుడ్ నటి సమంతకు సినిమాలు, వెబ్ సీరిస్‌ల్లో అవకాశాలు వస్తున్నా.. అనారోగ్య సమస్యల వల్ల వెనకడుగు వేస్తోంది. తన సమస్య నుంచి పూర్తిగా కోలుకున్న తర్వాతే డేట్స్ ఇవ్వాలని నిర్ణయించుకుంది. ఈ సందర్భంగా సినిమాలకు కూడా బ్రేక్ ఇస్తున్నట్లు వార్తలు వస్తున్నాయి. అయితే, ఈ విషయంపై సమంత నేరుగా ప్రకటించకపోయినా.. తన ఇన్‌స్టాగ్రామ్ స్టోరీ ద్వారా పరోక్ష వ్యాఖ్యలు చేసింది. ఈ సందర్భంగా ఆమె పోస్ట్ చేసిన ఫొటో చూస్తే మీరు తప్పకుండా ఆశ్చర్యపోతారు.
తాజాగా ఆమె పోస్ట్ చేసిన స్టోరీలో మరోసారి భావోద్వేగ వ్యాఖ్యలు చేసింది. ‘‘ఈ ఆరు నెలలు చాలా సుదీర్ఘంగా, కష్టతరంగా గడిచాయి. ఎట్టకేలకు దీన్ని ముగించాల్సిన టైమ్ వచ్చింది’’ అని ఆమె పేర్కొంది. ఈ సందర్భంగా ఆమె పోస్ట్ చేసిన సెల్ఫీ ఫొటో చూస్తే అస్సలు గుర్తుపట్టలేరు. మేకప్ లేకపోవడం వల్లో, లేదో అలసట వల్లో సమంత చాలా వీక్‌గా కనిపిస్తోంది. ఈ పిక్ చూసిన ఆమె అభిమానులు చాలా వర్రీ అవుతున్నారు. ‘బీ బ్రేవ్ అండ్ స్ట్రాంగ్’ అని కామెంట్లు చేస్తున్నారు. త్వరలోనే పూర్తి ఆరోగ్యంతో తిరిగి రావాలని కోరుకుంటున్నామని కామెంట్లు చేస్తున్నారు.
సమంతా ఇటీవలే ‘ఖుషీ’ మూవీ షూటింగ్ ముగించుకుంది. మరోవైపు ‘సిటాడెల్’ షెడ్యూల్ కూడా పూర్తి చేసుకున్నట్లు సమాచారం. తాజాగా ఆమె ముంబయి ఎయిర్ పోర్టులో ప్రత్యక్షమైంది. ముఖానికి మాస్క్ పెట్టుకుంది. అయితే, షూటింగ్ కోసం ముంబయికి వెళ్లిందా? లేదా అక్కడి నుంచి అమెరికాకు ట్రీట్మెంట్ కోసం ప్రయాణం అవుతుందా అనేది తెలియాల్సి ఉంది.
మయోసైటిస్ వల్ల సమంత ఆల్రెడీ సైన్ చేసిన కొన్ని ప్రాజెక్ట్స్ ను క్యాన్సిల్ చేసుకుందని, నిర్మాతల దగ్గర తీసుకున్న అడ్వాన్సులు కూడా తిరిగి వెనక్కి ఇచ్చేసిందనే వార్తలు కూడా చక్కర్లు కొడుతున్నాయి. యేడాది పాటు వర్క్ నుంచి బ్రేక్ తీసుకొని, ఆరోగ్యంపై శ్రద్ధ పెట్టాలని నిర్ణయించుకున్నట్లు తెలిసింది. తాజా పోస్టును చూస్తే సమంత నిర్ణయం నిజమే అనిపిస్తోంది.
చికిత్స కోసం అంత ఖర్చవుతుందా?
సమంతను వేధిస్తోన్న మయోసైటిస్‌కు చికిత్స అంత ఈజీ కాదు. ఇందుకు మనసును ప్రశాంతంగా ఉంచుకోవడం చాలా అవసరం. అలాగే యోగా, మెడిటేషన్‌కు పూర్తి సమయం కేటాయించాల్సి ఉంటుంది. కేవలం విరామంతోనే అవన్నీ సాధ్యమని సమంత భావిస్తోందని తెలిసింది. అంతేగాక మరింత మెరుగైన చికిత్స కోసం అమెరికాకు వెళ్తున్నట్లు వార్తలు వస్తున్నాయి. ఈ చికిత్స కోసం సుమారు కోటి రూపాయలకు పైగా ఖర్చు అవుతుందనే వార్తలు వస్తున్నాయి.
సమంత ఈ ఏడాది సమ్మర్ లో 'శాకుంతలం' సినిమాతో తీవ్ర నిరాశ పరిచింది. గుణశేఖర్ దర్శకత్వంలో తెరకెక్కిన ఈ పౌరాణిక చిత్రం, బాక్సాఫీస్ వద్ద డిజాస్టర్ గా నిలిచింది. దీంతో ఇప్పుడు 'ఖుషి' అనే సినిమాపై ఆశలు పెట్టుకుంది. శివ నిర్వాణ దర్శకత్వంలో రూపొందే ఈ రొమాంటిక్ చిత్రంలో రౌడీ స్టార్ విజయ్ దేవరకొండకు జోడీగా కనిపించనుంది. ఇటీవలే రాజమండ్రి, ద్రాక్షారామం పరిసరాల్లో క్లైమాక్స్ పార్ట్ షూటింగ్ పూర్తి చేశారు. ఈ చిత్రాన్ని 2023 సెప్టెంబర్ 1న పాన్ ఇండియా స్థాయిలో విడుదల చేయడానికి మేకర్స్ సన్నాహాలు చేస్తున్నారు.
రాజ్ అండ్ డీకే దర్శకత్వం వహిస్తున్న 'సిటాడెల్' వెబ్ సిరీస్‌లో సమంతతో పాటుగా బాలీవుడ్ హీరో వరుణ్ ధావన్ మెయిన్ లీడ్ ప్లే చేస్తున్నారు. ఇది రూసో బ్రదర్స్ అమెరికన్ స్పై సిరీస్‌‌కు ఇండియన్ వెర్షన్. దీంట్లో సామ్ ఒక ఏజెంట్‌గా కనిపించడమే కాదు, రిస్కీ యాక్షన్ స్టంట్స్ చేయబోతోంది. దీని కోసం ఆమె ప్రత్యేకంగా శిక్షణ కూడా తీసుకుంది. అమెజాన్ ప్రైమ్ వీడియోలో ఈ సిరీస్ స్ట్రీమింగ్ కానుంది.