Suhasini Says Chiranjeevi is Real Hero: టాలీవుడ్‌ ఇండస్ట్రీకి మెగాస్టార్ చిరంజీవికి 'గాడ్‌ఫాదర్‌' లాంటి వారు. ఆయన స్ఫూర్తితోనే ఇండస్ట్రీకి వచ్చామంటూ ఈతరం హీరోలంతా చెబుతుంటారు. హీరోగా టాలీవుడ్‌కు ఎన్నో బ్లాక్‌బస్టర్‌ హిట్స్ అందించారు. చలనచిత్ర రంగానికి ఆయన చేసిన విశేష సేవలకుగానూ ఇటీవల భారత ప్రభుత్వం ఆయనకు పద్మ విభూషణ్‌ అవార్డు ప్రకటించిన సంగతి తెలిసిందే. దేశంలోనే రెండవ అత్యన్నత పురస్కారం ఆయన దక్కడంతో ఫ్యాన్స్, ఇండస్ట్రీవర్గాలు ఆయనకు శుభాకాంక్షలు తెలుపుతున్నారు. ఇక రీల్‌పై హీరోగా హీరోయిన్లను విలన్‌ నుంచి కాపాడినట్టు ఎన్నో సినిమాల్లో చూశాం. రీల్‌లోనే కాదు రియల్ లైఫ్‌లోను చిరు హీరోయిన్‌ని విలన్ల నుంచి కాపాడారనే విషయం తెలుసా?.
ఈ విషయాన్ని స్వయంగా ఆ హీరోయినే వెల్లడించింది. చిరంజీవి, నటి సుహాసిని వెండితెరపై జంటగా ఎన్నో సినిమాల్లో అలరించారు. అయితే లాక్‌డౌన్‌ టైంలో ఇంటికే పరిమితమైన సుహాసిని తరచూ సోషల్‌ మీడియాలో వేదికగా ఫ్యాన్స్‌తో ముచ్చటించిన సంగతి తెలిసిందే. తరచూ లైవ్‌ చాట్‌కు వచ్చి ఆసక్తికర విషయాలను పంచుకునేంది. ఈ క్రమంలో ఓ రోజు లైవ్‌ చాట్‌లో నిర్వహిస్తుండగా చిరంజీవి ఆమెకు వీడియో కాల్‌ చేసి సర్‌ప్రైజ్‌ చేశారు. అదే సమయంలో తన రియల్ లైఫ్ లో జరిగిన రీల్‌ ఇన్సిడెంట్‌ను గుర్తు చేసుకున్నారామె. ఈ వీడియోలో సుహాసిని మాట్లాడుతూ.. ఓ మూవీ షూటింగ్ తర్వాత కొందరు ఆకతాయిలు మాపై దాడి చేస్తుంటే మీరు అడ్డుకున్నారు గుర్తుందా? అని చిరుతో అన్నారు.
‘కేరళలోని అథిరపల్లిలో షూటింగ్ చేస్తున్నాం. మీరు ముందు కారులో ఉన్నారు. నేను, నా హెయిర్ డ్రెస్సర్, డాన్స్ మాస్టర్ తార వెనక కారులో వస్తున్నాం. అదే సమయంలో కొందరు తాగుబోతులు మా కారును అడ్డుకున్నారు. మేము కారు దిగి వారిని వారిస్తుంటే బీరు బాటిళ్లు మాపైకి విసిరారు. అప్పుడు మీరు ఏం చేశారో గుర్తుందా?’ అని లైవ్‌లో చిరంజీవిని సుహాసిని అడిగారు. ‘నేను నా పిస్టల్ బయటికి తీశాను’ అని చిరంజీవి చెప్పారు. అది లైసెన్సెడ్ గన్ అని సుహాసిని అన్నారు. తాగుబోతులు సుహాసిని కారుపైకి బీరు బాటిళ్లు విసరడంతో చిరంజీవి వెంటనే గన్ తీసి వారిని బెదిరించారట. దాంతో వెంటనే మూవీ యూనిట్ బాయ్స్ కూడా సంఘటన స్థలానికి వచ్చి తాగుబోతులను చితక్కొట్టారట.
ఈ విషయాన్ని చిరంజీవి చెప్పగానే.. సుహాసిని మాట్లాడుతూ 'హీరోయిజం అంటే కెమెరా ముందు చేసేది మాత్రమే కాదు. రియల్ లైఫ్‌లో కూడా మీరు హీరో. ఈ విషయాన్ని ఈరోజు మీ అందరికీ చెప్పాలనుకున్నా' అంటూ మెగాస్టార్ ని రియల్ హీరో అంటూ పొగిడింది. చిరుకు 'పద్మవిభూషణ్‌' వచ్చినందుకు ఆయనకు అమెరికాలో సన్మానం జరుగుతున్న సంగతి తెలిసిందే. ఈ క్రమంలో మెగా ఫ్యాన్స్ ఈ పాత వీడియోను వైరల్‌ చేస్తున్నారు. ఇది చూసిన కొందరు 'అవును.. చిరంజీవి రీల్‌ లైఫ్ హీరోనే కాదు రియల్ లైఫ్ హీరో కూడా' అంటూ కేజీయఫ్‌ సీన్‌ను గుర్తు చేస్తున్నారు. కేజీయఫ్‌ సీన్‌ ఫస్ట్‌ ఇక్కడ క్రియేట్‌ అయ్యిందంటూ కామెంట్స చేస్తున్నారు. కాగా కేజీయఫ్‌ చాప్టర్‌ వన్‌లో హీరోయిన్‌ ఇంట్రడక్షన్‌ సీన్‌లో కొందరు ఆకతాయిలు ఆమెపై బీరు బాటిళ్లు విసురుతుండటంతో హీరో వచ్చి గన్‌తో వారిని బెదిరించిన సంగతి తెలిసిందే.