అతిలోక సుందరి శ్రీదేవిని తెలుగు ప్రేక్షకులు ఎప్పటికీ మర్చిపోలేరు. అలాగే, ఎవ‌ర్‌గ్రీన్ హ్యాండ్సమ్ హీరో అందగాడు శోభన్ బాబును కూడా! వీళ్ళిద్దరి పేర్లు కలిసేలా మెగా డాటర్ సుస్మితా కొణిదెల నిర్మిస్తున్న సినిమా (Sridevi Shoban Babu Movie) కు టైటిల్ పెట్టారు.
సంతోష్ శోభన్ (santosh sobhan) హీరోగా... '96' ఫేమ్ గౌరీ జి. కిషన్ (gouri g kishan) హీరోయిన్‌గా నటిస్తున్న సినిమా 'శ్రీదేవి శోభన్ బాబు'. గోల్డ్ బాక్స్ ఎంట‌ర్‌టైన్‌మెంట్స్‌ పతాకంపై మెగా డాటర్ సుస్మితా కొణిదెల, విష్ణు ప్రసాద్ దంపతులు నిర్మిస్తున్నారు. ప్రశాంత్ కుమార్ దిమ్మల (Prasanth Kumar Dimmala) దర్శకత్వం వహిస్తున్నారు.
'శ్రీదేవి శోభన్ బాబు' సినిమా టీజర్‌ను స్టార్ హీరోయిన్ సమంత ట్విట్టర్ ద్వారా (Sridevi Shobhan Babu Movie Teaser Launched By Samantha) విడుదల చేశారు. టీజర్ చూస్తే... హీరో హీరోయిన్స్ మధ్య టామ్ అండ్ జెర్రీ తరహాలో ఫైట్ చేసుకుంటున్నారని అర్థం అవుతోంది.
హీరో టైపులో ఫైట్స్ చేసే అమ్మాయిగా గౌరీ జి. కిషన్‌ను చూపించారు. హీరో పాత్ర హుషారుగా ఉంది. 'మా ఇల్లు పట్టుకుని నీ ఇల్లు అంటావేంటి?' అని హీరో అడగటం, అంతకు ముందు 'నేనే ఈ ఇంటికి ప్రొప్రయిటర్' అని హీరోయిన్ చెప్పడం చూస్తే... సినిమాలో ఇల్లు కూడా కీ రోల్ పోషిస్తుందేమో! హీరో హీరోయిన్లతో పాటు సినిమాలో ప్రధాన పాత్రల్లో నటించిన నాగబాబు, రోహిణిలను కూడా టీజర్‌లో చూపించారు. శ్రీదేవి పాత్రలో హీరోయిన్ గౌరీ, శోభన్ బాబుగా సంతోష్ శోభన్ నటించారు. వీళ్ళ కథేంటో సినిమాలో చూడాలి.