Salaar Teaser: రెబల్ స్టార్ ప్రభాస్ అభిమానులు ఎప్పుడెప్పుడా అని ఎదురు చూస్తున్న తరుణం రానే వచ్చేసింది. మాస్ ఎలివేషన్స్ డైరెక్టర్ ప్రశాంత్ నీల్-ప్రభాస్ కాంబోలో తెరకెక్కుతోన్న సినిమా ‘సలార్’. ఈ సినిమాలో శృతి హాసన్ హీరోయిన్ గా నటిస్తోంది. తాజాగా మూవీ టీజర్ ను రిలీజ్ చేశారు మేకర్స్. దీంతో ప్రభాస్ ఫ్యాన్స్ పండగ చేసుకుంటున్నారు. సిల్వర్ స్క్రీన్ పై ప్రభాస్ మాస్ ఎలివేషన్స్ చూసి చాలా రోజులైన నేపథ్యంలో ఇప్పుడు రిలీజ్ చేసిన టీజర్ ఫ్యాన్స్ లో కొత్త ఉత్సాహాన్ని నింపిందనే చెప్పాలి. టీజర్ లో ప్రభాస్ మాస్ లుక్ ను చూసి అభిమానులు మురిసిపోతున్నారు. ‘ఇది కదా ప్రభాస్ నుంచి మాకు కావాల్సింది’ అంటూ టీజర్ ను సోషల్ మీడియాలో షేర్ చేస్తున్నారు. ఓ వైపు టీజర్ పై అభిమానులు హర్షం వ్యక్తం చేస్తుంటే.. కొంతమంది ఫ్యాన్స్ మాత్రం టీజర్ పై అసంతృప్తి వ్యక్తం చేస్తున్నారు.
అదరగొట్టిన ‘సలార్’ టీజర్..
ఇక ‘సలార్’ టీజర్ విషయానికొస్తే.. ఓ రౌడీ గ్యాంగ్ చుట్టుముట్టి కాల్చేందుకు ప్రయత్నిస్తుండగా టీనూ ఆనంద్ డైలాగ్ తో టీజర్ ప్రారంభం అయింది. "లయన్, చిరుత, టైగర్, ఏనుగు, ఇవన్నీ చాలా ప్రమాదం కానీ, జురాసిక్‌ పార్క్‌ లో కాదు. ఎందుకుంటే ఆ పార్కులో..’ అని అంటుండగానే రెబల్ స్టార్ టైటిల్ తో ప్రభాస్ మాస్ కటౌట్ ను చూపించారు. ఈ టీజర్ కూడా కేజీఎఫ్ తరహా ఎలివేషన్స్ నే ఇచ్చాడు ప్రశాంత్ నీల్. చాలా పవర్‌ఫుల్‌ గానే టీజర్ ను కట్ చేశారు మేకర్స్. పిడికిలి బిగించి ప్రభాస్ నిల్చున్న సమయంలో ఫ్యాన్స్‌కు గూస్‌ బంప్స్ రావడం మాత్రం పక్కా. విజువల్ ట్రీట్, బ్యాగ్రౌండ్ మ్యూజిక్ అన్నీ అదిరిపోయాయనే చెప్పాలి. ఇది నిజంగా ప్రభాస్ అభిమానులకు మాస్ బిర్యానీ లాంటి ట్రీట్ అనే చెప్పొచ్చు.
టీజర్ పై అసంతృప్తి ఎందుకు?
ప్రభాస్ అభిమానులు ఎప్పటి నుంచో ఎదురు చూస్తోన్న సమయం ఇది. ఒక హై అండ్ మాస్ యాక్షన్ కటౌట్ లో ప్రభాస్ ను చూడాలని ఫ్యాన్స్ ఆసక్తిగా చూస్తున్నారు. అయితే ‘సలార్’ టీజర్ సరిగ్గా అలాంటి ట్రీట్ నే ఇస్తుందని అనుకున్నారు. వాస్తవానికి టీజర్ ఓ రేంజ్ లో ఉంది. అయితే అభిమానులు మాత్రం ఇంతకన్నా ఎక్కువే కోరుకున్నారు. టీజర్ లో ప్రభాస్ ఫేస్ ను చూపించకపోవడం అలాగే హీరో కు ఎలాంటి డైలాగ్ లు లేకపోవడంతో కొంతమంది అభిమానులు అసంతృప్తి వ్యక్తం చేస్తున్నారు. కొంత మంది ‘ఇది టీజర్ నా లేక గ్లింప్స్ నా’ అంటూ కామెంట్లు చేస్తున్నారు. ‘ఇన్నేళ్ల తర్వాత ప్రభాస్ నుంచి ఒక మాస్ ఎలివేషన్ టీజర్ వస్తుంటే ఫేస్ చూపించలేదేంది’ అంటూ మరొక అభిమాని కామెంట్ చేశాడు. అన్నీ బానే ఉన్నా ప్రభాస్ ఫేస్ చూపించకపోవడం అభిమానులకు కాస్త మింగుడు పడని వార్తలానే అనిపిస్తోంది. ఏదైమైనా టీజర్ మాత్రం ఫ్యాన్స్ లో కొత్త ఉత్సాహాన్ని నింపిందనే చెప్పాలి. మరి తర్వాత వచ్చే ట్రైలర్ లో అయినా ప్రభాస్ ను ఎలా చూపిస్తారో చూడాలి.
‘సీస్ ఫైర్’ అంటే ఏమిటి?
ప్రభాస్ అభిమానులకు దర్శకుడు ప్రశాంత్ నీల్ గుడ్ న్యూస్ చెప్పారు. ‘సలార్’ సినిమాను వివిధ పార్ట్ లుగా తీస్తున్నారని ముందు నుంచే వార్తలు వచ్చాయి. అందరూ అనుకున్నట్టుగానే టీజర్ చివర్లో పార్ట్ 1 సీస్ ఫైర్ అని రాసుకొచ్చారు. పార్ట్ 1 వరకూ ఓకే అసలు ఈ సీస్ ఫైర్ అంటే ఏమిటి అని అభిమానులు ఆరా తీస్తున్నారు. సీస్ ఫైర్ అనేది యుద్ద సమయంలో శాంతి కోసం కుదుర్చుకునే ఒక ఒప్పందం లాంటిది. ఏదైనా యుద్దంలో కాల్పులు ఎక్కువగా జరుగుతున్నప్పుడు ఆ సమయంలో శాంతి గురించి చర్చలను అనుమతించడం కోసం రెండు సైన్యాల మధ్య కుదుర్చుకునే ఒప్పందం పేరే సీస్ ఫైర్. టీజర్ చివర్లో పార్ట్ 1 సీస్ ఫైర్ అని రాసుకొచ్చారు మేకర్స్. మరి దీన్ని సినిమాలో ఏ విధంగా చూపిస్తారో చూడాలి.
ప్రపంచవ్యాప్తంగా సెప్టెంబర్ 28న 'సలార్'
'సలార్' విడుదలకు ఇంకెన్నో రోజులు లేదు. సెప్టెంబర్ 28న తెలుగు, కన్నడ, హిందీ, తమిళ, మలయాళ భాషల్లో ప్రపంచవ్యాప్తంగా ప్రేక్షకుల ముందుకు రానుందీ సినిమా. హోంబలే ఫిలిమ్స్ పతాకంపై విజయ్ కిరగందూర్ ఈ చిత్రాన్ని నిర్మిస్తున్నారు.
Also Read: మహాభారతం స్ఫూర్తితో త్రివిక్రమ్ - బన్నీ సినిమా?