Harsha Chemudu About His Colour: హర్ష చెముడు అలియాస్ వైవా హర్ష గురించి పెద్దగా పరిచయం అవసరం లేదు. ‘వైవా’ షార్ట్ ఫిల్మ్ తో  సోషల్ మీడియాలో సంచలనం సృష్టించాడు. ఆ తర్వాత  పలు షార్ట్ ఫిల్మ్స్, వెబ్ సిరీస్ లలో నటించి మంచి గుర్తింపు తెచ్చుకున్నాడు. నెమ్మదిగా సినిమా పరిశ్రమలోకి అడుగు పెట్టాడు. తొలుత చిన్న చిన్న క్యారెక్టర్లు చేసిన ఆయన, ఇప్పుడు మంచి అవకాశాలు పొందుతున్నాడు. తాజాగా హర్ష ప్రధాన పాత్రలో ‘సుందరం మాస్టర్’ అనే సినిమా తెరకెక్కింది. కల్యాణ్ సంతోష్ ఈ సినిమాకు దర్శకత్వం వహించారు. ఆర్టీ టీం వర్క్స్, గోల్డెన్ మీడియా పతాకంపై రవితేజ, సుధీర్ కుమార్ సంయుక్తంగా ఈ సినిమాను నిర్మించారు.


మెగాస్టార్ చేతుల మీదుగా ‘సుందరం మాస్టర్’ ట్రైలర్ విడుదల  


‘సుందరం మాస్టర్’ సినిమా ఫిబ్రవరి 23న థియేటర్లలో రిలీజ్ కాబోతోంది. ఇప్పటికే ఈ సినిమా నుంచి విడుదలైన పోస్టర్లు, టీజర్ ప్రేక్షకులను బాగా ఆకట్టుకున్నాయి. తాజాగా ఈ మూవీ ట్రైలర్ మెగాస్టార్ చిరంజీవి చేతుల మీదుగా విడుదల అయ్యింది. ఈ సందర్భంగా మెగాస్టార్ చిరంజీవి హర్ష మీద ప్రశంసల జల్లు కురిపించారు. అతడు కూడా తనలాగే స్వయంకృషితో ఎదిగాడంటూ అభినందించారు. సోషల్ మీడియా అంతగా తెలియని రోజుల్లోనే తన వీడియోలతో మంచి గుర్తింపు తెచ్చుకున్నారని చెప్పారు. వైవా హర్ష లాంటి నటులు ఇంకా రావాలన్నారు. కొత్త ప్రయోగాలను, కొత్త కథలను ప్రేక్షకులు ఎప్పుడూ ఆదరిస్తూనే ఉంటారని, హర్ష మూవీకి కూడా మంచి ఆదరణ దక్కాలని ఆకాంక్షించారు.   


తన కలర్ గురించి ఆసక్తికర వ్యాఖ్యలు చేసిన హర్ష


ఇక తాజాగా ఏర్పాటు చేసిన ట్రైలర్ లాంఛ్ ఈవెంట్ లో వైవా హర్ష కీలక విషయాలు వెల్లడించారు. తన కలర్, బరువు గురించి మీడియా ప్రతినిధులు అడిగిన ప్రశ్నలకు సమాధానం చెప్పారు. “ నా కలర్, బరువు గురించి ఏమీ ఇబ్బంది ఫీల్ కాను. నేనే ఎలా ఉన్నా? నాలాగే ఉంటాను. అలా ఉండటమే నాకు ఇష్టం. ను నాలా ఉన్నందుకే చాలా మంది ఇష్టపడ్డారు. ఇష్టపడుతున్నారు. నాతో ఉంటున్నారు. సైజు, కలర్ అనేది మ్యాటర్ కాదు. చాలా మంది తాము ఎక్కువ బరువున్నాం. నల్లగా ఉన్నాం. అందంగా లేము అని బాధపడతారు. అయితే, ఇతర ఏ సమస్య గురించి అయినా బాధ పడవచ్చు. కానీ, రంగు, బరువు గురించి పెద్దగా ఆలోచించాల్సిన అవసరం లేదు. ఒకప్పుడు నేను కూడా నా సైజు గురించి బాధపడే వాణ్ణి. కానీ, ఇప్పుడు దాని గురించి ఎలాంటి బాధ లేదు. నేను ఎలా ఉన్నానో అలాగే ఉంటాను. ఇలా ఉండటం హ్యాపీగా ఉంది” అని చెప్పుకొచ్చారు.


‘సుందరం మాస్టర్’ కథ ఏంటంటే?


ఇక ‘సుందరం మాస్టర్’ మాస్టర్ సినిమా కథ.. ఒక గ్రామంలో ఇంగ్లీష్‌ బోధించేందుకు వెళ్లిన ఉపాధ్యాయుడి స్టోరీని బేస్ చేసుకుని ఈ చిత్రాన్ని తెరకెక్కించారు. మిర్యాలమెట్ట అనే మారుమూల గ్రామానికి ఇంగ్లీష్‌ టీచర్‌గా వెళ్లిన ‘సుందరం మాస్టర్‌’కు అక్కడ ఎలాంటి పరిస్థితులు ఎదురయ్యాయనేది ఇందులో చూపించారు. సినిమా స్టార్టింగ్ నుంచి ఎండింగ్ వరకు చక్కటి వినోదాన్ని పంచుతుందని చిత్రబృందం వెల్లడించింది. ఇక ఈ సినిమాకు దీపక్‌ సినిమాటోగ్రాఫర్ గా వ్యవహరించగా, శ్రీచరణ్‌ పాకాల సంగీతం అందించారు.  


Read Also: ‘వార్ 2’ షూటింగ్‌కు ముహూర్తం ఫిక్స్, ఎన్టీఆర్ లేకుండానే?