టాలీవుడ్ యంగ్ అండ్ టాలెంటెడ్ హీరో సిద్దు జొన్నలగడ్డ తాజాగా మహేష్ బాబు 'గుంటూరు కారం' మూవీకి సంబంధించి అదిరిపోయే అప్డేట్ ని అందించాడు. 'మ్యాడ్' మూవీ ఫ్రీ రిలీజ్ ఈవెంట్ కి హాజరైన సిద్దు ఈ ఈవెంట్లో 'గుంటూరు కారం' అప్డేట్‌ను అందరితో పంచుకోవడంతో ఈ అప్డేట్‌తో మహేష్ ఫ్యాన్స్ ఫుల్ ఖుషీ అవుతున్నారు. ఇంతకీ ఆ అప్డేట్ ఏంటి అనే వివరాల్లోకెళ్తే.. మాటల మాంత్రికుడు త్రివిక్రమ్ దర్శకత్వంలో సూపర్ స్టార్ మహేష్ బాబు నటించిన తాజా చిత్రం 'గుంటూరు కారం'. 'అతడు', 'ఖలేజా' వంటి సినిమాల తర్వాత త్రివిక్రమ్ - మహేష్ కాంబోలో సినిమా రాబోతుండడంతో ఇప్పటికే ఈ చిత్రంపై భారీ అంచనాలు నెలకొన్నాయి.
దానికి తోడు రీసెంట్ గా విడుదలైన టీజర్ సినిమాపై అంచనాలను తారస్థాయికి చేర్చింది. ఈసారి త్రివిక్రమ్ మహేష్ ని ఊర మాస్ అవతారంలో చూపించబోతున్నట్లు టీజర్ లో స్పష్టం అవడంతో ఫ్యాన్స్ ఈ మూవీ కోసం ఎంతో ఎక్సైటింగ్ గా వెయిట్ చేస్తున్నారు. ఎప్పుడో షూటింగ్ మొదలుపెట్టుకున్న ఈ సినిమా ఎన్నెన్నో మార్పులతో ఇంకా చిత్రీకరణ జరుపుకుంటూనే ఉంది. వచ్చే ఏడాది సంక్రాంతి కానుకగా ఈ సినిమాను విడుదల చేస్తున్నట్లు మేకర్స్ ఇప్పటికే అఫీషియల్ గా అనౌన్స్ చేశారు. అయితే షూటింగ్ ఆలస్యం అవుతూ వస్తుండటంతో సంక్రాంతికి ఈ సినిమా రావడం కష్టమేనని వార్తలు వచ్చాయి. ఈ నేపథ్యంలో కొందరు దర్శక నిర్మాతలు తమ సినిమాలను సంక్రాంతికి రిలీజ్ చేస్తున్నట్లు డేట్లు కూడా ఫిక్స్ చేశారు.
కానీ ఎట్టి పరిస్థితుల్లో 'గుంటూరు కారం' సంక్రాంతికి రిలీజ్ అవుతుందని నిర్మాత నాగ వంశీ తాజాగా కన్ఫర్మ్ చేశారు. అంతేకాకుండా సినిమా రిలీజ్‌కు 100 రోజులు ఉందని అఫీషియల్ పోస్టర్ను కూడా మేకర్స్ రిలీజ్ చేశారు. 'గుంటూరు కారం' సినిమా ఎవరు ఊహించని విధంగా ఉంటుందని, సినిమా కలెక్షన్స్ రాజమౌళి సినిమాల కలెక్షన్స్ కి ఏ మాత్రం తగ్గకుండా ఉంటాయని నాగ వంశీ ఓ ఇంటర్వ్యూలో చెప్పడంతో ఇండస్ట్రీ వర్గాల్లోనూ మూవీపై భారీ హైప్ నెలకొంది. చాలా రోజుల నుంచి మూవీ అప్డేట్ కోసం ఎంతో ఆసక్తిగా ఎదురుచూస్తున్న ఫ్యాన్స్ కి దసరా కానుకగా సినిమా నుంచి ఫస్ట్ సింగిల్ రిలీజ్ చేస్తున్నట్లు నాగ వంశీ తెలిపాడు.
ఇక తాజాగా యంగ్ హీరో సిద్దు జొన్నలగడ్డ 'గుంటూరు కారం' సాంగ్ గురించి ఒక క్రేజీ అప్డేట్ రివీల్ చేశాడు. 'మ్యాడ్' మూవీ ప్రీ రిలీజ్ ఈవెంట్ కి గెస్ట్ గా హాజరైన సిద్దు వేదికపై మాట్లాడుతూ.." నిర్మాత చినబాబు గారితో ఇప్పుడే మాట్లాడానని, ఆయన గుంటూరు కారం సాంగ్ షూటింగ్ నుంచి ఈవెంట్ కి వస్తున్నట్లు తెలిపాడు. చిన్న బాబు గారి కళ్ళల్లో అంత ఆనందం, ఆ మాటల్లో ఎక్సైట్మెంట్ తను చాలా రోజుల తర్వాత చూస్తున్నానని, ఆయన ఎక్సైట్మెంట్ ని చూస్తుంటే గుంటూరు కారం సాంగ్ రేపు రిలీజ్ తర్వాత థియేటర్స్ తగలబడిపోతాయి" అని చెప్పుకొచ్చాడు. ఈ అప్డేట్ కాస్త మహేష్ అభిమానుల్లో సరికొత్త ఉత్సాహాన్ని నింపింది. థమన్ సంగీతం అందిస్తున్న ఈ చిత్రంలో మహేష్ సరసన శ్రీలీల, మీనాక్షి చౌదరి హీరోయిన్స్ గా నటిస్తుండగా, హారిక అండ్ హాసిని క్రియేషన్స్ బ్యానర్ పై ఎస్. రాధాకృష్ణ నిర్మిస్తున్నారు.
Also Read : ఓవైపు ఫన్, మరోవైపు ఎమోషన్- ఆకట్టుకుంటున్న ‘ప్రేమ విమానం’ ట్రైలర్